មនុស្សដែលមានសន្តានចិត្តល្អ តើជាប្រភេទមនុស្សដូចម្តេច? គឺជាមនុស្សដែលចេះទូន្មានខ្លួនឯង ប្រដៅខ្លួនឯងបានល្អហើយ ព្រមដោយចងចិត្តជាបុណ្យកុសលផង ។ ការចែកបុណ្យកុសលឱ្យដល់អ្នកដទៃ គឺជាការប្រដៅចិត្តមួយផ្នែក ដើម្បីកុំឱ្យចិត្តគិតបានអ្វីៗតែខ្លួនឯង ត្រូវចេះបែងចែករបស់ទ្រព្យឱ្យអ្នកដទៃ…
មនុស្សដែលមានសន្តានចិត្តល្អ តើជាប្រភេទមនុស្សដូចម្តេច? គឺជាមនុស្សដែលចេះទូន្មានខ្លួនឯង ប្រដៅខ្លួនឯងបានល្អហើយ ព្រមដោយចងចិត្តជាបុណ្យកុសលផង ។
ការចែកបុណ្យកុសលឱ្យដល់អ្នកដទៃ គឺជាការប្រដៅចិត្តមួយផ្នែក ដើម្បីកុំឱ្យចិត្តគិតបានអ្វីៗតែខ្លួនឯង ត្រូវចេះបែងចែករបស់ទ្រព្យឱ្យអ្នកដទៃ ទូន្មានចិត្តឱ្យចេះអើពើក្នុងអំពើល្អដោយយកចិត្តទុកដាក់ ការជូនបុណ្យគឺជូនដោយចិត្តមេត្តា ដោយចិត្តទន់ភ្លន់ ជូនដើម្បីឱ្យអ្នកដទៃបានបុណ្យពិតៗដោយការអនុមោទនា ។
ចំណែកការអនុមោទនាបុណ្យកុសលដែលអ្នកដទៃបានធ្វើ ឬបានជូនហើយនោះ ក៏ជាការប្រដៅចិត្តមួយផ្នែកទៀតកុំឱ្យចិត្តរឹងរូស ប្រកាន់ទិដ្ឋិមានះ លើកកម្ពស់ខ្លួនឯងដូចដងទង់ គឺធ្វើឱ្យចិត្តទន់ភ្លន់ស្ងប់ស្ងាត់ កម្ចាត់ការប្រកាន់ខ្លួន ចេះមើលឃើញបុណ្យកុសលជាធំជាងទ្រព្យសម្បត្តិមាសប្រាក់ក្នុងលោក ប្រដៅទូន្មានចិត្តឱ្យស្គាល់គុណតម្លៃនៃសេចក្តីល្អ ចេះជ្រះថ្លាក្នុងបុណ្យកុសលរបស់អ្នកដទៃ ឃើញអ្នកដទៃដែលមានសេចក្តីល្អផ្សេងៗ ថាជាអ្នកមានគុណ គឺមានគុណចំពោះខ្លួនយើងផង ចំពោះអ្នកដទៃច្រើនផង ចំពោះសាសនាផង កាលដែលអ្នកដទៃនោះជាអ្នកមានសទ្ធា មានសីល មានចាគៈជាដើម ។
ត្រូវទូន្មានចិត្តឱ្យចេះដឹងគុណ អ្នកដទៃ កុំបំភ្លេច កុំលុបបំបាត់ចោលនូវគុណ គឺសេចក្តីល្អ របស់អ្នកដទៃ ព្រោះហេតុនេះ ចិត្តត្រូវតែយល់ដល់អំពើល្អគ្រប់យ៉ាង ដោយមិនប្រកាន់ឫកពា ចើងម៉ើងឆ្មើងឆ្មៃ មើលងាយ ឬខឹងក្រោធ ជាមួយអ្នកដទៃឡើយ មនុស្សល្អម្នាក់អាចឱ្យការរស់នៅ និងសេចក្តីសុខដល់អ្នកដទៃច្រើននាក់ណាស់ក្នុងមួយថ្ងៃៗ។
ដូច្នេះគួរប្រមូលមនុស្សល្អទាំងនោះ ឱ្យមកជាខ្លួនយើងតែម្នាក់ ដោយការអនុមោទនាជ្រះថ្លា ត្រេកអរនូវអំពើល្អ ដែលអ្នកដទៃមាន ជួនកាលអំពើល្អនោះ យើងមិនអាចធ្វើបានផង។ តើគួររឹងរូសខឹងប្រកែកឈ្លោះ ឬក៏ត្រូវប្រដៅចិត្តឱ្យស្លូតបូត ហើយជ្រះថ្លាទទួលយកនូវបុណ្យកុសលដោយ ការអនុមោទនាវិញ ?
ម្យ៉ាងវិញទៀត បើយើងសម្លឹងមើលគុណគឺសេចក្តីល្អរបស់អ្នកដទៃ ហើយឱ្យតម្លៃយ៉ាងថ្លៃពិតៗ រមែងកម្ចាត់នូវចិត្តអាក្រក់របស់យើង ដែលធ្លាប់មានការមើលងាយអ្នកដទៃ ដោយអាងទ្រព្យសម្បត្តិ វង្សត្រកូល ចំណេះដឹងជាដើមបានផងដែរ ។
ចែករំលែកព័តមាននេះ