រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា អ្នកវិនិយោគក្នុងស្រុកមិនទាន់បានវិនិយោគលើវិស័យវាយនភ័ណ្ឌកាត់ដេសម្លៀកបំពាក់និងស្បែកជើង និងវិស័យទេសចរណ៍នៅឡើយ ខណៈការទាញយកតម្លៃបន្ថែមពីវិស័យនេះនៅមានកម្រិត ។
ថ្លែងក្នុងសន្និសីទសាររួមមួយ ស្តីពី ត្រីវិស័យឆ្ពោះទៅកាន់ពិពិធកម្ម និងការផ្លាស់ប្តូរចនាសម្ព័ន្ធសេដ្ឋកិច្ចជំហានបន្ទាប់នៃការអភិវឌ្ឍកម្ពុជា នៅសណ្ឋាគា Raffle Le Royal កាលពីថ្ងៃទី២០ ខែកញ្ញា កន្លងមក លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងនៅថា ពាក់ព័ន្ធនឹងវិស័យធំៗដែលកំពុងជួយបង្កើនចំណូលដល់សេដ្ឋកិច្ចជាតិ ក្នុងនោះវិស័យកម្មន្តសាលនៃផ្នែកកាត់ដេរសម្លៀកបំពាក់ តាមការវិនិយោគទុននៅលើវិស័យនេះ ភាគច្រើនជាអ្នកវិនិយោគបរទេស។ ចំណែកអ្នកវិនិយោគទុនក្នុងស្រុកហាក់ពុំសូវចាប់អារម្មណ៍វិនិយោគនៅលើវិស័យនោះឡើយ ។ ដោយឡែកលើផ្នែកគ្រឿងអេឡិចត្រូនិក ក៏មានតែអ្នកវិនិយោគបរទេសដែរ ដែលកត្តាទាំងនេះគឺយើងចង់ផ្សារភ្ជាប់ឲ្យមានអ្នកវិនិយោគទុនក្នុងស្រុកឲ្យបានច្រើន ដើម្បីចៀសវាងភាពបរាជ័យទីផ្សារក្នុងស្រុក ។
លោករដ្ឋលេខាធិការបន្តថា ៖« ក្រៅពីវិស័យកម្មន្តសាល វិស័យទេសចរណ៍ជាវិស័យមួយកំពុងមានកំណើនល្អផងដែរ ក្នុងនោះអ្វីដែលយើងមានការព្រួយបារម្ភបន្ថែម ខណៈដែលយើងកំពុងទទួលបានភ្ញៀវទេសចរច្រើន តើភ្ញៀវទេសចរទាំងនោះមកស្នាក់នៅរយៈពេលប៉ុន្មាន ? និងមានការចាយវាយប៉ុន្មាន ? ក្នុងនោះតើយើងមានតម្លៃបន្ថែមប៉ុន្មាន ដើម្បីផ្តល់ការនាំចេញតាមរយៈភ្ញៀវទេសរចរត្រឡប់ទៅវិញ ? ដូច្នេះកត្តាទាំងនេះហើយដែលជាការបរាជ័យមួយ ខណៈយើងពុំទាន់មានសក្តានុពលផលិតផលក្នុងស្រុកពិតប្រាកដ »។
លោក វង្សី វិស្សុត បានបញ្ជាក់ថា ដើម្បីពង្រឹកការអភិវឌ្ឍវិស័យទាំងនេះ ក្នុងនោះវិស័យបច្ចេកវិទ្យា គឺជារបត់ថ្មីក្នុមួយក្នុងការផ្សារភ្ជាប់វិស័យសហគ្រាសធុនតូច និងមធ្យម (SME) ទៅនឹងខ្សែសង្វាក់តម្លៃពិភពលោក ដែលជាទិសដៅបង្កើននូវផលិតភាពគ្រប់វិស័យទាំងអស់ ទាំងផ្នែកវិស័យកសិកម្ម កម្មាន្តសាល និងសេវាកម្ម ដែលយើងត្រូវអន្តរាគមន៍ ដើម្បីធ្វើឲ្យមានលក្ខណៈអំណោយផលទៅតាមទីផ្សារ ដោយមិនត្រូវប្រឆាំងទៅនឹងទីផ្សារនោះឡើយ ៕
ចែករំលែកព័តមាននេះ