ខេត្តកណ្តាល ៖ ព្រោះតែអំណាចថ្នាំញៀនជនសង្ស័យ3នាក់បានឆ្លងដែនពីខេត្តកំពង់ចាមមកគាស់បង្អួចកុដិព្រះសង្ឃលួចយកលុយទៅទិញថ្នាំញៀនប្រើប្រាស់ និងចែកចាយ ។ បើតាមរបាយការណ៍របស់សមត្ថកិច្ចនគរបាលបានឲ្យដឹងថា កាលពីថ្ងៃទី15 ខែតុលា ឆ្នាំ2018 លោកតាឈ្មោះ យុង ស៊ឹម អាយុ52ឆ្នាំ គណៈកម្មាការអាចារ្យវត្តជ័យឧត្តម ស្ថិតក្នុងភូមិជ័យឧត្តម ឃុំសំរោងធំ ស្រុកកៀនស្វាយ ខេត្តកណ្តាល បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសំរោងធំថា កាលពីថ្ងៃទី15 ខែតុលា ឆ្នាំ2018 វេលាម៉ោង11និង05នាទីព្រឹក មានជនសង្ស័យចូលគាស់បង្អួចកុដព្រះសង្ឃក្នុងវត្តលួចយកលុយខ្មែរអស់ចំនួន 3,400,000៛ និងលុយដុល្លារអស់70$ ខណៈរូបលោកតា(គណៈកម្មាការវត្ត)ទៅសាលាឆាន់ហូបបាយមួយភ្លែត ។
បន្ទាប់ពីទទួលបានពាក្យបណ្តឹងភ្លាមកម្លាំងនគរបាលប៉ុស្តិ៍បានចុះដល់ពិនិត្យជុំវិញកន្លែងកើតហេតុធ្វើការស្រាវជ្រាវ និងបានកំណត់មុខស្គាល់មុខសញាដឹងថា ជនសង្ស័យរត់ទៅសម្ងំលាក់ខ្លួននៅក្នុងទឹកដីខេត្តកំពង់ចាម និងដោយទទួលបានបទបញ្ជាពីលោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល និងមានការបញ្ជាដឹកនាំផ្ទាល់ពីលោកស្នងការរងទទួលផែនព្រហ្មទណ្ឌសហការជាមួយកម្លាំងជំនាញអធិការដ្ឋាននគរបាលស្រុកបាធាយក្រោមការសម្របសម្រួលពីលោកព្រះរាជអាជ្ញាអមសាលាដំបូងខេត្តកណ្តាល និងខេត្តកំពង់ចាមបានចុះទៅធ្វើការឃាត់ខ្លួនបានជនសង្ស័យចំនួន3នាក់កាលពីរសៀលថ្ងៃទី16 ខែតុលា ឆ្នាំ2018 ពេលជននេះកំពុងសម្ងំលាក់ខ្លួនជុំគ្នានៅក្នុងទឹកដីខេត្តកំពង់ចាម ។
ជនសង្ស័យទាំង3នាក់ដែលសមត្ថកិច្ចឃាត់ខ្លួនទី1-ឈ្មោះ ខេង រ័ត្នពិសី ភេទប្រុស អាយុ19ឆ្នាំ មុខរបរមិនពិតប្រាកដមានទីលំនៅភូមិចក ឃុំចក ស្រុកបាធាយ ខេត្តកំពង់ចាម, ទី2-ឈ្មោះ វង ប៊ុនធឿន ភេទប្រុស អាយុ17ឆ្នាំ មុខរបរមិនពិតប្រាកដ មានទីលំនៅភូមិត្បូងភ្នំ ឃុំតាំងក្រាំង ស្រុកបាធាយ ខេត្តកំពង់ចាម និងទី3-ឈ្មោះ ចាន់ ភេទប្រុស អាយុ17ឆ្នាំ មុខរបរមិនពិតប្រាកដ មានទីលំនៅភូមិជើងឆ្នុក ឃុំតាំងក្រាំង ស្រុកបាធាយ ខេត្តកំពង់ចាម ។
ហើយបន្ទាប់ពីសមត្ថកិច្ចឃាត់ខ្លួនធ្វើការឆែកឆេរដកហូតបានវត្ថុតាងម្សៅក្រាមពណ៌សថ្លាជាសារធាតុញៀន(ម៉ាទឹកកក)ចំនួន17កញ្ចប់តូច និងកញ្ចប់ថង់តូចរួមជាមួយសម្ភារវេចខ្ចប់ថ្នាំញៀនមួយចំនួនទៀតផងដែរ ។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា ពួកគេទាំងបីនាក់ពិតជាបានធ្វើសកម្មភាពគាស់កុដិលោកលួចយកលុយពិតប្រាកដមែន ។ ហើយបានយកប្រាក់១០ម៉ឺនរៀលទៅទិញថ្នាំញៀនមកចែកចាយផង និងទុកប្រើប្រាស់ខ្លួនឯងផង ។ បន្ទាប់ពីសាកសួររួចជនសង្ស័យទាំងបីនាក់រួមជាមួយវត្ថុតាងត្រូវសមត្ថកិច្ចស្រុកកៀនស្វាយកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ