រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ក្នុងជំនឿជឿជាក់ថា នៅអាណត្តិខាងមុខគណបក្សប្រជាជនកម្ពុជានឹងដឹកនាំប្រទេសបន្តទៀត គ្មានអ្នកណាអាចយកឈ្នះគណបក្សប្រជាជនកម្ពុជាបានទេ ។ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍បែបនេះ នាព្រឹកថ្ងៃទី១ មិថុនា ក្នុងពិធីខួបលើកទី៦៤ ទិវាកុមារអន្តរជាតិ១ មិថុនា ខួបលើកទី១២ទិវាពិភពលោកប្រឆាំងពលកម្មកុមារ១២មិថុនា និងទិវាកុមារកម្ពុជាឆ្នាំ២០១៣ នៅមជ្ឈមណ្ឌលសន្និបាតនិងពិព័រណ៍កោះពេជ្រ ។
អញ្ជើញចូលរួមក្នុងពិធីនោះមានលោកលោកស្រី ជាសមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល លោកឯកអគ្គរាជទូត ឯកអគ្គរដ្ឋទូតប្រចាំនៅកម្ពុជា ដៃគូអភិវឌ្ឍន៍អង្គការមិនមែនរដ្ឋាភិបាល អង្គការជនពិការកម្ពុជា លោកគ្រូ អ្នកគ្រូ សិស្សានុសិស្ស និងក្មួយៗ កុមារជាច្រើនពាន់នាក់ ។
សម្តេចតេជោ នាយករដ្ឋមន្ត្រីមានប្រសាសន៍ថា ការស្ទង់របស់IRI មានជើងលេខ៣ គឺជើងលេខ១ សម្រាប់CPP ជើងលេខ១ សម្រាប់ហ្វុ៊នស៊ិនប៉ិច ឯជើងលេខ១ទៀតសម្រាប់បក្សប្រឆាំង ។
ជើងលេខរបស់CPPនោះចេញរួចហើយ ដើរលើផ្លូវត្រូវ៧៩% ដើរលើផ្លូវខុស២១% ។ បើប្រៀបធៀបកំណើន ខែកុម្ភៈឆ្នាំ២០០៨ និងខែកុម្ភៈឆ្នាំ២០១៣ មុនបោះឆ្នោតដូចគ្នា ខែកុម្ភៈឆ្នាំ២០០៨ ពេលនោះចម្លើយ៧៧%ត្រូវ ២០%ខុសនិង៣%មិនឆ្លើយ ។ ឥឡូវយើងមាន៧៩%ត្រូវនឹង២១%ខុសដល់អត្រាអ្នកបោះឆ្នោតដែលបោះជូនស្មើនឹង៧៧% ដែលកាលពីឆ្នាំ២០០៨ មានតែ៧៥%ទេ ។ ដូច្នេះកំណើន២% ព្រមគ្នាជាមួយអត្រាការគាំទ្របោះឆ្នោតឆ្នាំ២០១២ កន្លងទៅជាង៦១% ។ ប៉ុន្តែខ្ញុំបានជើងលេខគ្រប់គណបក្ស លើកលែងតែគណបក្សដទៃនោះ ទេដែលមិនបានទទួល ។
សម្តេចតេជោមានប្រសាសន៍ថា ហ្វុ៊នស៊ិនប៉ិច ទំនងជាបោះឱ្យ២០% ហើយទំនងជាមិនបោះឱ្យ១៩% ហើយអត់បោះឱ្យ៥៥% ធ្ងន់ណាស់ សម្តេចបានប្រាប់លោកញឹក ប៊ុនឆៃ សូមប្រឹងឱ្យមែនទែន ។ ដោយឡែកសម្តេចបានលើកពីការគន់គូរដែលគណបក្សប្រឆាំងបានដោយខ្លួនឯង ។ គេបានបញ្ជាក់ថា អត្រាដែលគេស្ទង់មតិគាំទ្រឱ្យអ្នកឯង១០០%ដែលត្រូវបោះឱ្យអ្នកឯង អ្នកឯងបាន៥៤% ស្មើ ៦៤ អាសនៈ ហើយបើបោះឱ្យអ្នកឯងស្មើនឹង៧៥%នៃ៥៤ហ្នឹង អ្នកឯងបាន៥៣អាសនៈ ។
ឯគណបក្សប្រជាជនបាន៧០ ហើយបើសិនជា៥០%នៃ៥៤%គាត់បាន៤៥អាសនៈ គាត់គិតដូច្នេះ ។ សម្តេចតេជោមានប្រសាសន៍ថា ខ្ញុំមានហើយ ប៉ុន្តែគ្រាន់តែខ្ញុំមិននិយាយ ព្រោះលោកឯងចេះតែនិយាយតែផ្តេសតែផ្តាសខ្ញុំថាទៅវិញ ។ ស្រាប់តែមានលោកណាមួយនោះចេញមកនិយាយថា គេរក្សាសម្ងាត់ ចុះដៃម្ខាងទាមទារសិទ្ធិទទួលព័ត៌មាន ដៃម្ខាងសុំបិទព័តមាន ។ ការស្ទង់មតិគឺជាឧបករណ៍ប្រជាធិបតេយ្យបំផុតហើយដែលគេប្រើនៅគ្រប់តែប្រទេស ។ សម្តេចមានប្រសាសន៍ថា នៅស្រុកខ្មែរចម្លែក នៅជំនាន់ឆ្នាំ១៩៩៣ នៅពេលនោះការស្ទង់មតិដោយអង្គការសហប្រជាជាតិអ៊ុនតាក់ កាលនោះCPPនាំមុខរហូត ស្រាប់តែអ៊ុនតាក់បញ្ឈប់ឱ្យផ្សាយតែម្តង ចាំបានទេ នេះហើយការរៀបរៀងដោយអ៊ុនតាក់ ។
ឥឡូវមានអ្នកចង់ធ្វើអ៊ុនតាក់ទៀតឬអី ? បានជាមិនចង់ឱ្យផ្សាយ ? ឥឡូវប្រហែលជាគេទទួលបានហើយ គណបក្សប្រជាជនមាន៧៧កៅអីនៅក្នុងការស្ទង់មតិលោកឯងគិតទៅ ។ ហើយលោកឯងគិតតែធ្វើលេខខ្លួនឯង បើលោកឯងគេបោះឱ្យ៧៥% លោកឯងក៏នៅតែចាញ់ បើបោះឱ្យ៥០%ក៏នៅតែចាញ់ដែរ លើកលែងតែគេបោះឱ្យ១០០% តែវាមិនអាចទៅរួចទេ ។ សម្តេចតេជោ ហ៊ុន សែន អះអាងថា រឿងឈ្នះគឺឈ្នះហើយអត់មានស្អីដែលត្រូវពិបាកនិយាយតតាក់តតាំស្អីទេ កន្លងទៅចេះតែតែតៗឈ្នះៗ ណ្ហើយចាំជាតិក្រោយតែម្តងទៅ ។
ជាការពិតណាស់ទៅហើយ ការបោះឆ្នោត ៥ឆ្នាំម្តងរហូតដល់ឆ្នាំ២០១៨ ហ៊ុន សែន ទៀតហើយ នាយករដ្ឋមន្ត្រី កុំឆ្ងល់ពេក ។ ប៉ុន្តែយើងមិនជំទាស់ទេ ក្នុងការដែលគេធ្វើនាយករដ្ឋមន្ត្រីឧទាហរណ៍ ។ ពីពេលនេះរហូតដល់ពេលបោះឆ្នោតឱ្យគេចុះគេមានបេក្ខភាពនាយករដ្ឋមន្ត្រី គេមានបេក្ខភាពប្រធានសភា…។ ចំណែកយើងវិញជានាយករដ្ឋមន្ត្រី ឧបនាយករដ្ឋមន្ត្រី រដ្ឋមន្ត្រី រដ្ឋលេខាធិការ អនុរដ្ឋលេខាធិការក្នុងតំណែងត្រូវបន្តទៅទៀតដល់បង្កើតថ្មីទៅបន្តទៅទៀត ។ មិនទាន់បោះឆ្នោតផងគេនិយាយថាឈ្នះ ចំណែកយើងក៏និយាយថា ឈ្នះកើតដែរ ព្រោះអត់មានអ្នកណាមកឃាត់ផង ។ សម្តេចតេជោ នាយករដ្ឋមន្ត្រីបានរិះគន់វិទ្យុក្នុងស្រុកមួយថាខូចណាស់ តែងតែនិយាយបំផ្លើសការពិត ។
ឥឡូវខ្ញុំនិយាយឱ្យផ្សាយ កាលពីខែកុម្ភៈឆ្នាំ២០០៨ ការស្ទង់មតិនៅ ពេលនោះប្រជាជនកម្ពុជាបានឆ្លើយថា «កម្ពុជាដើរលើផ្លូវត្រូវ៧៧% ដល់ខែកុម្ភៈឆ្នាំ២០១៣ប្រជាជនកម្ពុជាឆ្លើយថាកម្ពុជាដើរលើផ្លូវត្រូវ៧៩% អត្រាគាំទ្រគណបក្សប្រជាជន ខែកុម្ភៈ ឆ្នាំ២០០៨ ស្មើនឹង៧៥% ឥឡូវខែកុម្ភៈ ឆ្នាំ២០១៣ ស្មើនឹង៧៧% សូមយកភាសាខ្ញុំផ្សាយឱ្យត្រឹមត្រូវ ។ ខូចម្លេ៉ះ បំភ្លៃមិនចេះខ្មាសគេទេឬ? គេចាក់ទូទាំងប្រទេសដល់លោកឯងទៅនិយាយផ្សេង ។ រួចហើយថា វិទ្យុឯករាជ្យ…ផេះ ។ លេងកុំខឹង ខឹងកុំលេង …។ មួយនោះចេញប្រតិកម្មភ្លាម បើលោកល្ងង់ លោកកុំធ្វើចេះ ព័ត៌មានរបស់លោកបានមកដល់ដៃខ្ញុំ រាប់ទាំងលោកគិតពួកអស់លោកទេ ដែលផ្ញើទៅឱ្យខ្ញុំ ។ គិតអត្រា១០០%លោកឯងបានប៉ុន្មាន? ខ្ញុំបានប៉ុន្មាន? គិតអត្រា៧៥% លោកឯងបានប៉ុន្មាន ? ខ្ញុំបានប៉ុន្មាន ?គិតអត្រា៥០%លោកឯងបានប៉ុន្មាន? ខ្ញុំបានប៉ុន្មាន? អីុចឹងលោកឯងគិតចុះគិតឡើង គិតក្បួនចៅចាក់ស្មុគ របស់លោកឯង ហើយលោកឯងប្រតិកម្មជាមួយសម្តីរបស់ខ្ញុំ ។ ខ្ញុំនិយាយតែរបស់ខ្ញុំទេតើ ខ្ញុំមិនបាននិយាយរបស់លោកឯងឯណា ដូច្នេះខ្ញុំត្រូវតែនិយាយត្រឡប់ទៅវិញ ហើយនិយាយកាន់តែឮទៀតលើកនោះ ។
សម្តេចតេជោមានប្រសាសន៍ថា ការស្ទង់មតិដំបូង ប្រជាជនកម្ពុជាថា កម្ពុុជាដើរលើផ្លូវត្រូវ៦០% មកដល់ឥឡូវឡើងដល់៧៩% លោកឯងថា ម៉េច ?
ខ្ញុំមានលទ្ធភាពដឹកនាំប្រទេសឆ្លងកាត់វិបត្តិសេដ្ឋកិច្ចសាកល វិបត្តិដោយសារគ្រោះទឹកជំនន់ ព្យុះមហន្តរាយកេតសាណា ។ ខ្ញុំធ្វើឱ្យម៉ាក្រូសេដ្ឋកិច្ចនៅនឹងកំណើនជុំវិញឡើង៧% នោះគឺមិនមែនជារឿងលេងសើចទេណា ។ នាយករដ្ឋមន្ត្រីបក្សនយោបាយមួយដឹកនាំរក្សានូវភាពឡើងរបស់ខ្លួនអត់មានការធ្លាក់ចុះទេ ។
សម្តេចតេជោ ហ៊ុន សែន បញ្ជាក់ថា ខ្ញុំបាននិយាយហើយបើសិនជាធ្លាក់ចុះនៅក្រោម៥០% ខ្ញុំនឹងប្រកាសអាសន្នខ្ញុំលាចេញពីតំណែង ។ ខ្ញុំនិយាយឱ្យឮ ។ លោកឯង គ្មានទៅរួចទេ ៧៥%និង៥០%អត់ទៅរួចទេ ធ្វើនយោបាយច្រឡឺសបឺស គេនិយាយរបស់គេទេតើ ឯងប្រតិកម្មអី ហើយខ្លួនឯងអត់មានព័ត៌មានច្បាស់ដល់គេខោកទៅបានឈឺឬអី? ឥឡូវគេបញ្ជូនទៅអស់ហើយ មើលខ្លួនឯងទៅវាខុសរបស់ខ្លួនឯងយ៉ាងដូចម្តេច ?
បើស្ទើរភ្លើងទេកុំធ្វើនយោបាយ បណ្តើរប្រពន្ធពីរនោះទៅ ប្រពន្ធសុទ្ធតែអ្នកតំណាងរាស្ត្រទាំងពីរ ប្រពន្ធដើមក៏តំណាងរាស្ត្រ ប្រពន្ធចុងក៏តំណាងរាស្ត្រ ខ្ញុំមិនវាយប្រហារថា ឱ្យអ្នកណាទេ ។ មិនដែលមានប្តីអង្គុយក្នុងសភា ប្រពន្ធដើមក៏អង្គុយនៅសភា ប្រពន្ធចុងក៏អង្គុយនៅសភា ។ ប៉ុន្តែអ្នកណាឆ្លើយអ្នកនោះហើយ ខ្ញុំថាអត់មានចំឈ្មោះឯណា ? អ្នកណាឆ្លើយអ្នកនោះហើយ ៕
ចែករំលែកព័តមាននេះ