ខេត្តព្រះវិហារ ៖ តាមប្រភពព័ត៌មានឱ្យដឹងថា ពលរដ្ឋខ្មែរដែលឡើងកាប់ឈើគ្រញូងក្នុងទឹកដីសៀម កាលពីថ្ងៃទី២៧ ឧសភា មក នៅលើខ្នងភ្នំដងរែកខាងកើតច្រកទ្វារអានសេះនៅក្នុងទឹកដីសៀម បានត្រូវទាហានសៀមបាញ់ស្លាប់៦នាក់ ដោយមិនអាចយកសពមកទឹកដីកម្ពុជាវិញបានទេ និង១០នាក់ទៀតត្រូវទាហានសៀមចាប់យកទៅដាក់គុកក្នុងខេត្តឧប៊ុន ។
ដោយឡែក នៅវេលាម៉ោង៤រសៀលថ្ងៃទី២៩ ឧសភា នៅខាងលិចច្រកទ្វារអានសេះ ស្ថិតក្នុងភូមិឈើទាលគងពលរដ្ឋខែ្មរ៨នាក់ ដែលឡើងកាប់ឈើគ្រញូងចំណុចអូររំចេកលើខ្នងភ្នំដងរែក ស្ថិតក្នុងទឹកដីសៀមត្រូវបានទាហានសៀម បាញ់ស្លាប់២នាក់ ខណៈពេលពួកគេកំពុងលីឈើគ្រញូងចូលមកទឹកដីកម្ពុជាវិញ និង៦នាក់ទៀតរត់រួចចូលមកទឹកដីកម្ពុជាវិញ ។ សពពលរដ្ឋខ្មែរទាំង២នាក់នោះត្រូវបានទាហានសៀមប្រគល់ជូនអាជ្ញាធរកម្ពុជានៅរសៀលថ្ងៃទី៣០ ឧសភា និងត្រូវបានប្រជាពលរដ្ឋភូមិឈើទាលគង ប្រារព្ធពិធីបូជានៅរសៀលថ្ងៃទី៣០ ឧសភា នៅក្នុងភូមិឈើទាលគងនោះតែម្តង ។
គួររំលឹកថា ពលរដ្ឋខែ្មរឡើងកាប់ឈើគ្រញូងនៅក្នុងទឹកដីសៀមលើខ្នងភ្នំដងរែកនៅថ្ងៃទី២៧ ឧសភា និងថ្ងៃទី២៩ ឧសភា កន្លងទៅ ហើយត្រូវទាហានសៀមបាញ់ស្លាប់មានចំនួន៨នាក់ និងត្រូវទាហានសៀមចាប់ដាក់គុកក្នុងខេត្តឧប៊ុនចំនួន១០នាក់ ។ ជុំវិញតួលេខស្លាប់ និងរបួសនេះ មិនមានសមត្ថកិច្ចណាមួយប្រាប់ឱ្យដឹងជាផ្លូវការនោះទេ តែជាការទទួលព័ត៌មានពីក្រុមជនរងគ្រោះប៉ុណ្ណោះ ។
មកដល់ពេលនេះ ទោះបីប្រមុខរាជរដ្ឋាភិបាលមានបទបញ្ជាយ៉ាងតឹងរ៉ឹងហាមឃាត់ការធ្វើអាជីវកម្មព្រៃឈើគ្រប់ប្រភេទនិងទប់ស្កាត់ពលរដ្ឋខ្មែរមិនឱ្យឡើងភ្នំដងរែកយ៉ាងណាក្តី គេសង្កេតឃើញពលរដ្ឋខែ្មរនៅតែនាំគ្នាឡើងភ្នំដងរែកយ៉ាងគគ្រឹកគគ្រេងចូលទឹកដីសៀមកាប់ឈើគ្រញូងប្រថុយប្រថាននឹងសេចក្តីស្លាប់ដដែល ពីព្រោះឈ្មួញរកស៊ីឈើប្រណីតតាមជួរភ្នំដងរែកនិងទិញឈើគ្រញូងពីពួកគេនៅតែមាន ។ ប្រជាពលរដ្ឋខ្មែរនៅតំបន់នោះបានសំណូមពរទៅរាជរដ្ឋាភិបាលថា ពេលនេះ គួរតែវែកមុខរកឈ្មួញឈើប្រណីតទាំងឡាយដែលកំពុងឈរជើងចាំទិញក្នុងតំបន់នោះនាំខ្លួនទៅផ្តន្ទាទោសតាមផ្លូវ ច្បាប់តាមយន្តការរបស់រាជរដ្ឋាភិបាលដែលបានដាក់ចេញ បើពុំដូច្នេះទេពលរដ្ឋខែ្មរក្រីក្រ និងក្រុមអ្នកចំណាកស្រុកនៅតែប្រថុយនឹងសេចក្តីស្លាប់ជារៀងរាល់ថ្ងៃ ៕
ចែករំលែកព័តមាននេះ