រាជធានីភ្នំពេញ ៖ បន្ទាប់ពីមន្ត្រីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់ បានប្រកាសចាត់ការ និងរឹតបន្តឹងដល់អ្នករកស៊ីដីឡូត៍នៅកម្ពុជា ដែលវិស័យដីឡូត៍កំពុងកក្រើកខ្លាំងនោះ អ្នករកស៊ីពុះដីឡូត៍លក់ និងអ្នកវាយតម្លៃអចលនទ្រព្យ…
រាជធានីភ្នំពេញ ៖ បន្ទាប់ពីមន្ត្រីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់ បានប្រកាសចាត់ការ និងរឹតបន្តឹងដល់អ្នករកស៊ីដីឡូត៍នៅកម្ពុជា ដែលវិស័យដីឡូត៍កំពុងកក្រើកខ្លាំងនោះ អ្នករកស៊ីពុះដីឡូត៍លក់ និងអ្នកវាយតម្លៃអចលនទ្រព្យ បានស្វាគមន៍ចំពោះចំណាត់ការនេះ ។
លោក ជា កុយ អ្នករកស៊ីខាងវិស័យដីឡូត៍នៅប៉ែកខាងលិចរាជធានីភ្នំពេញ ដែលអះអាងថា ជាអ្នករកស៊ីត្រឹមត្រូវទៅតាមច្បាប់ បានលើកឡើងថា លោកចង់ឲ្យមានច្បាប់ទម្លាប់ត្រឹមត្រូវ ដើម្បីគ្រប់គ្រងអាជីវកម្មមួយនេះឲ្យល្អ ព្រោះបច្ចុប្បន្ន មានអ្នកធ្វើអាជីវកម្មដីធ្លី ដីឡូត៍ច្រើនណាស់ ហើយអ្នកខ្លះមិនទាំងមានដីផង ក៏ប្រកាសលក់ដែរ ។
លោកមានប្រសាសន៍ថា ៖« ដូចយើងបានឃើញហើយ បច្ចុប្បន្ននេះការរកស៊ីដីឡូត៍ហាក់ដូចជាធ្វើតាមគ្នា ឃើញគេធ្វើបានចំណេញ ក៏ចេញមកធ្វើជាមួយគេដែរ ទាំងដែលខ្លួនមិនដែលមានបទពិសោធន៍ និងការងារមួយនេះទេ ហើយនៅពេលដែលបរាជ័យ វានឹងធ្វើឲ្យអតិថិជនដែលបានទិញដីពីគម្រោងរបស់គាត់នោះ ក៏នឹងមានបញ្ហាដែរ » ។
ស្រដៀងគ្នានេះដែរ លោក ឌឹត ចណ្ណា អ្នកគ្រប់គ្រងក្រុមហ៊ុនអចលនទ្រព្យឡាក់គី បានឲ្យដឹងថា តាមពិតទៅវិស័យដីធ្លីនេះវាសំខាន់ណាស់ សម្រាប់វិស័យអចលនទ្រព្យ តែបើសិនជាគ្រប់គ្រងមិនបានល្អ ក៏អាចមានបញ្ហាបានដែរ ។
លោកមានប្រសាសន៍ថា ៖« យើងក្រលេកមើលក្នុងវិស័យដីធ្លី ជាសេសវិស័យដីឡូត៍ក្នុងមួយរយៈពេលចុងក្រោយនេះ ហាក់មានកំណើនសកម្មភាពខ្លាំង ក្នុងនោះតំបន់ជាយក្រុងមានសកម្មភាពស្ទុះជាងគេ ព្រោះនៅតំបន់នោះ ដីធ្លីនៅមានតម្លៃសមរម្យនៅឡើយ ខុសពីតំបន់ជិតៗក្រុង »។
លោកបន្តថា សកម្មភាពពុះដ៏ឡូត៍បានជួយដល់ប្រជាពលរដ្ឋកម្ពុជាជាច្រើន ព្រោះអ្នកទិញដីឡូត៍បច្ចុប្បន្ននេះ ភាគច្រើនជាអ្នកមានចំណូលទាប និងមធ្យម ហើយលក្ខខណ្ឌនៃការទិញរបស់ពួកគាត់ ក៏មានភាពងាយស្រួលដែរ គឺពួកគាត់អាចបង់រំលស់ប្រចាំខែ ក្នុងកម្រិតទាប តែបើសិនជាពួកគាត់ចាំទិញដី ទាំងលុយសុទ្ធតែម្ដងគឺត្រូវការសន្សំយូរទើបអាចសម្រេចបាន ។
ទោះយ៉ាងណា លោកថា ៖« បើសិនជាគម្រោងដីនោះមិនមានច្បាប់ ហើយអាជ្ញាធររឹតបន្តឹង វាអាចនឹងមានផលប៉ះពាល់ដល់អ្នកទិញ ដូចនេះលោកចង់ឲ្យក្រសួងពាក់ព័ន្ធ និងអាជ្ញាធរ ត្រូវធ្វើយ៉ាងណាសម្រួលដល់វិនិយោគិនក្នុងវិស័យដីឡូត៍នេះ គោរពតាមច្បាប់ទម្លាប់ឲ្យបានត្រឹមត្រូវ » ។
ចំណែកលោក ប៉ូ អ៊ាវគង់ នាយកគ្រប់គ្រងក្រុមហ៊ុនអចលនទ្រព្យ Advance បានឲ្យដឹងថា កាលណាតម្រូវការកើនឡើង ធ្វើឲ្យការផ្គត់ផ្គង់ក៏កើនឡើងដែរ ។ ជាក់ស្ដែងដោយសារតែមានតម្រូវការលើការទិញដីឡូត៍ច្រើន ទើបអ្នករកស៊ីដីឡូត៍ប្លែកៗថ្មីៗក៏ច្រើនដែរ ទាំងដែលអ្នកនោះ មិនមានបទពិសោធន៍ ឬចំណេះដឹងក្នុងវិស័យនេះទាល់តែសោះ ។
លោកនិយាយថា ៖« កាលពីមុន ការគ្រប់គ្រងអាជីវកម្មដីឡូត៍នៅមានកម្រិត និងមិនទាន់មានការរឹតបន្តឹងច្បាស់លាស់ ដូចនេះ អ្នកមានលុយមានទុនគេអាចទៅទិញដីនៅកន្លែងណាមួយ ហើយពុះជាឡូត៍ ដើម្បីលក់យកចំណេញ ដោយប្រកាសថា ខ្លួននឹងសង់នេះ សង់នោះក្នុងគម្រោងដីដែលលក់ជូនប្រជាពលរដ្ឋ ក៏ប៉ុន្តែនៅពេលលក់ដីអស់ ក៏យកលុយទៅទិញនៅកន្លែងផ្សេង និងពុះជាឡូត៍ ហើយសន្យាដូចមុនៗដដែល » ។
លោកបន្តថា លោកស្វាគមន៍ចំពោះការអនុវត្តច្បាប់របស់អាជ្ញាធរក្នុងការគ្រប់គ្រងគម្រោងដីឡូត៍នានា ដែលកំពុងធ្វើអាជីវកម្មយ៉ាងខ្លាំង ជាពិសេសនៅតំបន់ជាយរាជធានី ។ បើសិនជាមានការរឹតបន្តឹងបានត្រឹមត្រូវ សកម្មភាពនៃការលក់គម្រោងខ្យល់ គម្រោងមិនច្បាស់នឹងបានកាត់បន្ថយច្រើន ហើយអ្នកទិញក៏លែងមានកង្វល់ ឬពិបាកសម្រេចចិត្តដែរ ឲ្យតែទីតាំងដែលខ្លួនគិតថានៅជិត គិតថាល្អ អាចបណ្ដាក់ទុនបានហើយ ៕
ចែករំលែកព័តមាននេះ