ខេត្តព្រះសីហនុ ៖ នៅថ្ងៃទី២៦ ខែកញ្ញា ឆ្នាំ២០១៨ កម្លាំងសមត្ថកិច្ចនគរបាលខេត្តព្រះសីហនុ បានធ្វើការឃាត់ខ្លួនជនជាតិចិន២នាក់ ពីបទចាប់ឃុំបង្ខាំងជនជាតិចិនដូចគ្នាម្នាក់ ជំរិតទារប្រាក់ចំនួន១៥. ០០០ដុល្លារអាមេរិក។ ជនសង្ស័យម្នាក់ឈ្មោះ SHUI TAO ភេទប្រុស អាយុ៣៥ឆ្នាំ មុខរបរមិនពិតប្រាកដ លិខិតឆ្លងដែនលេខ E០៥៥៩៤១៩៥ ស្នាក់នៅមិនពិតប្រាកដ (មិនព្រមប្រាប់ពីកន្លែងស្នាក់នៅ)។ រីឯម្នាក់ឈ្មោះ WEN MENGMENG ភេទប្រុស អាយុ២៩ឆ្នាំ ជនជាតិចិន មុខរបរមិនពិតប្រាកដ លិខិតឆ្លងដែនលេខ ED៥២៨៧១៧៥ ស្នាក់នៅមិនពិតប្រាកដ (មិនព្រមប្រាប់ពីកន្លែងស្នាក់នៅ)។ ចំណែកជនរងគ្រោះឈ្មោះ TIAN WENTAO ភេទប្រុស អាយុ៣១ឆ្នាំ ជនជាតិចិន មុខរបរមិនពិតប្រាកដ លិខិតឆ្លងដែនលេខ ED២៩៣៦៧៦៧ ស្នាក់ភូមិ២ សង្កាត់២ ក្រុង.ខេត្តព្រះសីហនុ។
តាមសមត្ថកិច្ចឲ្យដឹងថា នៅថ្ងៃទី២៥ កញ្ញា វេលាម៉ោងប្រមាណ៧ យប់ មានបុរសជនជាតិចិនម្នាក់ បានទៅរាយការណ៍សមត្ថកិច្ចថា ប្អូនប្រុសរបស់គាត់ត្រូវបានជនជាតិចិនមួយក្រុម ចាប់ឃុំទុកក្នុងបន្ទប់មួយមិនស្គាល់កន្លែង ដោយមូលហេតុ ប្អូនគាត់នៅជំពាក់លុយក្រុមជនជាតិចិនទាំងនោះ ១,៥០០ដុល្លារ ដោយពួកគេបានតម្រូវឲ្យយកលុយសង ទើបដោះលែងប្អូនគាត់មកវិញ។ បន្ទាប់ពីទទួលបាន សេចក្តីរាយការណ៍នោះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានដាក់បទបញ្ជាទៅកម្លាំងជំនាញផែនព្រហ្មទណ្ឌ ឲ្យទៅសហការជាមួយនគរបាលមូលដ្ឋាន បើកការស៊ើបអង្កេតស្រាវជ្រាវជាបន្ទាន់។ ខណៈនោះជនសង្ស័យបាន និងកំពុងណាត់បងប្រុសជនរងគ្រោះ ឲ្យទៅជួបនៅមុខកាស៊ីណូ វ៉ាងឆាវ ស្ថិតក្នុងភូមិ៤ សង្កាត់៤ សមត្ថកិច្ចក៏បានដាក់ការឡោមព័ទ្ធ និង ឃ្លាំចាប់ជនសង្ស័យ។
មិនបានប៉ុន្មានជនជាតិចិន២នាក់ បានទៅជួបបងប្រុសជនរងគ្រោះ ហើយចង់ចាប់បងប្រុសរបស់ជនរងគ្រោះធ្វើជាចំណាប់ខ្មាំងម្នាក់ទៀត តែត្រូវកម្លាំងនគរបាលជំនាញព្រហ្មទណ្ឌ ធ្វើការឃាត់ខ្លួនបានជនសង្ស័យទាំង២នាក់នោះតែម្តងទៅ ។ ក្រោយពេលសមត្ថកិច្ចចាប់ខ្លួនជនសង្ស័យ ស្រាប់តែឃើញជនរងគ្រោះដើរចេញពីកាស៊ីណូ វ៉ាងឆាវ មករកសមត្ថកិច្ចដែរ។ សមត្ថកិច្ចបានដកហូតវត្ថុតាងពីជនសង្ស័យមាន ទូរស័ព្ទដៃ ១គ្រឿង ម៉ាក IPHONE X ពណ៌ស រថយន្ត ០១គ្រឿង ម៉ាក LEXUS RX300 ពណ៌ខ្មៅ ស្លាកលេខ បាត់ដំបង ២A-៦៨៥៥ ។ ករណីនេះបានកើតឡើងដោយសារ កាលពី២ខែមុន ជនរងគ្រោះបានទៅលេងល្បែងនៅកាស៊ីណូ ហ្គាន់តាវ ស្ថិតក្នុងសង្កាត់៤ ក្រុងព្រះសីហនុ។
ហើយបានខ្ចីកាក់ពីក្រុមជនសង្ស័យចំនួន ៣,០០០ដុល្លារអាមេរិក ដើម្បីលេងល្បែង លុះពេលលេងចាញ់អស់លុយ ជនរងគ្រោះ បានសងប្រាក់ទៅឲ្យក្រុនជនសង្ស័យចំនួន១,៥០០ដុល្លារអាមេរិកសិន ដោយសន្យាថា នៅសល់ ១,៥០០ដុល្លារ ទៀតសងពេលក្រោយ។ រហូតដល់ថ្ងៃទី២៣ កញ្ញា វេលាម៉ោង១០យប់ ជនសង្ស័យបានទៅ កាស៊ីណូ វ៉ាងឆាវ ក៏ឃើញជនរងគ្រោះនៅទីនោះ ហើយជនរងគ្រោះនៅតែមិនសងប្រាក់ទៅជនសង្ស័យដែរ ទើបត្រូវបានជនសង្ស័យចាប់ជនរងគ្រោះចូលរថយន្ត យកទៅឃុំនៅកន្លែងស្នាក់នៅរបស់ពួកគេតែម្តងទៅ ។ ជនសង្ស័យទាំង២នាក់ ត្រូវបានសមត្ថកិច្ច កសាងសំណុំរឿងបញ្ជូនទៅសាលាដំបូងខេត្ត៕
ចែករំលែកព័តមាននេះ