រាជធានីភ្នំពេញ ៖ ក្រុមការងារឯកជនផ្នែកវិស័យទេសចរណ៍ បានបង្ហាញការគាំទ្រចំពោះការវិនិយោគសាងសង់ព្រលានយន្តហោះ ជាលើកដំបូងនៅទីក្រុងប៉ោយប៉ែត ដែលវិនិយោគដោយក្រុមហ៊ុន Poipet Airport Investment ។…
រាជធានីភ្នំពេញ ៖ ក្រុមការងារឯកជនផ្នែកវិស័យទេសចរណ៍ បានបង្ហាញការគាំទ្រចំពោះការវិនិយោគសាងសង់ព្រលានយន្តហោះ ជាលើកដំបូងនៅទីក្រុងប៉ោយប៉ែត ដែលវិនិយោគដោយក្រុមហ៊ុន Poipet Airport Investment ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឲ្យដឹងតាមទូរស័ព្ទនាព្រឹកថ្ងៃទី២២ តុលា ម្សិលមិញថា ការវិនិយោគគម្រោងនេះពិតជាល្អ ព្រោះវាផ្តល់ជម្រើសការធ្វើដំណើរច្រើន សម្រាប់ប្រជាពលរដ្ឋ និងភ្ញៀវទេសចរ ដោយសារការធ្វើដំណើរតាមផ្លូវគោកពីរាជធានីភ្នំពេញ ទៅកាន់ប៉ោយប៉ែត ចំណាយពេល៥ទៅ៦ម៉ោង ។ ហេតុនេះ ប្រសិនជាមានព្រលានយន្តហោះនេះ នឹងកាត់បន្ថយពេលវេលាសម្រាប់ការធ្វើដំណើរ ដោយប្រជាជនអាចចេញពីប៉ោយប៉ែត តាមរថយន្តទៅក្រុងបាងកកបរទេសថៃ ចំណាយពេលត្រឹមតែ៣ទៅ៤ម៉ោងប៉ុណ្ណោះ ប៉ុន្តែបើធ្វើដំណើរតាមរថយន្តពីក្រុងភ្នំពេញ ពួកគេអាចចំណាយពេលពេញមួយថ្ងៃ ។ លោកស្រីបន្តថា ៖« ក្រៅពីភ្ញៀវក្នុងស្រុក ព្រលាននេះអាចតភ្ជាប់ជាមួយព្រលានខេត្តសៀម រាប ភ្នំពេញ និងខេត្តព្រះសីហនុ ដែលអាចផ្តល់ឲ្យភ្ញៀវទេសចរមានជម្រើសច្រើន និងចំណាយពេលវេលាតិចទៅកាន់គោលដៅនានាផងដែរ »។ លោកស្រីបន្ថែមថា ៖« បច្ចុប្បន្ន ក្រុងប៉ោយប៉ែតមានតែសណ្ឋាគារ និងកាស៊ីណូ ហេតុនេះភ្ញៀវអាចទទួលបានផលិតផលពីរ គឺការកម្សាន្តបែបស៊ីវិល័យ និងវប្បធ៌ម តាមរយៈការកាត់បន្ថយពេលវេលាក្នុងការធ្វើដំណើរ »។
ជាការលើកឡើងស្រដៀងគ្នានេះដែរ លោក ហូ វណ្ឌី ទីប្រឹក្សាសមាគមនេះ និងជាទីប្រឹក្សាសភាពាណិជ្ជកម្មកម្ពុជា បានមានប្រសាសន៍ថា គម្រោងសាងសង់ព្រលាននេះពិតជាល្អ វានឹងជួយកាត់បន្ថយពេលវេលាក្នុងការធ្វើដំណើរ ដែលអាចតភ្ជាប់ជាមួយព្រលានយន្តហោះក្នុងស្រុក ពិសេសអាចជួយឲ្យប្រជាពលរដ្ឋខ្មែរធ្វើដំណើរទៅប្រទេសថៃ ដោយមិនចំណាយពេលច្រើន ព្រោះបច្ចុប្បន្នប្រជាជនកម្ពុជា ជាង១លាននាក់បានចេញដើរកម្សាន្ដ ទៅពិនិត្យសុខភាព និងទៅធ្វើជំនួញនៅប្រទេសថៃក្នុង១ឆ្នាំ ។ លោកបន្តថា ៖« ប្រសិនជាព្រលាននេះមានសមត្ថភាពអាចតភ្ជាប់ជាមួយព្រលានក្នុងស្រុកដទៃទៀត ពិតជាប្រសើរណាស់ ដើម្បីផ្តល់ជម្រើសធ្វើដំណើរ ក៏ដូចជាគោលដៅដើរកម្សាន្ដរបស់ភ្ញៀវអន្តរជាតិបន្ថែមទៀត »។
បើតាមអ្នកនាំពាក្យរដ្ឋលេខាធិកាតរដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានឲ្យដឹងថា ព្រលាននេះគ្រោងចំណាយទឹកប្រាក់វិនិយោគចន្លោះពី៤០ទៅ៥០លានដុល្លារអាមេរិក ដើម្បីសាងសង់ឡើង ដែលព្រលាននេះបានសាងសង់លើកដំបូងនៅអំឡុងឆ្នាំ២០០៧ ប៉ុន្តែបានពន្យារពេលរហូតមកទល់ពេលនេះ ។ លោកបន្តថា តាមគម្រោង ព្រលាននេះនឹងសាងសង់ឡើងវិញនៅពេលឆាប់ៗដែលមានទំហំព្រលានប្រមាណជាង១០០ហិកតា ។ លោកបញ្ជាក់ថា ៖« ព្រលាននេះបានទទួលការឯកភាពជាគោលការណ៍ពីរាជរដ្ឋាភិបាលអនុញ្ញាតឲ្យសាងសង់ឡើងវិញរួចហើយ »។
បច្ចុប្បន្ន ក្រុងប៉ោយប៉ែត មានមនុស្សរស់នៅជាង២០ម៉ឺននាក់ ដែលរួមបញ្ចូលជាមួយជនបរទេស ពិសេសអ្នកវិនិយោគ និងប្រជាជនចិន បានចូលទៅកាន់ទីក្រុងនេះច្រើន ដែលបានធ្វើឲ្យតម្លៃដីធ្លី និងអចលនទ្រព្យក្នុងទីក្រុងនេះកើនឡើងយ៉ាងគំហុកក្នុងប៉ុន្មានឆ្នាំចុងក្រោយនេះ ។
ទន្ទឹមនឹងនេះ ក្រុងប៉ោយប៉ែត ក៏ជាតំបន់សក្ដានុពលសេដ្ឋកិច្ចដ៏សំខាន់មួយរបស់កម្ពុជាផងដែរ ពិសេសច្រកទ្វារអន្តរជាតិប៉ោយប៉ែត ដែលជាច្រកនាំចេញនាំចូលទំនិញដ៏សំខាន់របស់កម្ពុជា ព្រមទាំងមានតំបន់សេដ្ឋកិច្ចពិសេសជាច្រើនទៀតដូចជា តំបន់សេដ្ឋកិច្ចពិសេស ប៉ោយប៉ែត-អូរនាង ( POSEZ – Poipet Oneang Special Economic Zone) , តំបន់សេដ្ឋកិច្ចពិសេស សានកូ (Sanco Poipet Special Economic Zone) និងតំបន់សេដ្ឋកិច្ចពិសេសមួយទៀតដែលជាបុត្រសម្ព័ន្ធរបស់ក្រុមហ៊ុនសេដ្ឋកិច្ចពិសេសភ្នំពេញ (PPSEZ) ៕
ចែករំលែកព័តមាននេះ