ខេត្តកណ្តាល ៖ ចាប់ផ្តើមកក្រើកទៀតហើយនៅក្រុងតាខ្មៅ ខណៈចោរមួយក្រុមបានធ្វើសកម្មភាពចូលលួចកាត់សោលួចយករថយន្ត មួយគ្រឿងម៉ាក Camry បាឡែន បានសម្រេចដោយសុវត្ថិភាព ។ ហេតុការណ៍នេះបានកើតឡើងនៅថ្ងៃទី២០ ខែតុលា ឆ្នាំ០១៨ ម៉ោង១២និង៤០នាទីយប់រំលងអធ្រាត្រ ចំណុចមុខផ្ទះជនរងគ្រោះអាហារដ្ឋានស្រីពេជ្រជាប់ផ្លូវ១១៥ភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
ជនរងគ្រោះឈ្មោះ ខុន សេងហ៊ាន ភេទស្រី អាយុ៤០ឆ្នាំ មុខរបរលក់ដូរ ទីលំនៅកន្លែងកើតហេតុ ។ ជនល្មើស២នាក់ ភេទប្រុស អាយុប្រហែល៤០ឆ្នាំ កំពស់ប្រហែល១.៧៥cm (គេចខ្លួន) បាត់រថយន្តមួយគ្រឿងម៉ាក Camry បាឡែន ពណ៌ស ស៊េរីឆ្នាំ២០០៣ ផ្លាកលេខ ភ្នំពេញ ២AR-០២១១ (កង់ស្ព័រពណ៌ខ្មៅ) ។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានអោយដឹងថា មុនពេលកើតហេតុជនរងគ្រោះបានចតរថយន្តទុកនៅខាងមុខផ្ទះរបស់ខ្លួន(ហាងស្រីពេជ្រ) ដោយចាក់សោរបងសំណាញ់ព័ទ្ធជុំវិញជារៀងរាល់យប់ ។
លុះមកដល់វេលាកើតហេតុខាងលើ តាមរយៈកាមេរ៉ាសុវត្ថិភាពមានជនសង្ស័យ២នាក់ដូចមានភិនភាគខាងលើ បាននាំគ្នាធ្វើសកម្មភាពកាត់សោទ្វារបងចូលលួចយករថយន្តខាងលើជិះចេញតាមផ្លូវ១១៥ទៅទិសខាងលិចបាត់តែម្តង នៅពេលនេះកម្លាំងកំពុងស្រាវជ្រាវជនល្មើសចាប់យកមកផ្តន្តាទោសតាមផ្លូវច្បាប់ ៕
ចែករំលែកព័តមាននេះ