ខេត្តពោធិ៍សាត់ ៖ កាលពីវេលាម៉ោង១០ និង២០នាទីព្រឹក ថ្ងៃទី២២ ខែតុលា ឆ្នាំ២០១៨នេះ មានករណីអគ្គិភ័យឆេះផ្ទះមួយកន្លែងបានកើតឡើង បណ្ដាលឲ្យផ្ទះមួយខ្នងក្លាយជាផេះផង់ និងបាត់បង់ទ្រព្យសម្បត្តិមួយចំនួនធំ ប៉ុន្តែមិនបណ្ដាលឲ្យមានគ្រោះថ្នាក់ដល់អាយុជីវិតមនុស្សទេ។ គ្រោះអគ្គិភ័យនេះបានកើតឡើងនៅភូមិរវៀង ឃុំសំរោង ស្រុកភ្នំក្រវាញ ធ្វើឲ្យមានការភ្ញាក់ផ្អើលទាំងព្រឹក ដល់ប្រជាពលរដ្ឋក្នុងភូមិ អ្នកធ្វើដំណើរឆ្លងកាត់ អាជ្ញាធរមូលដ្ឋាន និងសមត្ថកិច្ចនានា។
បន្ទាប់ពីទទួលបានព័ត៌មាននេះភ្លាមលោកវរៈសេនីយ៍ឯក តាន់ គារិទ្ធ អធិការនគរបាលស្រុកភ្នំក្រវាញ បានដឹកនាំកម្លាំងជំនាញអធិការដ្ឋាន និងប៉ុស្តិ៍រដ្ឋបាលសំរោង យករថយន្ដពន្លត់អគ្គីភ័យមួយគ្រឿងទៅ ជួយបាញ់ទឹកពន្លត់ និងមានការជួយអន្តរាគមន៍ពីរថយន្ដដឹកទឹកឯកជនរបស់ប្រជាពលរដ្ឋផងដែរ។ លោកអធិការឲ្យដឹងថា ក្នុងប្រតិបត្តិការនេះយើងប្រើទឹកអស់ចំនួន០៧រថយន្ដ ទើបរលត់ជាស្ថាពរ ក្នុងនោះទឹករបស់ថយន្ដអធិការដ្ឋាននគរបាលស្រុកចំនួនចំនួន០២រថយន្ដ និងទឹករបស់រថយន្ដឯកជន ចំនួន០៥រថយន្ដ។
ផ្ទះដែលបានក្លាយជាចំណីអគ្គីភ័យនេះមានទំហំ០៦ម៉ែត្រ គុណនឹង០៨ម៉ែត្រ ថ្មក្រោម ឈើលើ ប្រក់ក្បឿង ក្រាលក្តារ ជញ្ជាំងក្តារ របស់ប្រជាពលរដ្ឋឈ្មោះ មាន ផា ភេទប្រុស អាយុ៤៨ឆ្នាំ ប្រពន្ធឈ្មោះ ចៅ រីម អាយុ៤៦ឆ្នាំ រស់នៅភូមិ រវៀង ឃុំសំរោង ស្រុកភ្នំក្រវាញនោះ។ ទំហំនៃការខូចខាត គឺឆេះមួយកំណាត់លើទាំងស្រុង នៅសល់តែជញ្ជាំងថ្ម និងក្រាលការ៉ូខាងក្រោមតែប៉ុណ្ណោះ។
ចំណែកទ្រព្យសម្បត្តិដែលមានក្នុងផ្ទះទាំងប៉ុន្មានក៏ត្រូវរលាយខ្ទេចខ្ទីគ្មានសល់ដែរ ក្នុងនោះមានទូរឈើចំនួន ០១ គ្រែឈើចំនួន០៤ និងសម្ភារប្រើប្រាស់សំខាន់ៗមួយចំនួនទៀត។ ម្ចាស់ផ្ទះ និងអ្នកជិតខាងបានឃើញ ភ្លើងចាប់ផ្ដើមឆេះពីលើដំបូលមុនគេត្រង់ចំណុចផ្ទាំងសូឡា រួចហើយបានរាលឆេះកាន់តែធំឡើងៗ រហូតគ្របដណ្ដប់ផ្ទះទាំងមូលតែម្ដង។ ករណីនេះសមត្ថកិច្ចបានសន្និដ្ឋានថា បណ្ដាលមកពីឆ្លងចរន្ដអគ្គិសនីពីផ្ទាំងសូឡានោះ៕
ចែករំលែកព័តមាននេះ