ខេត្តរតនគិរី ៖ ស្ត្រីម្នាក់ត្រូវប្តីរបស់ខ្លួនតាមឃ្លាំមើលគ្រប់ដំណើរ និងសកម្មភាព ទើបបែកធ្លាយលេចចេញឈុតឆាកស្នេហាត្រីកោណលួចលាក់ជាមួយនឹងកូនជាងសិប្បកម្មរបស់ប្តីខ្លួន ហើយត្រូវបម្លាំងប៉ុស្តិ៍អូរចេង ឃាត់ខ្លួនមកសួរនាំ។ ហេតុការណ៍នេះកើតឡើងកាលពីម៉ោង៨ យប់ ថ្ងៃទី១៦ ខែតុលា ឆ្នាំ២០១៨ ស្ថិតនៅភូមិអូរកន្ទិល សង្កាត់បឹងកន្សែង ក្រុងបានលុង ។
ប្រភពពីនាយប៉ុស្តិ៍រដ្ឋបាលឃុំអូរចេង ឱ្យដឹងថា បន្ទាប់ពីទទួលពាក្យបណ្តឹងតាមទូរស័ព្ទភ្លាម អំពីករណីពង្រាត់គ្នាមកសំងំនៅចំណុចផ្ទះកើតហេតុក្នុងភូមិតាកាប់ ឃុំតាអង ស្រុកកូនមុំ កម្លាំងក៏ចុះទៅដល់ ហើយធ្វើការឃាត់ខ្លួននាំមកសួរនាំនៅប៉ុស្តិ៍អូរចេងតែម្តង ។
ប្រភពបន្តថា ភាគីខាងស្រីអាយុ៣២ឆ្នាំស្នាក់នៅផ្ទះបើកសិប្បកម្ម តុ-ទូរ ក្នុងក្រុងបានលុង ហើយប្តីឈ្មោះ ពេជ្រ សុភា អាយុ៣៧ឆ្នាំ ជាមេជាង និងមានកូនស្រី២នាក់ កូនបងអាយុ១២ឆ្នាំ និងកូនប្អូនអាយុ១០ឆ្នាំ ។ ចំណែកឯភាគីខាងប្រុសដែលពង្រាត់នាងមកដល់ផ្ទះរបស់ខ្លួននោះត្រូវគេស្គាល់ឈ្មោះ ហុង ចន្ត្រា អាយុ២៤ឆ្នាំ មុខរបរកូនជាងធ្វើតុ-ទូរ រស់នៅបណ្តោះអាសន្នជាមួយមេជាងភូមិ-ឃុំខាងលើរហូតមក ។
យោងតាមពាក្យបណ្តឹងភាគីខាងប្តីបានឲ្យដឹងថា កាលពីថ្ងៃទី១៦ តុលា ម៉ោង៧យប់នោះខ្លួនបានឃើញប្រពន្ធជិះម៉ូតូជាមួយកូនជាងរបស់ខ្លួនឈ្មោះ ហុង ចន្ត្រា ចេញពីក្រុងបានលុង ឆ្ពោះទៅផ្ទះរបស់គេនៅភូមិតាកាប់ ឃុំតាអង ស្រុកកូនមុំ។ ហើយខ្លួនជាប្តីក៏ជិះម៉ូតូតាមមើលសកម្មភាពតាមក្រោយរហូតដល់គោលដៅ និងឃើញពួកគេចូលទៅក្នុងផ្ទះទាញទ្វារបិទ ហើយខ្លួន (ជាប្តី) ក៏ស្ទុះទៅហៅប្រពន្ធឲ្យចេញមកក្រៅផ្ទះ តែពួកគេមិនព្រមឆ្លើយឆ្លងមួយមាត់សោះ ទើបគេប្តឹងទៅដល់សមត្ថកិច្ចប៉ុស្តិ៍អូរចេងឲ្យមកជួយអន្តរាគមន៍ភ្លាមៗតែម្តង ។
ស្ត្រីជាប្រពន្ធបានប្រាប់សមត្ចកិច្ចថា នាងពុំមានស្នេហាអ្វីជាមួយបុរសឈ្មោះហុង ចន្ត្រានោះឡើយ គឺរាប់អានគ្នាធម្មតាប៉ុណ្ណោះ ។ នាងរៀបរាប់ទាំងយំថា មកស្នាក់នៅផ្ទះហុង ចន្ត្រា គ្រាន់តែបណ្តោះអាសន្នទេ ព្រោះការធុញទ្រាន់ និងការរួមរស់ជាមួយប្តីជាង១០ឆ្នាំកន្លងមកនេះ ដោយសារប្តីធ្វើបាបផ្លូវចិត្ត ផ្លូវកាយ ស្គាល់គ្រប់រសជាតិមិនបានផ្តល់សេចក្តីសុខ ។ នាងថា សម្រេចចិត្តបញ្ចប់សេចក្តីស្នេហារវាងប្តីប្រពន្ធ ទើបជ្រើសរើសផ្លូវនេះ។
លោក ពេជ្រ សុភា នៅចំពោះមុខសមត្ថកិច្ចថា ខ្លួននឹងប្រពន្ធបានចាប់ដៃគ្នាជាង១០ឆ្នាំកន្លងមក ហើយនៅខេត្តស្វាយរៀង ហើយនាំគ្នាមករស់នៅក្នុងខេត្តរតនគិរីនេះបានជាង៤ឆ្នាំ និងប្រកបមុខរបរបើករោងសិកម្មតុ-ទូ ។ ការចោទប្រកាន់ពីប្រពន្ធថា ខ្លួនលួចក្បត់ចិត្តមានស្រីថ្មីលោកមិនប្រកែកទេ លោកថា ធម្មតាប្រុសតែងតែមាន ប៉ុន្តែលោកមិនដែលចោលទេ ប្រពន្ធដើមនោះ។
លោកពេជ្រ សុភា បន្តថា ហើយចំពោះប្រពន្ធរបស់លោកមានសាហាយស្មន់ជាមួយកូនជាងឈ្មោះ ហុង ចន្ត្រា តាំងពីពេលណា គឺលោកពុំបានដឹងទេ តែមានបងប្អូនជិតខាងខ្សឹបប្រាប់ក៏លោកពុំបានចាប់អារម្មណ៍ដែរ ។ ទើបតែនៅយប់កើតហេតុថ្ងៃទី១៦ តុលានេះទេ ដែលបែកធ្លាយ បើរឿងរ៉ាវបែបនេះកើតឡើងទៅហើយលោកនឹងបញ្ចប់វាតែម្តង គឺទៅបញ្ចប់នៅស្រុកកំណើតខេត្តស្វាយរៀង ទីនោះជាកន្លែងផ្តើមស្នេហ៍មានម៉ែឪចាស់ទុំជាសាក្សីដឹងឮនៃសេចក្តីស្នេហាមួយនេះ ៕
ចែករំលែកព័តមាននេះ