ទ្រព្យសម្បត្តិលុយកាក់ដែលរកបានមកហើយ ត្រូវសន្សំទុកដាក់ឲ្យបានល្អ ឱ្យបានគង់វង្ស និងត្រូវចេះបែងចែកឲ្យបានសមគួរមានចំណាយលើម្ហូបប្រចាំថ្ងៃ របស់របរសម្រាប់ប្រើប្រាស់ក្នុងផ្ទះ ចិញ្ចឹមឪពុកម្តាយ ចិញ្ចឹមកូន បម្រុងទុកក្នុងពេលចាំបាច់ណាមួយ និងចំណាយធ្វើបុណ្យទានជាដើម ។
0កាលបើយើងចេះបែងចែកលុយកាក់ឱ្យបានល្អនោះ ប្រាក់របស់យើងនឹងអាចសល់ខ្លះតម្កល់ទុកសម្រាប់ទ្រទ្រង់គ្រួសារទៅខាងមុខទៀត ។ លុយកាក់ដែលយើងខំព្យាយាមរកបានមកទាំងយប់ទាំងថ្ងៃនោះ យើងត្រូវដឹងថា វាជាការលំបាកណាស់ទម្រាំបានមក បើយើងធ្វើការរាជការ ការងារតាមស្ថាប័ននានាត្រូវប្រឈមនឹងការហត់នឿយខួរក្បាលដោយសារការគិត ការព្យាយាម។
បើការងាររកស៊ីលក់ដូរវិញក៏លំបាកក្នុងការចំណេញបានបួនប្រាំពាន់ មួយម៉ឺន ដូច្នេះយើងមិនគួរចំណាយទៅលើអ្វីដែលមិនជាការចាំបាច់ ឬចំណាយទៅរបស់ឥតប្រយោជន៍មិនដឹងប្រមាណក្នុងការចាយវាយ ឬយកទៅលេងល្បែងភ្នាល់ជាដើមសុទ្ធតែជាហេតុនាំឱ្យវិនាស ។
ចំណែកយើងជាស្ត្រីកុំឲ្យដូចពាក្យចាស់ពោលថា ស្រីកញ្ជើធ្លុះក្នុងរឿងមារយើង ដែលមានពោលពីនាងកញ្ជើធ្លុះថា នាងមិនបានថែរក្សានូវត្រី កំពឹស ដែលប្តីខំរកបានមកនោះទេ បែរជាគិតតែពីយកឈើចាក់ទម្លុះបាតកញ្ជើឲ្យរឹតតែធ្លុះធំថែម ធ្លាក់ត្រីកំពឹសអស់គ្មានសល់។
ត្រង់នេះចាស់បុរាណលោកសំដៅន័យថា ស្ត្រីខ្លះក្នុងលោកនេះពេលដែលប្តីរកទ្រព្យរកលុយបានមកខ្លួនមិនខំថែរក្សាឲ្យបានគង់វង្សទេ គិតតែពីចាយវាយខ្ជះខ្ជាយឥតដឹងមុខក្រោយ ធ្វើឲ្យទ្រព្យនោះវិនាសអស់រលីង ដល់ពេលមានកិច្ចចាំបាច់រកប្រាក់មួយរៀលគ្មាន ព្រោះហេតុនោះទើបចាស់ៗតែងពោលថា មេស្រីកញ្ជើធ្លុះ ។
ចំពោះការរក្សាទ្រព្យសម្បត្តិឱ្យគង់វង្សនេះមិនថាស្ត្រីឬបុរសទេ គឺយើងត្រូវមានភារកិច្ចជួយគ្នា ថែរក្សាទ្រព្យសម្បត្តិដែលខំរកបានមកទាំងលំបាក ដើម្បីឲ្យនៅគង់វង្សមិនឲ្យវិនាសបាត់បង់ទៅដោយងាយនោះឡើយ ។
ចែករំលែកព័តមាននេះ