រាជធានីភ្នំពេញ ៖ ក្នុងជំនួបពិភាក្សាទ្វេភាគីជាមួយសម្តេចតេជោនាយករដ្ឋមន្ត្រី ហ៊ុន សែន កាលពីរសៀលថ្ងៃទី២៩ ខែកញ្ញា នៅទីក្រុងញូវយ៉ក សហរដ្ឋអាមេរិក លោកអគ្គលេខាធិការអង្គការសហប្រជាជាតិ(អ.ស.ប)…
រាជធានីភ្នំពេញ ៖ ក្នុងជំនួបពិភាក្សាទ្វេភាគីជាមួយសម្តេចតេជោនាយករដ្ឋមន្ត្រី ហ៊ុន សែន កាលពីរសៀលថ្ងៃទី២៩ ខែកញ្ញា នៅទីក្រុងញូវយ៉ក សហរដ្ឋអាមេរិក លោកអគ្គលេខាធិការអង្គការសហប្រជាជាតិ(អ.ស.ប) បានប្តេជ្ញាធ្វើកិច្ចសហប្រតិបត្តិការជាមួយកម្ពុជា និងបណ្តាប្រទេសសមាជិកអាស៊ាន ។
យោងតាមបណ្តាញសង្គមហ្វេសប៊ុកផ្លូវរបស់សម្តេចតេជោ ក្នុងជំនួបនេះអគ្គលេខាធិការអ.ស.ប លោក អាន់តូនីញ៉ូ ហ្គូតេរ៉េស (Antonio Guterres) បានលើកឡើងថា កិច្ចសហប្រតិបត្តិការរវាង អ.ស.ប និងកម្ពុជា ក៏ដូចជារវាង អ.ស.ប ជាមួយអាស៊ាន គឺពិតជាមានសារៈសំខាន់ខ្លាំងណាស់ ។
លោកអគ្គលេខាធិការបន្តថា អ.ស.ប មានការប្តេជ្ញាចិត្តយ៉ាងពេញលេញចំពោះកិច្ចសហប្រតិបត្តិការរវាង អ.ស.ប ជាមួយកម្ពុជា ក៏ដូចជារវាង អ.ស.ប ជាមួយអាស៊ាន ។ក្នុងជំនួបនោះដែរ សម្តេចតេជោ ហ៊ុន សែន
បានលើកសំណើចំនួន៣ទៅកាន់លោកអគ្គលេខាធិការ អ.ស.ប និងទទួលបាននូវការឯកភាពពីលោកអគ្គលេខាធិការក្នុងនោះ ៖ទី១-ពាក់ព័ន្ធទៅនឹងការិយាល័យអង្គការសិទ្ធិមនុស្សរបស់ អ.ស.ប នៅកម្ពុជា ដែលគ្រោងនឹងចប់កិច្ចព្រមព្រៀងនៅចុងឆ្នាំ២០១៨នេះ សម្តេចបានអនុញ្ញាតឲ្យបន្តរយៈពេល២ឆ្នាំទៀត ហើយនៅក្នុងខែតុលាខាងមុខ គឺនៅពេលដែលសម្តេចអញ្ជើញទៅបំពេញទស្សនកិច្ចនៅទីក្រុងហ្សឺណែវនោះ នឹងមានការចុះហត្ថលេខារវាងលោកឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា ជាមួយនឹងតំណាងស្នងការសិទ្ធិមនុស្សនៃអ.ស.ប ។
សម្តេចតេជោបន្តថា កម្ពុជាពិតជាមានឆន្ទៈពេញលេញក្នុងការបន្តធ្វើការងារជាមួយ អ.ស.បស្តីពីសិទ្ធិមនុស្ស ។ទី២-សម្តេចតេជោនាយករដ្ឋមន្ត្រី បានលើកពីកិច្ចសហប្រតិបត្តិការរវាងកម្ពុជានិង អ.ស.ប ស្តីពីសាលាក្តីខ្មែរក្រហមនៅកម្ពុជា ។កម្ពុជានឹងបន្តសកម្មភាពទាំងនោះ ដូចអ្វីដែលកម្ពុជាធ្លាប់បានធ្វើ និងអនុវត្តកាលពីពេលមុនៗ គឺមានន័យថា អ.ស.ប បានស្នើឲ្យកម្ពុជាបន្តបង់ថវិកាលើការចំណាយរបស់មន្ត្រីបុគ្គលិកកម្ពុជា ដែលធ្វើការនៅសាលាក្តីខ្មែរក្រហម ។ ទី៣-រាជរដ្ឋាភិបាលកម្ពុជានឹងបន្តចូលរួមឲ្យកាន់តែសម្រេចបានថែមទៀតនូវបេសកកម្មនៃការថែរក្សាសន្តិភាពរបស់ អ.ស.ប ថាតើប្រទេសណាទៀតដែលត្រូវការកងទ័ពមួកខៀវរបស់កម្ពុជា ក្នុងការចូលរួមបំពេញបេសកកម្មមនុស្សធម៌នៅក្រោមឆត្ររបស់អ.ស.ប ។
ក្នុងឱកាសនោះ លោកអគ្គលេខាធិការ អ.ស.ប បានថ្លែងអំណរគុណយ៉ាងជ្រាលជ្រៅបំផុតជូនចំពោះសម្តេចតេជោនាយករដ្ឋមន្ត្រី ដែលបានបន្តអាណត្តិមជ្ឈមណ្ឌលសិទ្ធិមនុស្សនៃ អ.ស.ប ប្រចាំកម្ពុជារយៈពេល២ឆ្នាំទៀត ។ លើចំណុចទី២ និងទី៣ គឺលោកអគ្គលេខាធិការមានប្រសាសន៍ថា កម្ពុជាពិតជាមានឆន្ទៈពិតប្រាកដក្នុងការជួយដល់ អ.ស.ប ពិសេសវត្តមានកងទ័ពមួកខៀវដែលពោរពេញទៅដោយវិន័យ និង
មានសមត្ថភាពពេញលេញក្នុងសកម្មភាពមនុស្សធម៌ និងថែរក្សាសន្តិភាពក្រោមឆត្ររបស់អ.ស.ប ៕
ចែករំលែកព័តមាននេះ