រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអះអាងថាការចូលអង្គុយចូលរួមកិច្ចប្រជុំ នៅមហាសន្និបាតរបស់អង្គការសហប្រជាជាតិលើកទី៧៣នេះ ជាសារមួយបង្ហាញទៅកាន់ក្រុមប្រឆាំងរួចហើយ ដោយមិនចាំបាច់បកស្រាយទេ ។
ក្នុងជួបសំណេះសំណាលសួរសុខទុក្ខបងប្អូនពលរដ្ឋខ្មែរ-អាមេរិកាំងរស់នៅក្នុងសហរដ្ឋអាមេរិក និងបងប្អូនខ្មែរមកពីប្រទេសកាណាដា នៅទីក្រុងញ៉ូវយ៉ក សហរដ្ឋអាមេរិក ថ្ងៃទី២៩ កញ្ញា ២០១៨ ហើយទើបឡាញផ្សាយនៅថ្ងៃទី៣០ កញ្ញានេះ សម្តេចតេជោបានបញ្ជាក់ថា «ខ្ញុំកំពុងសួរខ្លួនឯងថា ខ្ញុំកំពុងរស់នៅទីណា ! នេះមិនមែនជាការនិយាយចាក់ដោតនោះទេ ឬការឆ្លើយតបបញ្ឈឺចិត្តទេ ។ ក៏ប៉ុន្តែខ្ញុំគួរត្រូវបាននិយាយបន្តិច ដើម្បីយើងបើកចំហរនូវទស្សនៈការយល់ឃើញ ឬក៏របៀបបោកប្រាស់ខ្លះដែលធ្វើឲ្យមនុស្សមួយចំនួនភាន់ច្រឡំ» ។
សម្តេចតេជោបញ្ជាក់ថា ៖ «ខ្ញុំមានតម្រូវការរបស់ខ្ញុំ កុំអីខ្ញុំឡើងទៅអង្គុយនៅខាងលើកនៃកៅអីអង្គការសហប្រជាជាតិ ដើម្បីធ្វើជាប្រធានអង្គប្រជុំ ប៉ុន្តែលោកឧបនាយករដ្ឋមន្ត្រីប្រាក់ សុខុន រដ្ឋមន្ត្រីការបរទេស បានអញ្ជើញធ្វើជាប្រធានអង្គប្រជុំ ព្រោះយើងជាអនុប្រធាននៃអង្គប្រជុំ អីញ្ចឹងអាចបញ្ជាក់ក្រុមអ្នក (ក្រុមប្រឆាំង) យល់ហើយមិនចាំបកស្រាយប្រាប់អ្នកទេ» ។ សម្តេចតេជោក៏បានលើកឡើងថាការចូលរួមកិច្ចប្រជុំមហាសន្និបាតអង្គការសហប្រជាជាតិក៏ជាការបង្ហាញឲ្យភ្លឺភ្នែកដល់ក្រុមប្រឆាំងដែលតែងតែបោកពលរដ្ឋតាមការឃោសនាកន្លងមកថា អាសនៈកម្ពុជាត្រូវបានព្យូរផងដែរ ។ សម្តេចតេជោបញ្ជាក់ថា ៖«មិនមានអ្វីជាការអត្ថាធិប្បាយបែបបញ្ឈឺចិត្តទេ ហើយខ្ញុំសរសេរលើកហ្វេសប៊ុកថាមិនដេញទាន់ជាន់កែងទេ ។ ប៉ុន្តែមនុស្សទណ្ឌិតរត់ចោលស្រុកនេះ (សម រង្ស៊ី) បើមិនដេញទាន់ជាន់កែងមិនរាងទេ» ។
សូមជម្រាបសម្តេចតេជោ ហ៊ុន សែន បានដឹកនាំគណៈប្រតិភូទៅចូលរួមកិច្ចប្រជុំមហាសន្និបាតអង្គការសហប្រជាជាតិលើកទី៧៣ កាលពីថ្ងៃទី២៧ កញ្ញា ។ សម្រាប់ដំណើរទស្សនៈកិច្ចសម្តេចក៏បានទទួលជួបពិភាក្សាជាមួយថ្នាក់ដឹកនាំបណ្តាប្រទេសមួយចំនួនដែលមកចូលកិច្ចប្រជុំផងដែរ ។ សម្រាប់កិច្ចប្រជុំនេះគេក៏សង្កេតឃើញថា មានប្រជាពលរដ្ឋខ្មែរស់នៅអាមេរិកបានមកស្វាគមន៍សម្តេចយ៉ាងច្រើនកុះករ ។ ក្នុងក៏មានប្រជាពលរដ្ឋដែលគាំទ្រ និងជឿរការញុះញង់របស់មេបក្សប្រឆាំងបានចេញមកធ្វើបាតុកម្មក្រុមប្រឆាំងផងដែរ ៕
ចែករំលែកព័តមាននេះ