ខេត្តកំពង់ធំ ៖ អ្នកបើករ៉ឺម៉កម្នាក់បានស្លាប់ភ្លាមៗនៅនឹងកន្លែង និងអ្នករួមដំណើរម្នាក់របួសស្រាលដោយសាររថយន្តដឹកដីបុកជាមួយម៉ូតូសណ្តោងរ៉ឺម៉ក កាលពីវេលាម៉ោង៩ និង១០នាទីព្រឹក ថ្ងៃទី៣ មិថុនា ២០១៣ នៅភូមិបល្ល័ង្ក ឃុំបល្ល័ង្ក ស្រុកបារាយណ៍ ខេត្តកំពង់ធំ ។ ជនរងគ្រោះដែលស្លាប់ឈ្មោះលាប់ ប៉ឡាយ ភេទប្រុស អាយុ១៧ឆ្នាំ ជាអ្នកបើករ៉ឺម៉ក រស់នៅភូមិអូទំរ៉ាយ ឃុំគងជ័យ ស្រុកអូរាំងឪ ខេត្តកំពង់ចាម រីឯអ្នករួមដំណើរជាមួយដែលរបួសស្រាលឈ្មោះយ៉េង សុភាព ភេទប្រុស អាយុ១៧ឆ្នាំ រស់នៅភូមិ-ឃុំជាមួយគ្នា។
តាមប្រភពបានឱ្យដឹងថា មុនពេលកើតហេតុគេឃើញរថយន្ត និងម៉ូតូបើកបញ្ច្រាសទិសគ្នាពីលិចទៅកើត លុះមកដល់កន្លែងកើតហេតុស្រាប់តែរថយន្ត និងម៉ូតូបុកគ្នាពេញទំហឹងតែម្តង ចំណែករថយន្តពេលដឹងថា បុកមនុស្សស្លាប់ក៏បន្ថែមល្បឿនទៅមុខ តែត្រូវកម្លាំងកងរាជអាវុធហត្ថស្នាក់ការសន្តិសុខ១០២ស្ទាក់ចាប់បាននៅផ្លូវបំបែកសម្តេចហ៊ុន សែន បាក់ស្នាខាងកើតកន្លែងកើតហេតុប្រមាណជា២គីឡូម៉ែត្រ។
ក្រោយកើតហេតុសពត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែករថយន្ត និងរ៉ឺម៉កសណ្តោងត្រូវប៉ូលិសចរាចរស្រុកបារាយណ៍យកទៅរក្សាទុកដើម្បីចាត់ការតាមច្បាប់៕
ចែករំលែកព័តមាននេះ