ខេត្តឧត្តរមានជ័យ ៖ លោក កូយ កាន់យ៉ា ព្រះរាជអាជ្ញាអមសាលាដំបូងខេត្តឧត្តរមានជ័យ បានដឹកនាំ កងកម្លាំងប្រដាប់អាវុធចុះពិនិត្យ និងធ្វើការស៊ើបអង្កេត ដែលប្រជាពលរដ្ឋនាំគ្នាចូលមកតាំងលំនៅឋាន នៅលើផ្ទៃដីដែលមានម្ចាស់គ្រប់គ្រងកាន់កាប់ប្រើប្រាស់ដោយស្របច្បាប់លេខ០១ របស់រាជរដ្ឋាភិបាល ។ ហេតុការណ៍នេះបានកើតឡើងកាលពីព្រឹកថ្ងៃទី១៦ តុលា ២០១៨ នៅចំណុចអូរសុភី ស្ថិតនៅក្នុងភូមិ លំទងចាស់ ឃុំលំទង ស្រុកអន្លង់វែង ខេត្តឧត្តរមានជ័យ។
ទាក់ទិននឹងហេតុការណ៍នេះអ្នកយកព័តមាន បានធ្វើបទសម្ភាសន៍ប្រជាពលរដ្ឋទាំង២១គ្រួសារនោះ ពួកគាត់បាននិយាយថា ពួកគាត់ទាំងអស់នេះ មានអ្នកខ្លះបានមកពីតាមបណ្តាខេត្តផ្សេងៗ និងមានប្រជាពលរដ្ឋមួយចំនួនមកពីតាមបណ្តាស្រុក ក្នុងខេត្តឧត្តរមានជ័យផងដែរ។ ដោយសារតែមានមេខ្យល់បានបំផុសថា ដីនៅកន្លែងនេះជាដីរដ្ឋ ដោយមិនមានម្ចាស់គ្រប់គ្រងនោះទេក្រោយមកទើបដឹងថា ដីនេះមានម្ចាស់គ្រប់គ្រង។
លោកមេភូមិលំទងចាស់ បានឱ្យដឹងផងដែរថា ប្រជាពលរដ្ឋដែលចូលមករស់នៅលើដីកម្មសិទ្ធបុគ្គល ដែលមានម្ចាស់នេះ គឺពុំមានក្រុមអាជ្ញាធរទទួលស្គាល់ទេ ហើយប្រជាពលរដ្ឋក៏មិនមែនប្រជាពលរដ្ឋ អ្នកភូមិ គឺប្រជាពលរដ្ឋមករស់នៅដោយមិនស្របច្បាប់ដែលបង្កភាពអសន្តិសុខនៅក្នុងមូលរដ្ឋាន។ លោក កូយ កាន់យ៉ា ព្រះរាជអមសាលាដំបូងខេត្តឧត្តរមានជ័យ បានមានប្រសាសន៍ថា យោងទៅលើលិខិត ផ្ទេសិទ្ធមួយច្បាប់ ពីម្ចាស់ដីឈ្មោះ ឈិត គឹមយាត មានទីលំនៅឯភ្នំពេញ ដែលមានលោកមេធាវី ទទួលស្គាល់ដឹងឮ ឱ្យលោក ទេស សំអាត រស់នៅក្នុងភូមិអភិវឌ្ឍន៍ ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
ជាតំណាងឱ្យដាក់ពាក្យប្តឹងថា មានមេខ្យល់បំផុសចំនួន៣នាក់កៀងគរប្រជាពលរដ្ឋ ឱ្យចូលមករស់នៅលើដីកម្មសិទ្ធរបស់លោក ឈិត គឹមយាត យ៉ាងអនាធិបតេយ្យ។ លោក កូយ កាន់យ៉ា ព្រះរាជអាជ្ញាអមសាលាដំបូងខេត្តបានមានប្រសាសន៍បញ្ជាក់ថា ក្រោយពីបានទទួលនូវពាក្យបណ្តឹង រួចមក លោកបានដឹកនាំកងកម្លាំងប្រដាប់អាវុធ រួមទាំងមន្ត្រីអាជ្ញាធរមូលលរដ្ឋានចុះធ្វើការពិនិត្យនៅ កន្លែងកើតហេតុ និងធ្វើការស្រាវជ្រាវជាជំហានដំបូង ក្រោយមកទើបមានចំណាត់ការទៅតាមនីតិវិធីច្បាប់ ៕
https://www.youtube.com/watch?v=Ier5D2Gubj4
ចែករំលែកព័តមាននេះ