រាជធានីភ្នំពេញ ៖ កម្មវិធីប្រដាល់កំពូលអ្នកប្រយុទ្ធគុនខ្មែរនៅលើរេញ CTN ថ្ងៃអាទិត្យទី២៦ ឧសភា ស្អែកនេះបានឈានចូលដល់សប្តាហ៍ទី៤ហើយ ដោយមានកីឡាករចូលរួមប្រកួតចំនួន៥គូ ក្នុងនោះទម្ងន់៥៧គីឡូក្រាម២គូទម្ងន់៦៩គីឡូក្រាម២គូ និងទម្ងន់៦៥គីឡូក្រាម១គូ ។ យោងតាមក្រដាសកម្មវិធីដែលកោះសន្តិភាពទទួលបានឱ្យដឹងថា កីឡាករដែលត្រូវប្រកួតក្នុងប្រភេទទម្ងន់៥៧គីឡូក្រាមមានកីឡាករមិត្ត ហុក សួរ មកពីខេត្តសៀមរាប ប្រកួតជាមួយកីឡាករមុំ ចន្ធូ មកពីខេត្តកណ្តាល និងកីឡាករស៊ឹម ប៊ុនស្រ៊ន់ មកពីខេត្តកំពង់ចាម ប្រកួតជាមួយកីឡាករទី ពន្លែត មកពីខេត្តសៀម
រាប ។
តាមពិតរវាងមិត្ត ហុកសួរ និងមុំ ចន្ធូ ទើបតែឆ្លងកាត់ការប្រកួតបាន១លើកម្នាក់ប៉ុណ្ណោះ និងទទួលបានលទ្ធផលចាញ់ដូចគ្នា ទើបលើកនេះទាំងសងខាងចង់ឈ្នះរៀងៗខ្លួន ប៉ុន្តែមិនទាន់ដឹងថា ខាងណាមានសំណាងជាងនោះទេ ព្រោះវាអាស្រ័យទៅលើល្បិចប្រយុទ្ធនៅលើសង្វៀនជាក់ស្តែងប៉ុណ្ណោះ ។ រីឯស៊ឹម ប៊ុនស្រ៊ន់ និងទី ពន្លែត មិនខុសពីមិត្ត ហុកសួរ និង មុំ ចន្ធូ ដែរ ដោយប្រកួតលើកមុនទទួលលទ្ធផលចាញ់ដូចគ្នា ទោះបីម្នាក់ជា ជើងចាស់និងម្នាក់ទៀតជាជើងថ្មីក៏ដោយ ។ ស៊ឹម ប៊ុនស្រ៊ន់ ជាជើងថ្មីមិនមានប្រវត្តិប្រកួតនៅលើសង្វៀនជោកជាំដូច ទី ពន្លែត ឡើយ ប៉ុន្តែគេមានកម្លាំងខ្លាំង និងចិត្តសឿង ចំណែកទី ពន្លែត មានស្នៀតគុនល្អគ្រាន់បើទាំងស្នៀតដៃ និងស្នៀតជើងអាចប្រើការបាននិងមានចិត្តអំណត់ទៀតផង ។
ទោះបីជាយ៉ាងណានៅមិនទាន់ប្រាកដថាជើងចាស់អាចយកឈ្នះលើជើងថ្មីបាននោះទេ ព្រោះការប្រកួតពេលខ្លះពឹងលើសំណាងក៏មាន ។ ក្នុងប្រភេទទម្ងន់៦០គីឡូក្រាម ក៏មាន២គូដែរ គឺកីឡាករ ជួន បូរិន្ទ មកពីខេត្តព្រៃវែង ជួបជាមួយកីឡាករ ព្រីង ដារិន មកពីខេត្តបាត់ដំបង និងកីឡាករគង់ ឌីណា មកពីក្លិបកងពលតូចលេខ៧០ ជួបជាមួយហុត គឹមហៀង មកពីក្លិបតាព្រហ្មមានជ័យបង្ក្រាបគ្រឿងញៀន។ រវាង២គូនេះក៏ទើបតែឆ្លងកាត់ការប្រកួតបាន១លើកម្នាក់ដូចគ្នា ប៉ុន្តែលទ្ធផលដែលគេទទួលបានត្រូវបានប្រកាសលុបចោលវិញ ដោយគណៈកម្មការរៀបចំការប្រកួតសម្រេចយកលទ្ធផលផ្លូវការនៅថ្ងៃអាទិត្យសប្តាហ៍នេះវិញ ។
ចំពោះមូលហេតុលុបចោលលទ្ធផលប្រកួតលើកមុនដោយសារតែកីឡាករដែលចូលរួមប្រកួតពីខាងដើមមានចំនួនមិនច្បាស់លាស់ទើបតែលើកនេះគណៈកម្មការរៀបចំការប្រកួតបានកំណត់យកចំនួនកីឡាករជាផ្លូវការហើយ ។ រីឯការប្រកួតនៅក្នុងប្រភេទទម្ងន់៦៥គីឡូក្រាមវិញនោះមានតែ១គូប៉ុណ្ណោះ គឺកីឡាករញៀន វា៉ន់ណយ មកពីក្លិបកងពលធំអន្តរាគមន៍លេខ៣ព្រះវិហារ ប្រកួតជាមួយកីឡាករតូច ទូមកពីសមាគមកីឡាប្រដាល់ក្រសួងការពារជាតិ។ រវាងពួកគេទាំង២នាក់ទើបតែប្រកួតបាន១លើកនិងចាញ់ដូចគ្នាទៀត លើកនេះមិនដឹងថានរណាមានសំណាងទទួលបាន៣ពិន្ទុមុនឡើយ ដូច្នេះសូមរង់ចាំទស្សនាទាំងអស់គ្នា ៕
ចែករំលែកព័តមាននេះ