ខេត្តស្ទឹងត្រែង ៖ រយៈពេល៣ម៉ោងក្នុងការវះកាត់ត្រូវបានបញ្ចប់នៅវេលាម៉ោង១២និង៤០នាទីថ្ងៃត្រង់ថ្ងៃទី១៧ កញ្ញា ដោយលោកវេជ្ជបណ្ឌិតអ៊ុង សូវៀត ប្រធានមន្ទីរពេទ្យបង្អែកខេត្ត និងលោកវេជ្ជបណ្ឌិតអ៊ុយ គីណា ទទួលបន្ទុកផ្នែកវះកាត់ និងសម្ភព រួមជាមួយសហការីជាច្រើននាក់ទៀត ។ នេះជាការវះកាត់សង្គ្រោះជីវិតរបស់ស្ត្រីក្រីក្រម្នាក់មានកូន៦នាក់ ឈ្មោះភឹម នួនស៊ី អាយុ៣៦ឆ្នាំ ដែលរស់ប្រឈមនឹងជម្ងឺធំពោះ១០ឆ្នាំមកហើយ ជាជម្ងឺមិនច្បាស់លាស់ពីមុនមក ដែលសាមីខ្លួនថា ដុះសាច់ពោះ តែត្រូវបានគ្រូពេទ្យបដិសេធថា មិនមែនដុះសាច់ក្នុងពោះនោះទេ ។
អ្នកស្រីភឹម នួនស៊ី បានរស់ជាមួយស្ថានភាពពោះកាន់តែធំទៅៗ និងបានមកកាន់មន្ទីរពេទ្យ៣លើកមកហើយ ហើយលើកនេះជាលើកទី៣ ដែលគាត់មកកាន់មន្ទីរពេទ្យ ព្រោះទ្រាំជំងឺលែងបាន ។ តាមប្រសាសន៍របស់លោកវេជ្ជបណ្ឌិតអ៊ុង សូវៀត ឱ្យដឹងថា មុននឹងឈានដល់ការវះកាត់នេះ គឺលោកបានធ្វើការតាមដានយ៉ាងម៉ត់ចត់បំផុតព្រោះថា ការឈានទៅធ្វើការវះកាត់ត្រូវតែតាមដាន និងពិនិត្យឱ្យដិតដល់ ។ លោកវេជ្ជបណ្ឌិតប្រធានមន្ទីរពេទ្យបានឱ្យដឹងថា អ្នកជំងឺក្រីក្រនេះមន្ទីរពេទ្យបានយកចិត្តទុកដាក់ណាស់ ហើយក៏កាន់តែមានការកក់ក្តៅថែមទៀត ។
ដោយសារស្ថានភាពជំងឺនេះធ្ងន់ធ្ងរ ហើយក៏មានការយកចិត្តទុកដាក់ដ៏ខ្ពង់ខ្ពស់ ពីសំណាក់លោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា រហូតបានឧបត្ថម្ភជាថវិកាភ្លាមៗ សំរាប់ជួយទ្រទ្រង់ផ្នែកជីវភាពដែលត្រូវការចាំបាច់ និងជាមួយនេះតាមរយៈសារព័ត៌មានកោះសន្តិភាព លោកឧកញ៉ាលី ហួរ ក៏បានប្រកាសពីការបរិច្ចាគធនធាន ដើម្បីស្រោចស្រង់អាយុជីវិតស្ត្រីអ្នកជម្ងឺនេះដែរ រួមជាមួយសប្បុរសជនពីគ្រប់ទិសទី ដែលជាអ្នកអានសារព័ត៌មានកោះសន្តិភាព ។ ជាការពិតណាស់ការសង្គ្រោះអាយុជីវិតមនុស្ស គឺមានតំលៃក្រៃលែង មិនអាចកាត់ថ្លៃបានឡើយ ។
នៅព្រឹកថ្ងៃទី១៧ កញ្ញា ការវះកាត់បានចាប់ដំណើរការដោយនាំចូលបន្ទប់វះកាត់នៅម៉ោង៨និង៣០នាទី និងចាប់ដំណើរការវះកាត់នៅម៉ោង៩និង៤០នាទី រហូតដល់ម៉ោង១២និង៤០នាទី ទើបរួចរាល់ ដែលមានរយៈពេល៣ម៉ោងពេញ ។ ការវះកាត់នេះត្រូវបានធ្វើឡើងដោយលោកវេជ្ជបណ្ឌិតប្រធានមន្ទីរពេទ្យ រួមជាមួយលោកវេជ្ជ បណ្ឌិតផ្នែកវះកាត់ និងសម្ភព និងមានជំនួយសហការីច្រើនរូបទៀត ដោយមានការយកចិត្តទុកដាក់បំផុត ។ តាមរយៈនៃការវះកាត់នេះ លោកវេជ្ជបណ្ឌិតអ៊ុង សូវៀត មានប្រសាសន៍ថា គឺបានទទួលជោគជ័យ ។ លោកមានប្រសាសន៍ទៀតថា នេះជាជំងឺដុំគីសក្នុងដៃស្បូន និងជាតិទឹកបាយ មានទំងន់៣០គីឡូក្រាម ។ ទោះបីជាបែបណា លោកវេជ្ជបណ្ឌិតអ៊ុង សូវៀត មានប្រសាសន៍ថា លោកបន្តឱ្យមានការយកចិត្តទុកដាក់តាមដានពីស្ថានភាពសុខភាព ព្រោះការវះកាត់មានរយៈពេលយូរ អស់ឈាមក៏ច្រើន តែលោកបានបញ្ជាក់ចុងក្រោយថា ស្ថានភាពល្អមិនគួរឱ្យមានការបារម្ភនោះទេ ៕
ចែករំលែកព័តមាននេះ