រាជធានីភ្នំពេញ ៖ ដោយសារទីផ្សារចេកអំបូងលឿងកើនឡើង បានធ្វើឲ្យឧកញ៉ាធំៗមួយចំនួននៅកម្ពុជាចាប់ផ្តើមបោះទុនវិនិយោគលើដំណាំនេះ ដើម្បីនាំចេញទៅក្រៅប្រទេស ។
លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាដែលបានបោះទុន៣០លានដុល្លារដាំចេកអំបូងលឿងលើផ្ទៃដី១ពាន់ហិកតានៅក្នុងស្រុកឈូក ខេត្តកំពត បានឲ្យដឹងនាព្រឹកថ្ងៃទី១៨ កញ្ញា ថា ទីផ្សារចេកអំបូងលឿងមានភាពល្អប្រសើរ និងមានតម្លៃល្អខ្លាំង បើធៀបនឹងចេកធម្មតានៅក្នុងស្រុក ។ លោកមានប្រសាសន៍ថា ៖« ចេកនេះមិនមែនដាំបាននៅគ្រប់ប្រទេសនោះទេ ប៉ុន្តែកម្ពុជាមានដីដែលអំណោយផលសម្រាប់ដាំចេកនេះ ប៉ុន្តែកន្លងមកមិនសូវមានអ្នកចាប់អារម្មណ៍ ទើបចេកនេះមិនសូវមានដាំនៅកម្ពុជា ។ លោកបន្តថា ៖« យើងអាចនាំចេញចេកប្រភេទនេះចេញពីកម្ពុជាជាលើកដំបូងនៅដើមឆ្នាំ២០១៩ខាងមុខនេះ ប៉ុន្តែបរិមាណជាក់ស្តែងមិនទាន់ដឹងនៅឡើយទេ »។ លោកបន្តថា យើងអាចនាំចេញចេកប្រភេទនេះបានទូទាំងពិភពលោក ដោយសារវាជាចេកមានរសជាតិឆ្ងាញ់ និងអាចរក្សាទុកបានយូរ ងាយស្រួលក្នុងការនាំចេញទៅកាន់ក្រៅប្រទេស »។
លោកឧកញ៉ា ហ៊ុន ឡាក់ បន្ថែមថា នៅកម្ពុជាមានផ្ទៃដីមានជីជាតិដែលអំណោយផលដល់ដំណាំនេះ ប៉ុន្តែកន្លងមកមិនសូវមានអ្នកដាំ ដោយសារការយល់ដឹងនៅមានកម្រិត ទើបធ្វើ ឲ្យដំណាំនេះមិនសូវមានភាពពេញនិយមនៅកម្ពុជា ។ លោកថា ៖« ដំណាំនេះអាចឲ្យផលចំនួន៦០តោនក្នុង១ហិកតាក្នុង១ឆ្នាំ ដែលជាឱកាសល្អសម្រាប់អ្នកដាំដំណាំនេះ »។
ជាមួយគ្នានេះ លោកឧកញ៉ា លឹម ហេងអនុប្រធានសភាពាណិជ្ជកម្មកម្ពុជាបានមានប្រសាសន៍ដែរថា លោកបាននិងកំពុងចាប់ផ្តើមវិនិយោគដាំចេកអំបូងលឿងលើផ្ទៃដី១ពាន់ហិកតានៅក្នុងខេត្តត្បូងឃ្មុំ, កំពង់ចាម និងខេត្តស្ទឹងត្រែង ដើម្បីធ្វើការនាំចេញទៅកាន់ទីផ្សារប្រទេសចិន និងទីក្រុងឌូបៃ ដោយសារប្រទេសទាំងពីរមានតម្រូវការចេកប្រភេទនេះខ្ពស់ ។ លោកឧកញ៉ាមានប្រសាសន៍ថា ៖« យើងមានទីផ្សារទូលំទូលាយ តែអ្វីសំខាន់នាពេលនេះយើងត្រូវដាំចេកឲ្យបាន ដើម្បីនាំចេញទៅកាន់ទីផ្សារទាំងនោះ »។
ចេកអំបូងលឿង ជាពូជចេកមកពីសហរដ្ឋអាមេរិក ដែលជាចេកមានរសជាតិឆ្ងាញ់ និងមានភាពរមួតល្អ ។
លោកឧកញ៉ា លឹម ហេង បានបន្តថា ៖« ជាមួយនឹងផែនការនាំចេញនូវចេកប្រភេទនេះ យើងមានគម្រោងបង្កើតរោងចក្រផលិតម្សៅចេកផងដែរ ព្រោះផ្លែចេកដែលយើងប្រមូលផលបាន មិនប្រាកដអាចនាំចេញបានទាំងអស់ទេ ។ ហេតុនេះយើងទាមទារការកែច្នៃវាទៅជាម្សៅ ដើម្បីប្រើប្រាស់ផលិតអ្វីផ្សេងៗទៀត »។
ទោះជាយ៉ាងណា លោកឧកញ៉មិនបញ្ជាក់ឲ្យដឹងពីទុនវិនិយោគក្នុងគំរោងនេះនៅឡើយទេ ៕
ចែករំលែកព័តមាននេះ