ខេត្តកំពង់ស្ពឺ ៖ ព្រឹកថ្ងៃទី១៩ ខែតុលា សមត្ថកិច្ចនិងមន្ត្រីជំនាញពាក់ព័ន្ធបានញាប់ដៃញាប់ជើងគ្រប់គ្នា ក្នុងការជួយកម្មការិនី ដែលដួលសន្លប់នៅរោងចក្រវីងស្តារ៍ស៊ូ ស្ថិតនៅតាមផ្លូវជាតិលេខ៣ ក្នុងភូមិអង្គសុគន្ធា ឃុំមហាឫស្សី…
ខេត្តកំពង់ស្ពឺ ៖ ព្រឹកថ្ងៃទី១៩ ខែតុលា សមត្ថកិច្ចនិងមន្ត្រីជំនាញពាក់ព័ន្ធបានញាប់ដៃញាប់ជើងគ្រប់គ្នា ក្នុងការជួយកម្មការិនី ដែលដួលសន្លប់នៅរោងចក្រវីងស្តារ៍ស៊ូ ស្ថិតនៅតាមផ្លូវជាតិលេខ៣ ក្នុងភូមិអង្គសុគន្ធា
ឃុំមហាឫស្សី ស្រុកគងពិសី ។
ប្រភពពីសមត្ថកិច្ចបានឱ្យដឹងថា មានកម្មករ-កម្មការិនីជិត១០០នាក់បានដួលសន្លប់ ក្រោយពីមានអាការភិតភ័យ ខណៈកម្មការិនីម្នាក់ឈ្មោះយ៉េង សុីឌីម អាយុ៣៤ឆ្នាំ ធ្វើការនៅក្រុមH8 ដែលទើបតែនឹងចូលធ្វើការ កាលពីថ្ងៃទី២៥ ខែកញ្ញាកន្លងទៅ សង្ស័យមានជំងឺប្រចាំកាយបានស្រែកឡូឡាខ្លាំងៗ ។ ពេលនោះ ស្រាប់តែកម្មករដទៃទៀតដែលនៅក្បែរមានអារម្មណ៍ភិតភ័យ ដោយអ្នកខ្លះរត់ចេញមកក្រៅ និងអ្នកខ្លះមានអាការងងឹតមុខ ក៏ទន់ដៃទន់ជើងដួលសន្លប់ ។
ប្រភពដដែលឲ្យដឹងទៀតថា ក្នុងហេតុការណ៍នេះដែរ ក៏បានការជួយសម្របសម្រួលសង្គ្រោះបឋមពីក្រុមសន្ដិសុខយាមក្រុមហ៊ុន កងកម្លាំងនគរបាលប៉ុស្តិ៍ស្រុក និងមានមន្ដ្រីអាជ្ញាធរពាក់ព័ន្ធជាច្រើន ជួយបញ្ជូនបងប្អូនកម្មករទៅកាន់គ្លីនិក និងមួយចំនួនទៀតបញ្ជូនទៅមន្ទីរពេទ្យបង្អែកស្រុកគងពិសី ។
តាមលោកវរសេនីយ៍ឯក ឃឹម សុផាន់រ៉ាអធិការនគរបាលស្រុកគងពិសីថា កម្មករដែលបានបញ្ជូនទៅមន្ទីរពេទ្យបង្អែក និងគ្លីនិកមានចំនួនជិត១០០នាក់ ។ ការសន្លប់មានចំនួនច្រើននេះ គឺពេលមានការឆោឡោក្នុងរោងចក្រកម្មការិនីខ្លះបានជួយគ្រាហ៍អ្នកដែលមានអាការធ្ងន់រហូតទៅដល់ពេទ្យ នាងវិលមុខក៏សម្រាកនៅមន្ទីរពេទ្យតែម្ដង ។
ទោះបីជាបែបណា កម្មករកម្មការិនីទាំងអស់នេះ មានអាការធូរស្រាលវិញហើយ និងមិនមានគ្រោះថ្នាក់ដល់អាយុជីវិតទេ ។ តាមព័ត៌មានថា នៅរោងចក្រមួយនេះ មានកម្មករនិយោជិតចំនួន១ម៉ឺននាក់ ៕
ចែករំលែកព័តមាននេះ