រាជធានីភ្នំពេញ ៖ ស្របពេលសកម្មភាពវិនិយោគលំនៅឋានតម្លៃមធ្យម និងតម្លៃទាប ដែលផ្ដោតសំខាន់លើប្រជាជនមានប្រាក់ចំណូលមធម្យម បាននិងកំពុងមានកំណើនយ៉ាងគំហុកនោះ អ្នកជំនាញក្នុងវិស័យអចលនទ្រព្យបានបង្ហាញវិធីសាស្ត្រវិនិយោគលើលំនៅឋាន ដើម្បីបញ្ចៀសហានិភ័យដែលអាចកើតឡើង ។ អ្នកនាង…
រាជធានីភ្នំពេញ ៖ ស្របពេលសកម្មភាពវិនិយោគលំនៅឋានតម្លៃមធ្យម និងតម្លៃទាប ដែលផ្ដោតសំខាន់លើប្រជាជនមានប្រាក់ចំណូលមធម្យម បាននិងកំពុងមានកំណើនយ៉ាងគំហុកនោះ អ្នកជំនាញក្នុងវិស័យអចលនទ្រព្យបានបង្ហាញវិធីសាស្ត្រវិនិយោគលើលំនៅឋាន ដើម្បីបញ្ចៀសហានិភ័យដែលអាចកើតឡើង ។
អ្នកនាង ហ្គ្រេស រចនីហ្វុង នាយិកាក្រុមហ៊ុន Century21 Cambodia បានថ្លែងឲ្យដឹងកាលពីពេលថ្មីៗនេះថា លំនៅឋានតម្លៃមធ្យម ពិតជាកើនឡើង ដោយសារអ្នកវិនិយោគនានាបានផ្តោតលើការអភិវឌ្ឍលំនៅឋានប្រភេទនេះ ព្រោះជាទីផ្សារធំសម្រាប់ប្រជាជនមានប្រាក់ចំណូលមធ្យម ។
អ្នកនាងបន្តថា ៖« ចំនួនប្រជាជនមានប្រាក់ចំណូលមធម្យម កំពុងកើនឡើងខ្លាំង ហើយការវិនិយោគលំនៅឋានដែលមានតម្លៃចាប់ពី២ទៅ៣ម៉ឺនដុល្លារ គឺសមស្របសម្រាប់ប្រជាជនក្នុងក្រុមនេះ »។ អ្នកនាងបន្តថា ទោះជាយ៉ាងណា អតិថិជន ដែលទិញលំនៅឋានប្រភេទនេះ ត្រូវប្រាកដថាគម្រោងដែលពួកគេបានទិញ គឺជាគម្រោងមានការអភិវឌ្ឍច្បាស់លាស់ ជាគម្រោងដែលមានគុណភាពសំណង់ល្អ ពិសេសគួរទិញជាមួយម្ចាស់បុរី ដែលមានកេរ្តិ៍ឈ្មោះល្អ ដើម្បីបញ្ចៀសហានិភ័យ ។
អ្នកនាងបន្តថា ៖« អ្នកវិនិយោគក៏ត្រូវប្រាកដថា លំនៅឋានដែលខ្លួនបានទិញ មានច្បាប់សាងសង់ និងច្បាប់អភិវឌ្ឍន៍ត្រឹមត្រូវដែលចេញដោយក្រសួងពាក់ព័ន្ធ ដូចជា ក្រសួងសេដ្ឋកិច្ច និងហិរញ្ញវត្ថុ ឬក្រសួងរៀបចំដែនដី នគរូបនីយកម្ម និងសំណង់ ជាដើម ។
អ្នកនាង ហ្គ្រេស រចនីហ្វុង បានបន្តថា មានម្ចាស់គម្រោងមួយចំនួនបានប្រកាសលក់លំនៅឋានរបស់ខ្លួន ដោយមិនទាន់បានចាប់ផ្តើមសាងសង់នៅឡើយ ហើយពួកគេបានយកប្លង់ដីរបស់ពួកគេដាក់បញ្ចាំនៅធនាគារ ដើម្បីយកមកសាងសង់ ដែលធ្វើឲ្យអ្នកទិញមិនទាន់អាចកាត់ប្លង់រឹងឬប្លង់ដែលទទួលស្គាល់ត្រឹមស្រុក ឬខណ្ឌបាន ។
អ្នកនាងបន្តថា ៖« កន្លងមក ករណីបែបនេះបានកើតមាន ដោយអ្នកតាំងខ្លួនជាអ្នកអភិវឌ្ឍន៍ បានកក់ដីរបស់គេហើយសាងសង់ ខណៈម្ចាស់ដីបានយកប្លង់ដីនោះដាក់នៅធនាគារ ហើយធនាគារមិនអនុញ្ញាត្តឲ្យមានការសាងសង់សំណង់លើដីនោះទេ »។
អ្វីជាដំណោះស្រាយ អ្នកនាងបានបញ្ជាក់ថា អតិថិជនគួររកការពិគ្រោះយោបល់ជាមួយក្រុមហ៊ុនអចលនទ្រព្យជំនាញ ដែលមានបទពិសោធន៍ និងវិជ្ជាជីវៈត្រឹមត្រូវ ដើម្បីធ្វើឲ្យប្រាកដថា គម្រោងដែលពួកគេចាប់អារម្មណ៍ នោះ ជាគម្រោងដែលមិនមានហានិភ័យ ជាគម្រោងអភិវឌ្ឍន៍ច្បាស់លាស់ និងម្ចាស់គម្រោងជាអ្នកអភិវឌ្ឈន៍មានក្រមសីលធ៌មវិជ្ជាជីវៈត្រឹមត្រូវ ៕
ចែករំលែកព័តមាននេះ