រាជធានីភ្នំពេញ ៖ លោកយូ ប៊ុណ្ណា ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី២ មិថុនា បានសម្រេចចេញដីកាឃុំខ្លួនលោកហុង ណារ៉ា ចាងហ្វាងកាសែតកម្ពុជាថ្ងៃនេះ ដាក់ពន្ធនាគារព្រៃសជាបណ្តោះអាសន្ន ក្រោមការចោទប្រកាន់ពីបទឆបោក ។ លោកហុង ណារ៉ា ចាងហ្វាងកាសែតកម្ពុជាថ្ងៃនេះត្រូវកម្លាំងសមត្ថកិច្ច ការិយាល័យស្រាវជ្រាវបទល្មើសព្រហ្មទណ្ឌនៃបញ្ជាការដ្ឋានកងរាជអាវុធហត្ថលើផ្ទៃប្រទេស ចាប់ឃាត់ខ្លួនកាលពីថ្ងៃទី១ មិថុនា តាមដីកាបញ្ជាឱ្យចូលខ្លួនរបស់លោកមាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ ។
ក្រោយពេលឃាត់ខ្លួនកម្លាំងកងរាជអាវុធហត្ថ បាននាំខ្លួនលោកហុង ណារ៉ា ទៅកាន់សាលាដំបូងដើម្បីឱ្យតំណាងអយ្យការធ្វើការសាកសួរលើពាក្យបណ្តឹងពីបទឆបោកនាល្ងាចថ្ងៃដដែលនោះ ។ លោកមាស ច័ន្ទពិសិដ្ឋ ព្រះរាជអាជ្ញារងក៏បានដំណើរការសាកសួរលោកហុង ណារ៉ា នៅចំពោះមុខមេធាវី ការពារក្តី គឺលោកកែវ យ៉ា ដោយលោកព្រះរាជអាជ្ញារងបានចោទប្រកាន់លោកហុង ណារ៉ា ជាផ្លូវការ រួចបានចាត់បញ្ជូនសំណុំរឿងនេះទៅចៅក្រម លោកយូ ប៊ុណ្ណា ដើម្បីធ្វើការបន្តតាមនីតិវិធី ។ ចៅក្រមក៏បានផ្តើមសាកសួរ ប៉ុន្តែដោយសារល្ងាចណាស់ទៅហើយជាម៉ោងដែលមន្ត្រីរាជការឈប់សម្រាកនោះ ចៅក្រមបានសម្រេចផ្ញើជនត្រូវចោទគឺលោកហុង ណារ៉ា ទៅបញ្ជាការដ្ឋានកងរាជអាវុធហត្ថលើផ្ទៃប្រទេស ១យប់ ហើយតម្រូវឱ្យព្រឹកថ្ងៃទី២ មិថុនា នាំខ្លួនលោកហុង ណារ៉ា ទៅសាកសួរបន្តទៀត ។
លុះនៅព្រឹកថ្ងៃកំណត់ ជនជាប់សង្ស័យមិនត្រូវបាននាំទៅសាកសួរតាមការគ្រោងទុកនោះទេ ពោលគឺព្រឹកឡើង ស្រាប់តែចៅក្រមបានអញ្ជើញមន្ត្រីកងរាជអាវុធហត្ថឱ្យទៅទទួលយកដីកាឃុំខ្លួនបណ្តោះអាសន្នលោកហុង ណារ៉ាតែម្តង ហើយនៅម៉ោងប្រមាណ៩ព្រឹកថ្ងៃទី២ មិថុនា លោកហុង ណារ៉ា ត្រូវបញ្ជូនទៅដាក់នៅពន្ធនាគារព្រៃស ។ ទាក់ទិនទៅនឹងបទល្មើសឆបោកដែលមានការចោទប្រកាន់ទៅលើលោកហុង ណារ៉ា រហូតឈានទៅដល់ការឃុំខ្លួននោះ មិនមានព័ត៌មានណាបញ្ជាក់ឱ្យលម្អិតថា លោកហុង ណារ៉ា ចាងហ្វាងកាសែតកម្ពុជាថ្ងៃនេះ ឆបោកគេពីរឿងអ្វីនិងពីអ្នកណា ឬដើមបណ្តឹងមួយណានោះទេ ប៉ុន្តែបើតាមការលេចឮការជំពាក់ប្រាក់គេនោះក៏មិនតិចដែរ ។ សូម្បីតែលោកមេធាវីការពារក្តីឱ្យលោកហុង ណារ៉ា ក៏មិនអាចទាក់ទងបានដែរ ដោយសារថ្ងៃចាប់ខ្លួននិងថ្ងៃឃុំខ្លួនជាថ្ងៃសម្រាករបស់មន្ត្រីសាធារណៈ ៕
ចែករំលែកព័តមាននេះ