រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ក្រសួងការបរទេសចេញផ្សាយនៅថ្ងៃទី២៥ ខែកញ្ញានេះថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងដឹកនាំគណៈប្រតិភូជាន់ខ្ពស់ទៅសាធារណៈរដ្ឋសង្គមនិយមវៀតណាម នៅថ្ងៃទី២៦ ខែកញ្ញា ឆ្នាំ២០១៨ ដើម្បីគោរពវិញ្ញាណក្ខន្ធសពឯកឧត្តម ត្រាន់ ដាយក្វាង អតីតប្រធានាធិបតីនៃសាធារណរដ្ឋសង្គមនិយមវៀតណាមដែលបានទទួលមរណៈភាព នៅថ្ងៃទី២១ ខែកញ្ញា ឆ្នាំ២០១៨ ។
ឥស្សរៈជនកម្ពុជាដែលនឹងអញ្ជើញអមដំណើរសម្តេចតេជោនាយករដ្ឋមន្ត្រី រួមមានសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងសភា ព្រឹទ្ធសភា និងអធិការកិច្ច និងមន្ត្រីជាន់ខ្ពស់មួយចំនួនទៀត នៃរាជរដ្ឋាភិបាលកម្ពុជា ។
នៅថ្ងៃទី២១ ខែកញ្ញា ឆ្នាំ២០១៨ សម្តេចតេជោនាយករដ្ឋមន្ត្រីបានផ្ញើលិខិតរំលែកទុក្ខទៅសមភាគីវៀតណាម ឯកឧត្តម ង្វៀន សួនហ្វ៊ុក ដោយបានបង្ហាញនូវក្តីសោកស្តាយយ៉ាងជ្រាលជ្រៅ ចំពោះមរណៈភាពរបស់ឯកឧត្តម ត្រាន់ ដាយក្វាង ដែលជាការបាត់បង់ដ៏ធំធេងនូវថ្នាក់ដឹកនាំដែលបានបូជាអស់កម្លាំងកាយចិត្ត ដើម្បីលើកកម្ពស់សុខុមាលភាពប្រជាជនវៀតណាម និងទំនាក់ទំនងជាភាតរៈរវាងវៀតណាម និងកម្ពុជា ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ