រាជធានីភ្នំពេញ ៖ ការអភិវឌ្ឍវិស័យសំណង់នៅកម្ពុជានៅតែបន្ដមានកំណើនខ្លាំង ជាពិសេសទៅលើអគារខ្ពស់ៗ ក្នុងនោះរាជធានីភ្នំពេញមានសកម្មភាពខ្លាំងជាងគេ និងមានវិនិយោគិនអន្តរជាតិចាប់អារម្មណ៍ខ្លាំងជាងគេ បើធៀបនឹងតំបន់ពោលសេដ្ឋកិច្ចសំខាន់ៗពីរទៀត គឺខេត្តព្រះសីហនុ និងខេត្តសៀមរាប ។…
រាជធានីភ្នំពេញ ៖ ការអភិវឌ្ឍវិស័យសំណង់នៅកម្ពុជានៅតែបន្ដមានកំណើនខ្លាំង ជាពិសេសទៅលើអគារខ្ពស់ៗ ក្នុងនោះរាជធានីភ្នំពេញមានសកម្មភាពខ្លាំងជាងគេ និងមានវិនិយោគិនអន្តរជាតិចាប់អារម្មណ៍ខ្លាំងជាងគេ បើធៀបនឹងតំបន់ពោលសេដ្ឋកិច្ចសំខាន់ៗពីរទៀត គឺខេត្តព្រះសីហនុ និងខេត្តសៀមរាប ។
បើតាមលោក សន សៀប នាយកគ្រប់គ្រងក្រុមហ៊ុនអចលនទ្រព្យ ឃី រៀលអ៊ីស្ទេត បានឲ្យដឹងថា បច្ចុប្បន្ន ការវិនិយោគវិស័យសំណង់ក្នុងប្រទេសកម្ពុជា មានប៉ូលសេដ្ឋកិច្ច២ដែលផុសផុលជាងគេ គឺភ្នំពេញ និងខេត្តព្រះសីហនុ ហើយបើមើលនឹងភ្នែកគេវាយតម្លៃថា ខេត្តព្រះសីហនុ មានការវិនិយោគច្រើនជាងភ្នំពេញ ប៉ុន្តែជាក់ស្ដែង ការវិនិយោគវិស័យសំណង់នៅភ្នំពេញមានគម្រោងច្រើនជាងគេ ក្នុងចំណោមតំបន់ប៉ូលសេដ្ឋកិច្ចសំខាន់ៗទាំងបីរបស់កម្ពុជា ។
លោកមានប្រសាសន៍ថា ៖« ភ្នំពេញមានសក្ដានុពលធំទូលាយ និងស្ទើរតែទូទាំងរាជធានី។ ដូចនេះ ការវិនិយោគ ការសាងសង់សំណង់ទាំងអគារខ្ពស់ និងសំណង់លំនៅឋាននៅតែមានការចាប់អារម្មណ៍ពីសំណាក់វិនិយោគិនទាំងក្នុងនិងក្រៅប្រទេស »។
លោកបន្តថា បច្ចុប្បន្ននេះ តាមសង្កេតនិងការសិក្សាឃើញថា គម្រោងវិនិយោគវិស័យសំណង់នៅកម្ពុជាភាគច្រើនជាងគម្រោងវិនិយោគដោយវិនិយោគិនក្នុងស្រុក ហើយបើនិយាយពីគម្រោងវិនិយោគិនក្រៅប្រទេសវិញ ឃើញថាជនជាតិចិនមានចំណែកច្រើនជាងគេ បន្ទាប់មក កូរ៉េ ជប៉ុន សិង្ហបុរី ជាដើម ហើយសក្ដានុពលនៅពេលអនាគត កម្ពុជានៅតែមានទីផ្សារសម្រាប់ការវិនិយោគដដែល ទាំងខុនដូ អគារការិយាល័យ បុរីលំនៅឋាន ជាដើម ។
លោកបានផ្ដល់ជាយោបល់ថា ក្នុងនាមជាអ្នកជំនាញ និងបានធ្វើការលើវិស័យនេះជាច្រើនឆ្នាំមកហើយនោះ សូមឲ្យអ្នកវិនិយោគត្រូវចេះថ្លឹងថ្លែង និងពិចារណាឲ្យបានច្បាស់ មុននឹងសម្រេចចិត្តវិនិយោគ និងសូមឲ្យវិនិយោគទៅតាមជំនាញ និងចំណេះរបស់ខ្លួន ជាជាងការវិនិយោគដោយធ្វើទៅតាមគ្នីគ្នា ឬមិនមានភាពច្បាស់លាស់ចំពោះខ្លួនឯង ។
រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ឡៅ ទិព្វសីហា បានមានប្រសាសន៍ថា វិស័យសំណង់បានរួមចំណែកសំខាន់មួយក្នុងការទ្រទ្រង់កំណើនសេដ្ឋកិច្ចជាតិ បន្ទាប់ពីវិស័យឧស្សាហកម្ម កសិកម្ម និងទេសចរណ៍ ដែលធ្វើឲ្យសេដ្ឋកិច្ចជាតិទាំងមូលរក្សាបានប្រមាណ៧%ក្នុង១ឆ្នាំ ។
លោកបញ្ជាក់ថា ៖« ក្នុងរយៈពេល៩ខែដើមឆ្នាំ២០១៨នេះ ក្រសួងរៀបចំដែនដីនគរូបនីយកម្ម និងសំណង់បានចេញលិខិតអនុញ្ញាតគម្រោងសាងសង់សរុបចំនួន២.៥៤១គម្រោង ដែលមានផ្ទៃសរុបជាង១០លានម៉ែត្រការ៉េ ក្នុងនោះមានទុនវិនិយោគប្រមាណ ៤.៨២០លានដុល្លារអាមេរិក » ។
លោកបន្តថា ថ្មីៗនេះ ខេត្តព្រះសីហនុត្រូវបានគេមើលឃើញថា មានការវិនិយោគច្រើនលើសំណង់ ក៏ប៉ុន្តែបើផ្អែកតាមតួលេខជាក់ស្ដែង គម្រោងវិនិយោគនៅភ្នំពេញ នៅតែនាំមុខគេដដែល ពោលគឺមានសកម្មភាពវិនិយោគខ្លាំងជាងខេត្តពីរទៀតដែលកំពុងមានភាពប្រកួតប្រជែង គឺខេត្តព្រះសីហនុ និងខេត្តសៀមរាប ។
លោកបន្ថែមថា ការអភិវឌ្ឍវិស័យសំណង់ ក្នុងប្រទេសកម្ពុជា បានផ្ដល់ប្រយោជន៍ច្រើនដល់ព្រះរាជាណាចក្រកម្ពុជា ក្នុងនោះបានលើកមុខមាត់ការអភិវឌ្ឍប្រទេសជាតិទាំងមូល ហើយឧស្សាហកម្មសំណង់នេះដែរ បានផ្ដល់ការងារដល់ពលរដ្ឋខ្មែរជាច្រើន។ ជាក់ស្ដែងវិស័យសំណង់បានស្រូបទាញកម្លាំងពលកម្មប្រមាណពី២០ម៉ឺន ទៅ២២ម៉ឺននាក់ក្នុង១ថ្ងៃ ដើម្បីរកប្រាក់ចំណូលសម្រាប់ចិញ្ចឹមគ្រួសារ ៕
ចែករំលែកព័តមាននេះ