សេចក្តីស្នើ​ច្បាប់ស្តីពី​ការប្រឆាំង​និងការមិនទទួល​ស្គាល់ឧក្រិដ្ឋកម្ម​ដែលប្រព្រឹត្តឡើង​ក្នុងរយៈពេលនៃ​របបកម្ពុជា​ប្រជាធិបតេយ្យ​ នឹងត្រូវ​គណៈកម្មការ​​ជំនាញ​រដ្ឋសភា​លើក​យក​មក​ពិនិត្យនិងលើក​យោបល់​ នៅព្រឹកថ្ងៃទី​០៤ មិថុនា​ ២០១៣នេះ​ ។ នេះបើយោង​តាមលោក ញ៉ែម ថ្ថាវី ​​តំណាងរាស្រ្តមណ្ឌល​កំពង់ធំ​​របស់​គណបក្ស​ប្រជាជនកម្ពុជា ដែលបា្រប់​កោះសន្តិភាព​នៅព្រឹកថ្ងៃទី០៣ ​មិថុនា ​២០១៣ ។

បើតាមលោក​ ញ៉ែម ថ្ថាវី​ដដែល​ បន្ទាប់ពីបញ្ចប់ការ​ពិនិត្យនិងលើក​យោបល់រួច​ គណៈកម្មការ​ជំនាញ នឹងបញ្ជូន​​សេចក្តីស្នើ​ច្បាប់នេះ​ទៅគណៈកម្មាធិការ​​អចិន្ត្រៃយ៏​​រដ្ឋសភា​បន្តពិនិត្យ​សម្រេច​ដាក់បញ្ចូល​ក្នុងរបៀបវារៈ​នៃសម័យ​ប្រជុំរដ្ឋសភា​។

នៅក្នុងសេចក្តី​ព្រាងច្បាប់​ដែលមាន​៥មាត្រានេះ​ បានកំណត់ថា​ ជនទំាងឡា​យ​ណាដែលប្រឆាំង​​និង​ការមិនទទួល​ស្គាល់ថា​ របបកម្ពុជា​ប្រជាធិបតេយ្យ( ប៉ុល ពត) ពុំមាន​ការ​ធ្វើទារុណកម្ម​និងសម្លាប់មនុស្ស​នោះ​ នឹងត្រូវជាប់​ពន្ឋនាគារ​ពី០៦ខែ ដល់ ​២ឆ្នាំ និងពិន័យ​ជា​បា្រក់​​ពី០១លាន​ទៅ០៤លានរៀល​ ហើយករណី​មិនរាង​ចាលត្រូវ​ពិន័យពី៥០លាន​ ទៅ៥០០លានរៀល ។

គួរបញ្ជាក់ថា​ សេចក្តីស្នើ​ច្បាប់ស្តីពី​ការប្រឆាំង​និងការមិនទទួល​ស្គាល់ឧក្រិដ្ឋកម្ម​ដែលប្រព្រឹត្តឡើង​ក្នុងរយៈពេល​នៃរបបកម្ពុជា​ប្រជាធិបតេយ្យ​នេះ ត្រូវបាន​ក្រុមអ្នក​តំណាង​រាស្រ្តគ​ណបក្ស​ប្រជាជន​កម្ពុជានិងគ​ណបក្សហ៊្វុន​ស៊ិនប៉ិច​ តាក់តែងឡើង​ ​បន្ទាប់ពីសម្តេច​នាយករដ្ឋមន្រ្តី​ ហ៊ុន សែន​ បានប្រកាស​អំពាវនាវ​កាលពីថ្ងៃទី២៧​ ឧសភា ​២០១៣​ បន្ទាប់ពី​ប្រធានស្តីទី​គណបក្ស​សង្រ្គោះជាតិ​ លោក កឹម សុខា​ ត្រូវបានសម្តេច​តេជោ​លើកឡើងថា​ លោក កឹម សុខា​ និយាយថា​ គុកទួលស្លែង​ជាកន្លែងសិប្បនិម្មិត​នោះរួច​មក ដែលធ្វើឲ្យមាន​ប្រតិកម្មជាបន្ត​បន្ទាប់ពី​អតីតជនរងគ្រោះ​នៅមន្ទីរស ២១ ​ឬ គុកទួលស្លែង ​ក្នុងនោះមានទំាងលោក ជុំ មី និង លោក ប៊ូ ម៉េង ជាដើម ។

ជាមួយគ្នា​នេះដែរ ​នៅថ្ងៃស្អែក​ទី០៤ មិថុនា ​ដែលជាថ្ងៃឳសាន​វាទចុងក្រោយ​សម្រាប់លោក​ កឹម សុខា ​សុំទោសនោះ ក្រុមអតីត​ជនរងគ្រោះ​នៅ​គុកទួលស្លែង​ដឹកនំា​ដោយ​លោក ជុំ មី ​និង លោក ប៊ូ ម៉េង​ នឹងធ្វើសន្និសីទ​កាសែត មុននឹងប្រកាស​ធ្វើបាតុក​ម្ម ប្រសិនបើលោក​ កឹម សុខា ​មិនអុជធូបសុំ​ទោសជនរងគ្រោះ​​និងព្រលឹងជនរងគ្រោះ​ទំាងអស់​ដែលស្លាប់នៅគុកទូលស្លែង​ទេនោះ ៕