ព្រះពុទ្ធបរមគ្រូបានប្រទានគោរមងារ៤យ៉ាងដល់បុរសស្ត្រី២រូបដែលជាកិត្តិនាមដ៏ស័ក្តិសមទៅនឹងសន្តានចិត្តរបស់លោកបំផុត។ បុរសស្ត្រីទាំង២រូបនោះគឺជាឪពុកម្តាយដែលខំចិញ្ចឹមបីបាច់ថែរក្សាកូនៗឲ្យរស់រានមានជីវិត បើទោះបីជាគាត់បានឆ្លងកាត់ឧបសគ្គ ឆ្លងកាត់ការលំបាកច្រើនឥតគណនាយ៉ាងណាក៏ដោយ ក៏ចេះតែស៊ូទ្រាំឥតរុញរាអ្វីឡើយ។ ព្រោះទង្វើល្អនេះហើយទើបព្រះបរមសាស្តាទ្រង់ប្រទាននាម៤យ៉ាងដល់លោកដែលចាត់ថាជាងារខ្ពស់បំផុតគឺៈ
១-បុព្វាចារ្យ ជាគ្រូបង្រៀនមុនគេ បានដល់គ្រូបង្រៀន ឱ្យចេះសើច ចេះស្លៀកពាក់ ញុំាអាហារ ដើរដេក និយាយស្តីជាដើម មុនគ្រូបង្រៀននៅសាលាទាំងអស់ ។
២-បុព្វទេវា ទេវតាដើម យើងតែងសង្ឃឹមថា ទេពអារក្ស អ្នកតា ទេព្តាទាំងឡាយជួយថែរក្សាយើង តែបើគិតបន្តិចទៅនឹងឃើញថា ឪពុកម្តាយគឺជាទេវតាដែលគាំពាររក្សាទំនុកបម្រុងយ៉ាងយកចិត្តទុកដាក់បំផុតជាងទេវតាទាំងអស់នោះ ។
៣-ព្រហ្មា ព្រះព្រហ្មមានមុខ៤ ឪពុកម្តាយឲ្យឈ្មោះថាជាព្រះព្រហ្ម ព្រោះគាត់មានធម៌៤យ៉ាងគឺ មេត្តា ករុណា មុទិតា និងឧបេក្ខា ។
4-អរហន្ត តាមធម្មតាព្រះអរហន្តមិនចេះចាប់ទោសអូសដំណើរសព្វសត្វយ៉ាងណា ឪពុកម្តាយក៏មិនចេះរំពៃចាប់ទោសកំហុសកូនឡើយ មានតែការអាណិតអាសូរ និងជួយបិទបាំងអំពើខុសឆ្គងរបស់កូនទៀតផង ។
ឪពុកម្តាយបានបូជាកម្លាំងកាយ កម្លាំងចិត្ត លះបង់ញើសឈាម ទ្រព្យសម្បត្តិគ្រប់បែបយ៉ាង ដោយមិនគិតពីការនឿយហត់ឡើយ ដើម្បីចិញ្ចឹមកូន ព្រោះហេតុនោះយើងត្រូវមានកតញ្ញូកតវេទិតាធម៌ចំពោះលោកវិញ ដោយការបម្រើ ដោយការឧបត្ថម្ភគ្រឿងសក្ការទាំងឡាយមាន បាយ ទឹក សម្លៀកបំពាក់ ប្រាក់កាក់ ជាពិសេសក្នុងរដូវបុណ្យទាននេះ ជួយធ្វើកិច្ចការ និងស្តាប់ការអប់រំរបស់លោក ធ្វើយ៉ាងណាកុំឲ្យលោកលំបាកចិត្តដោយសារយើងឱ្យសោះ ។
ចែករំលែកព័តមាននេះ