សម្តេចតេជោ បញ្ជាក់ច្បាស់ៗ ៖ ការផ្អាកធ្វើដំណើរ គឺតែតាម «ផ្លូវគោក» ប៉ុណ្ណោះ ឯ«ផ្លូវអាកាស» នៅដំណើរការធម្មតា
- ភ្នំពេញ
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានប្រកានាយប់ថ្ងៃទី១៤ ខែធ្នូ ឆ្នាំ២០២៥នេះថា ៖…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានប្រកានាយប់ថ្ងៃទី១៤ ខែធ្នូ ឆ្នាំ២០២៥នេះថា ៖ ម្សិលមិញខ្ញុំ បានបង្ហោះសារមួយជូនយោបល់ចំពោះរាជរដ្ឋាភិបាលចំពោះ
ករណីប្រជាជនកម្ពុជា និងប្រជាជនថៃ ធ្វើដំណើរឆ្លងកាត់តាមព្រំដែនគោក គួរត្រូវបានផ្អាក ដើម្បីធានាសុវត្ថិភាពទាំងប្រជាជនកម្ពុជា និងទាំងប្រជាជនថៃ ។
សម្តេចតេជោ បានបញ្ជាក់បន្តថា អាចមានការភាន់ច្រឡំ ឬចង់បង្ករឿងពីភាគីម្ខាងទៀត ដែលគិតថា យើងមិនអនុញ្ញាតិឲ្យប្រជាជនថៃវិលត្រឡប់ទៅប្រទេសវិញ ។ ខ្ញុំសូមបញ្ជាក់ ឲ្យបានច្បាស់ថា ការផ្អាកការធ្វើដំណើរ គឺគួរធ្វើតែតាមផ្លូវគោកប៉ុណ្ណោះ ព្រោះការប្រយុទ្ធ និងការឈ្លានពានមានទូទាំងព្រំដែនគោកទៅហើយ បន្ថែមដោយផ្នែកមួយនៃតំបន់សមុទ្រ ។ សម្រាប់ការធ្វើដំណើរតាមផ្លូវអាកាស នូវតែអាចធ្វើដំណើរបានធម្មតា ព្រោះគ្មានការប្រយុទ្ធនៅព្រលានយន្តហោះទេ ។
សម្តេចតេជោ បានបន្ថែមថា ៖ អាស្រ័យហេតុនេះ សូមបងប្អូនប្រជាជនថៃ ដែលកំពុងរស់នៅកម្ពុជាអាចចាកចេញពីកម្ពុជាតាមផ្លូវអាកាសនៅភ្នំពេញ ឬនៅសៀមរាប ។ សម្រាប់ប្រជាជនថៃ ដែលកំពុងធ្វើការនៅជិតព្រំដែនវៀតណាម អាចចេញទៅតាមវៀតណាម ហើយរកវិធីធ្វើដំណើរទៅកាន់ប្រទេសថៃវិញ ។
ឯប្រជាជនកម្ពុជា ប្រសិនចង់មកកម្ពុជា ក៏ត្រូវធ្វើដំណើរត្រឡប់មកកម្ពុជាវិញតាមផ្លូវអាកាសនៅទីកន្លែងដែលមានជើងហោះហើរមកកម្ពុជា ។ សម្តេចតេជោ បានបន្តថា ខ្ញុំសូមបញ្ជាក់សារជាថ្មីថា យើងមិនបានហាមឃាត់ការធ្វើដំណើររបស់ប្រជាជនកម្ពុជា ឬប្រជាជនថៃនោះឡើយ ។ អ្វីដែលយើងសូមឲ្យផ្អាក គឺការធ្វើដំណើរតាមផ្លូវគោក ដែលជាចំណុចគ្រោះថ្នាក់ដល់ជីវិតប្រជាជន ។
សូមពិនិត្យឡើងនូវសាររបស់ខ្ញុំម្សិលមិញ !និងសូមកុំយកបំណងល្អរបស់ខ្ញុំ ដើម្បីការពារជីវិតមនុស្សទាំងជនជាតិខ្មែរទាំងជនជាតិថៃមកវាយប្រហារលើខ្ញុំបែបនេះ ៕
ចែករំលែកព័តមាននេះ