ខេត្តកំពង់ស្ពឺ ៖ បុរសជាកូនប្រសាចិត្តតិរច្ឆានម្នាក់ ត្រូវបានកម្លាំងនគរបាលស្រុកសាមគ្គីមុនីជ័យឃាត់ខ្លួន ខណៈដែលកូនប្រសារូបនេះទាញកាំបិតផ្គាក់កាប់ឪពុកក្មេកចំក្បាល បណ្ដាលឲ្យរងរបួសដេរ៤ថ្នេរ ព្រោះតែខឹងឪពុកក្មេកស្ដីបន្ទោសរឿងបន្តិចបន្តួចសោះ ។ រឿងមិនគួរកើតមាននេះ បានកើតឡើងកាលពីវេលាម៉ោង១០និង៥០នាទីព្រឹក…
ខេត្តកំពង់ស្ពឺ ៖ បុរសជាកូនប្រសាចិត្តតិរច្ឆានម្នាក់ ត្រូវបានកម្លាំងនគរបាលស្រុកសាមគ្គីមុនីជ័យឃាត់ខ្លួន ខណៈដែលកូនប្រសារូបនេះទាញកាំបិតផ្គាក់កាប់ឪពុកក្មេកចំក្បាល បណ្ដាលឲ្យរងរបួសដេរ៤ថ្នេរ ព្រោះតែខឹងឪពុកក្មេកស្ដីបន្ទោសរឿងបន្តិចបន្តួចសោះ ។
រឿងមិនគួរកើតមាននេះ បានកើតឡើងកាលពីវេលាម៉ោង១០និង៥០នាទីព្រឹក ថ្ងៃទី៦ ខែមីនា ឆ្នាំ២០២៦ ចំណុចភូមិអាយាន ឃុំពាំងល្វា ស្រុកសាមគ្គីមុនីជ័យ ខេត្តកំពង់ស្ពឺ ។
នគរបាលស្រុកសាមគ្គីមុនីជ័យបានឱ្យដឹងថា នៅមុនពេលឃាត់ខ្លួនបុរសជាកូនប្រសាចិត្តតិរច្ឆានខាងលើ គឺអនុវត្តតាមអនុសាសន៍របស់លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងដឹកនាំបញ្ជាកម្លាំងដោយលោកវរសេនីយ៍ទោ សាវ សុភក្តី អធិការនគរបាលស្រុកសាមគ្គីមុនីជ័យ បានបង្ក្រាបករណីហិង្សាដោយប្រើកាំបិតផ្គាក់កាប់ទៅលើឪពុកក្មេក បណ្ដាលឱ្យរងរបួសក្បាលធ្ងន់ធ្ងរ ត្រូវសាច់ញាតិក្រុមគ្រួសារដឹកយកទៅសង្គ្រោះព្យាបាលនៅឯមន្ទីរពេទ្យភ្លាមៗ ។
នគរបាលស្រុកសាមគ្គីមុនីជ័យបានបន្តថា ជនសង្ស័យជាកូនប្រសាដែលឃាត់ខ្លួនឈ្មោះ អ៊ែល សុភ័ក្រ អាយុ៣៦ឆ្នាំ បានយកកាំបិតផ្គាក់កាប់ពីខាងខ្នងកាំបិត ទៅលើជនរងគ្រោះឈ្មោះ ប៉េន អោម ភេទប្រុស អាយុ៦៧ឆ្នាំ(ដែលត្រូវជាឪពុកក្មេក) ត្រូវចំក្បាល១ខ្នងកាំបិតបណ្តាលឱ្យរងរបួសបែកក្បាលដេរ៤ថ្នេរ ។
នគរបាលស្រុកសាមគ្គីមុន្នីជ័យបានបន្តឲ្យដឹងទៀតថា ក្រោយកេីតហេតុ សមត្ថកិច្ចនគរបាលស្រុកបានចុះទៅដល់កន្លែងកេីតហេតុ និងឃាត់ខ្លួនជនសង្ស័យជាកូនប្រសា យកមកសាកសួរ ។ ជនសង្ស័យជាកូនប្រសាបានឆ្លើយសារភាពថា រូបគេពិតជាបានយកកាំបិតផ្គាក់កាប់ពីខាងខ្នងកាំបិត ត្រូវចំក្បាលទៅលើឪពុកក្មេកដែលជាជនរងគ្រោះពិតប្រាកដមែន ។ មូលហេតុដែលរូបគេ(ជនសង្ស័យ) បានឈ្លោះគ្នាព្រោះតែឪពុកក្មេកស្តីបន្តោស ក៏កើតចិត្តខឹងទាញយកកាំបិតផ្គាក់កាប់ពីខាងខ្នងកាំបិតត្រូវចំក្បាល បណ្តាលឱ្យរបួសបែកក្បាលឈាមហូរកក្លាក់តែម្ដង ។ ក្រោយឃាត់ខ្លួនបុរសជាកូនប្រសា ត្រូវនគរបាលស្រុកបានដកយកវត្ថុតាងកាំបិតផ្គាក់១ដើម ។
នគរបាលស្រុកសាមគ្គីមុនីជ័យបានបញ្ជាក់ថា បច្ចុប្បន្នជនដៃដល់ជាកូនប្រសាខាងលើ ត្រូវបានឃាត់ខ្លួននៅអធិការដ្ឋាននគរបាលស្រុកសាមគ្គីមុនីជ័យ ដើម្បីកសាងសំណុំរឿងបញ្ជូនទៅកាន់ការិយាល័យជំនាញ នៃស្នងការដ្ឋាននគរបាលខេត្តកំពង់ស្ពឺ ចាត់ការបន្តតាមផ្លូវច្បាប់ ៕
ចែករំលែកព័តមាននេះ