លែងមានអ្នកណាចង់ទៅលេងខេត្តព្រះសីហនុទៀតហើយព្រោះចិនគ្រប់គ្រងចង់អស់
- ព្រះសីហនុ
ខេត្តព្រះសីហនុ ៖ ម្ចាស់តូបលក់ម្ហូបអាហារនៅតាមបណ្តោយឆ្នេរអូរឈើទាល និងអ្នកប្រកបរបររែកអម្រែកលក់មឹកអាំងតាមបណ្តោយឆ្នេរសមុទ្រសុំមិនបញ្ចេញឈ្មោះបានត្អូញត្អែរឲ្យដឹងដូចៗគ្នាថា មួយរយៈពេលចុងក្រោយថ្មីៗនេះបន្ទាប់ពីលំហូរចូលនៃជនជាតិចិនដ៏សន្ធឹកសន្ធាប់មកធ្វើការវិនិយោគលើវិស័យផ្សេងៗជាច្រើនមុខក្នុងនោះក៏មានជនជាតិចិនយ៉ាងច្រើនបានមកជួលផ្ទះសំណាក់ ឬសណ្ឋារគារ រមណីយដ្ឋាន និងជួលតូបនៅតាមតំបន់ឆ្នេរកំសាន្តប្រកបរបរលក់ដូរស្ទើរទាំងអស់នៅក្នុងខេត្តព្រះសីហនុ ដែលជាហេតុធ្វើឲ្យប៉ះពាល់ដល់ការប្រកបរបរតូចតាចរែកអម្រែកលក់របស់ខ្មែរយើងនៅតាមឆ្នេរកំសាន្តដោយសារតែការធ្លាក់ចុះនៃចំនួនភ្ញៀវទេសចរណ៍ជាតិ និងអន្តរជាតិឈប់មកកំសាន្ត…
មួយវិញទៀតដោយសារតែការលំហូរចូលនៃជនជាតិចិនមានការកើនឡើងជាបន្តបន្ទាប់បង្ករឲ្យមានការកកស្ទះចរាចរណ៍ជាប្រចាំដែលជាប្រភពដើមចមប៉ះពាល់ដល់អារម្មណ៍ភ្ញៀវទេសចរណ៍ជាតិ អន្តរជាតិ ដែលធ្វើដំណើរចូលមកកំសាន្តនៅតាមតំបន់ឆ្នេរ និងរមណីយដ្ឋាននានាដែលជាកន្លែងកម្សាន្តនៅក្នុងខេត្តលែងចង់មកកំសាន្តបន្តទៀតធ្វើឲ្យតំបន់ឆ្នេរ និងរមណីយដ្ឋាននានានៅក្នុងក្រុងព្រះសីហនុ មានសភាពស្ងប់ស្ងាត់ប្លែកខុសពីឆ្នាំមុនៗគួរឲ្យកត់សំគាល់ ។
ដោយឡែកអាជីវករដែលបានជួលខ្ចូសពីក្រុមហ៊ុន ស៊ាង ឈុនហេង ចំនួន០៨ខ្ចូស(តូប)នៅបណ្តោយឆ្នេរឯករាជ្យឆ្នេរសណ្ឋារគារ(៧ជាន់)មកទល់ពេលនេះកំពុងតែនាំព្រួយបារម្ភពីការបាត់បង់មុខបរបរលក់ដូររបស់ខ្លួនដែរ ខណៈតំណាងក្រុមហ៊ុនខាងលើបានជូនដំណឹងថា ឈប់បន្តការជួលខ្ចូស(តូប)ឲ្យអាជីវករលក់ដូរបន្តទៀតហើយ ទៅតាមពេលវេលាកំណត់នៃការចុះហត្ថលេខាដែលត្រូវបញ្ចប់នៅថ្ងៃទី០១ ខែមករា ឆ្នាំ២០២០ ខាងមុខនេះ ។
ពួកគាត់បានបន្តឲ្យដឹងថា ដោយសារតែខ្ចូសដែលក្រុមហ៊ុនខាងលើបានជួលឲ្យពួកគាត់កន្លងមកស្ថិតនៅជាប់នឹងអគារដែលក្រុមហ៊ុន ស៊ាង ឈុនហេង បានសាងសង់លើដីឆ្នេរឯករាជ្យហើយបានជួលទៅឲ្យជនជាតិចិនក្នុង១ខែមានតម្លៃរហូតដល់ទៅ៧០០០០ ដុល្លារក្នុងរយៈពេលប្រមាណជាង១០ឆ្នាំ ។
ពួកគាត់បានបន្តឲ្យដឹងបន្ថែមទៀតថា ដូច្នេះក្រោយពីបញ្ចប់ទៅតាមការកំណត់ខាងលើក្រុមហ៊ុន ស៊ាង ឈុនហេង និងមានគម្រោងជួលខ្ចូស(តូប)ខាងលើឲ្យទៅចិនដែលកំពុងតែដំណើរការសាងសង់សណ្ឋារគារក្បែរនោះក្នុងតម្លៃខ្ពស់ដែលអាជីវករដូចពួកគាត់មិនមានសមត្ថភាពដូចជនជាតិចិន ៕
ចែករំលែកព័តមាននេះ