រាជធានីភ្នំពេញ ៖ ដើម្បីត្រៀមស្វាគមន៍ការមកដល់នៃកំណើនភ្ញៀវទេសចរចិនសម្រាប់ឆ្នាំខាងមុខ រាជរដ្ឋាភិបាលកម្ពុជាបានដាក់ផែនការរៀបចំកែលម្អអាកាសយានដ្ឋានចំនួន៣កន្លែង ។ នេះបើយោងតាមការឲ្យដឹងពីមន្ត្រីរដ្ឋលេខាធិការដ្ឋានអាកាសចរស៊ីវិលកម្ពុជា ។
លោក ស៊ិន ចាន់សេរីវុត្ថា រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ថា រាជរដ្ឋាភិបាលបានរៀបចំផែនការពង្រីកគោលដៅអាកាសយានដ្ឋានដូចជា នៅភ្នំពេញ និងខេត្តព្រះសីហនុ ហើយបើភ្ញៀវចិនមានកំណើនខ្ពស់ថែមទៀតនោះ គឺគម្រោងស្ថាបនាព្រលានយន្តនៅស្រុកកណ្ដាលស្ទឹង ខេត្តកណ្ដាល នឹងចាប់ផ្ដើមសាងសង់ឡើងថែមទៀត ។
លោកបានបញ្ជាក់ថា ៖« កម្ពុជាមានទិសដៅទទួលភ្ញៀវទេសចរចិនឱ្យបាន២លាននាក់នៅក្នុងឆ្នាំ២០២០ខាងមុខ ក៏ប៉ុន្តែបើយោងតាមសន្ទុះភ្ញៀវទេសចរចិន ដែលមកលេងកម្ពុជាពេលបច្ចុប្បន្ន គឺអាចកើនលើសពីចំនួននេះទៅទៀត »។
លោក ឡៅ ហេង អគ្គនាយកក្រុមហ៊ុនទេសចរណ៍VLK បានមានប្រសាសន៍ថា អាកាសយានដ្ឋាននៅកម្ពុជា ពិសេសអាកាសយានដ្ឋានអន្តរជាតិភ្នំពេញ មានភាពចង្អៀត និងមិនអាចចុះចតយន្តហោះនៅពេលដំណាលគ្នាបានទេ ព្រោះកន្លែងចតយន្តហោះនៅមានកម្រិត ហើយអ្វីដែលក្រុមហ៊ុនវិនិយោគបារាំងបានធ្វើ គឺមានសភាពយឺតយ៉ាវ និងហាក់មានភាពសន្សំសំចៃ។
លោកបន្តថា ៖« នៅពេលខ្លះ យើងបានព្យាយាមទាក់ទាញអាកាសចរណ៍នានាមកចុះចត តែរកកន្លែងចតមិនបាន ដោយខាងក្រុមហ៊ុនវិនិយោគព្រលានយន្តហោះបានឲ្យទៅចុះចតនៅព្រលានកងកេង ខេត្តព្រះសីហនុក៏មាន »។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍ឲ្យដឹងថា សមត្ថភាពព្រលានយន្តហោះនៅភ្នំពេញ និងខេត្តសៀមរាបបច្ចុប្បន្នមានភាពសមស្រប បើធៀបនឹងទំហំកំណើមអ្នកដំណើរមកដល់កម្ពុជា ប៉ុន្តែសម្រាប់ព្រលានយន្តហោះក្រុងព្រះសីហនុ នៅមានទំហំតូចទាំងចំណតអ្នកដំណើរ និងកន្លែងទទួលភ្ញៀវ ដែលរាជរដ្ឋាភិបាលគួរវិនិយោគនិងកែលំអរបន្ថែមទៀត ។
លោកបន្តថា ៖« ប្រសិនជាមានការវិនិយោគបន្ថែមទៀត ពិតជាល្អប្រសើរដើម្បីទទួលអ្នកដំណើរ ព្រោះបើចាំពេលខ្វះទើបយើងពង្រីក វាមិនមែនជារឿងប្រសើរនោះទេ »។
ចក្ខុវិស័យរបស់កម្ពុជានៅក្នុងឆ្នាំ២០១៨នេះ នឹងរំពឹងទទួលបានទេសចរអន្តរជាតិប្រមាណ៦,២លាននាក់, នៅឆ្នាំ២០២០ ប្រមាណ៧លាននាក់ និងនៅឆ្នាំ២០៣០ នឹងទទួលបានទេសចរអន្តជាតិប្រមាណ១៥លាននាក់ នាំមកនូវចំណូលសរុបប្រមាណ១០.០០០លានដុល្លារ និងបង្កើតនូវឱកាសការងារប្រមាណ២លាននាក់។ ក្នុងនោះ ភ្ញៀវទេសចរចិនជាគោលដៅដ៏សំខាន់សម្រាប់កំណើនទេសចរណ៍របស់កម្ពុជា ។
ដើម្បីសម្រេចគោលដៅនេះ រាជរដ្ឋាភិបាលបានដាក់ចេញនូវគោលនយោបាយ និងផែនការយុទ្ធសាស្ត្រ ជាច្រើន ដើម្បីទាក់ទាញទេសចរចិន តាមរយៈការចេញសៀវភៅស និងការបង្កើតផ្ទះសំណាក់ប្រភេទHome stay តំបន់ទេសចរណ៍ធម្មជាតិ និងបាតសមុទ្រ ជាដើម ។
រដ្ឋលេខាធិការក្រសួងទេសចរណ៍ លោក ប៉ាក សុខុម បានមានប្រសាសន៍កន្លងមកថា បច្ចុប្បន្ន ទីផ្សារទេសចរចិនមានកំណើនយ៉ាងខ្លាំងនៅលើពិភពលោក ។ នៅឆ្នាំ២០២០ ភ្ញៀវទេសចរចិននឹងចេញកម្សាន្ដក្រៅប្រទេសប្រមាណ២០០លាននាក់ ឬច្រើនជាងនេះ ហើយអាចនឹងចំណាយប្រាក់ប្រមាណ៤២០ប៊ីលានដុល្លាអាមេរិក ។
លោកបន្ដថា ៖« នៅឆ្នាំ២០៣០ អ្នកទេសចរចិន នឹងចេញដើរកម្សាន្តនៅលើពិភពលោកប្រមាណ៣០០លាននាក់ទៅ៥០០លាននាក់ ហើយការចំណាយប្រាក់កើនដល់ប្រមាណ៨៥០ប៊ីលានដុល្លារអាមេរិក »។
យោងតាមរបាយការណ៍ក្រសួងទេសចរណ៍ ក្នុងឆ្នាំ២០១៧ កម្ពុជាបានទទួលភ្ញៀវទេសចរអន្តរជាតិចំនួន៥,៦លាននាក់ កើនឡើង១១,៨% ក្នុងនោះមានភ្ញៀវទេសចរចិនចំនួន១.២១០.៧៨២នាក់ កើនឡើង៤៥,៩% ឈរក្នុងលំដាប់ថ្នាក់លេខ១នៃទីផ្សារទេសចរណ៍សំខាន់ៗទាំង១០ ។ ដោយឡែកក្នុងរយៈពេលឆមាសទី១ឆ្នាំនេះ កម្ពុជាទទួលបានភ្ញៀវទេសចរអន្តរជាតិជាង៣លាននាក់ ក្នុងនោះភ្ញៀវទេសចរចិនស្ថិតនៅលំដាប់លេខរៀងទី១ មានចំនួន៩៣១.៧៦៣នាក់ ស្មើនឹង៣១%នៃចំនួនសរុប កើនឡើង៧៥,៨% ៕
ចែករំលែកព័តមាននេះ