រាជធានីភ្នំពេញ ៖ បើមិនមានអ្វីប្រែប្រួលទេ នៅដំណាច់ឆ្នាំ២០១៨នេះ នឹងមានក្រុមហ៊ុន២ទៀតនឹងចុះបញ្ជីនៅក្រុមហ៊ុនផ្សារមូលបត្រកម្ពុជាដើម្បីបោះផ្សាយលក់ភាគហ៊ុនដល់សាធារណជន ។ នេះបើតាមការអះអាងពីថ្នាក់ដឹកនាំក្រុមហ៊ុនផ្សារមូលបត្រកម្ពុជា ។ លោក ហុង…
រាជធានីភ្នំពេញ ៖ បើមិនមានអ្វីប្រែប្រួលទេ នៅដំណាច់ឆ្នាំ២០១៨នេះ នឹងមានក្រុមហ៊ុន២ទៀតនឹងចុះបញ្ជីនៅក្រុមហ៊ុនផ្សារមូលបត្រកម្ពុជាដើម្បីបោះផ្សាយលក់ភាគហ៊ុនដល់សាធារណជន ។ នេះបើតាមការអះអាងពីថ្នាក់ដឹកនាំក្រុមហ៊ុនផ្សារមូលបត្រកម្ពុជា ។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា បានប្រាប់ក្រុមអ្នកសារព័ត៌មានកាលពីថ្ងៃទី២៨ កញ្ញា ថា បច្ចុប្បន្ននេះ មានក្រុមហ៊ុនចំនួន៥ហើយដែលបានចុះបញ្ជី និងកំពុងដំណើរការបោះផ្សាយលក់ភាគហ៊ុនរបស់ខ្លួននៅលើផ្សារមូលបត្រកម្ពុជា ហើយរំពឹងថា នឹងមានក្រុមហ៊ុនថ្មី២ផ្សេងទៀតដែលនឹងអាចរៀបចំខ្លួនរួចរាល់នៅមុនដំណាច់ឆ្នាំនេះ ។ មិនត្រឹមតែប៉ុណ្ណោះ នឹងមានក្រុមហ៊ុនមួយចំនួនទៀតគ្រោងរៀបចំខ្លួននៅដើមឆ្នាំក្រោយ ។
លោកលើកឡើងថា ៖« បច្ចុប្បន្ននេះ ការជួញដូរប្រចាំថ្ងៃមានប្រមាណជាង១ម៉ឺនដុល្លារក្នុង១ថ្ងៃ បើធៀបនឹងបណ្តាប្រទេសជិតខាងគឺនៅទាបជាងគេឆ្ងាយ ប៉ុន្តែវាមានទំនោរកើនឡើងគួរឲ្យគត់សម្គាល់ ហើយយើងរំពឹងថា ការជួញដូរនឹងសកម្មថែមទៀតនាពេលខាងមុខ នៅពេលដែលមានក្រុមហ៊ុនចុះបញ្ជីកាន់តែច្រើន »។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា មានប្រសាសន៍ថា ចាប់ពីឆ្នាំ២០១២មក យើងមានផលិតផលតែ១ប្រភេទគឺភាគហ៊ុនដែលបោះផ្សាយលក់ដោយក្រុមហ៊ុនចំនួន៥ ហើយក្រុមហ៊ុនទី៦រំពឹងថានឹងបញ្ចប់ដោយជោគជ័យក្នុងពេលឆាប់ៗនេះ ។ ចំណែកក្រុមហ៊ុនទី៧បានដាក់លិខិតមកគណៈកម្មការមូលបត្រកម្ពុជា ហើយខ្ញុំកំពុងតែពិនិត្យមើលនីតិវិធី ដើម្បីជំរុញបានចូលទីផ្សារបានកាន់តែឆាប់ »។
លោកបញ្ជាក់ថា ៖« បើសិនជាអ្វីៗដំណើរការបានល្អ នឹងមានក្រុមហ៊ុន២ទៀតនឹងចូលផ្សារហ៊ុននៅមុនដំណាច់ឆ្នាំ២០១៨នេះ »។ លោកបន្ដថា ៖« បច្ចុប្បន្ននេះ ក្រៅពីបង្កើនក្រុមហ៊ុនចុះបញ្ជីនៅក្រុមហ៊ុនផ្សារមូលបត្រ យើងបានធ្វើពិពិធកម្ម ដោយបង្កើតនូវប្រភេទផលិតផលដែលអាចជួញដូរបាននៅក្នុងទីផ្សារមានសញ្ញាប័ណ្ណ ដោយក្រុមហ៊ុនហត្ថាកសិករដែលនឹងធ្វើការអនុម័តឡើងនៅសប្តាហ៍ក្រោយ »។
អ្នកស្រី ហ៊ លីគា ប្រធាននាយកដ្ឋានស្រាវជ្រាវបណ្តុះបណ្តាលអភិវឌ្ឍន៍ទីផ្សារមូលបត្រ និងទំនាក់ទំនងអន្តរជាតិនៃគណៈកម្មការមូលបត្រកម្ពុជា បានឱ្យដឹងតាមបណ្តាញទំនាក់ទំនងសង្គម(តេឡេក្រាម)ឱ្យដឹងថា ទាក់ទងក្រុមហ៊ុនថ្មី២ដែលគ្រោងចុះបញ្ជីនៅផ្សារមូលបត្រកម្ពុជាដើម្បីបោះផ្សាយលក់ភាគហ៊ុនជាសាធារណៈនាពេលខាងមុខនេះ គឺមានក្រុមហ៊ុន Pestech ដែលមានក្រុមហ៊ុនមេនៅប្រទេសម៉ាឡេស៊ី និងក្រុមហ៊ុន Asa ជាភាគហ៊ុននិករបស់ធនាគារអេស៊ីលីដា »។
សូមបញ្ជាក់ថា បច្ចុប្បន្ននេះ ក្រុមហ៊ុនដែលបានចុះបញ្ជី និងកំពុងបោះផ្សាយលក់ភាគហ៊ុនរួមមាន រដ្ឋាករទឹកស្វាយ័តក្រុងភ្នំពេញ (PWSA) បានចុះបញ្ជីនៅថ្ងៃទី១៨ មេសា ឆ្នាំ២០១២, ហ្គ្រេន ធ្វីន អុីនធើណេសិនណល(ខេមបូឌា) ភីអិលស៊ី(GTI) បានចុះបញ្ជីនៅថ្ងៃទី១៦ មិថុនា ឆ្នាំ២០១៤,កំពង់ផែស្វយ័តភ្នំពេញ(PPAP) បានចុះបញ្ជីនៅថ្ងៃទី៩ ធ្នូ ឆ្នាំ២០១៥ ,ភ្នំពេញអេសអុីហ្សិត ភីអិលស៊ី(PPSP) បានចុះបញ្ជីនៅថ្ងៃទី៣០ ឧសភា ឆ្នាំ២០១៦ និងកំពង់ផែស្វយ័តក្រុងព្រះសីហនុ(PAS) ដែលបានចុះបញ្ជីនៅថ្ងៃទី៨ ខែមិថុនា ឆ្នាំ២០១៧ ៕
ចែករំលែកព័តមាននេះ