រាជធានីភ្នំពេញ ៖ ប្រតិភូវិនិយោគអាមេរិកមួយក្រុម នឹងមកទស្សនកិច្ចកម្ពុជាដើម្បីស្វែងរក និងពិនិត្យកាលានុវត្តភាពស្វែងរកដៃគូវិនិយោគនៅកម្ពុជានាពេលខាងមុខ ។
ដំណើរទស្សនកិច្ចនេះ នឹងចាប់ផ្តើមពីថ្ងៃទី២៦ដល់២៧ ខែកញ្ញា ខាងមុខដែលរៀបចំដោយសភាពាណិជ្ជកម្មអាមេរិកប្រចាំកម្ពុជា សហការជាមួយស្ថានទូតអាមេរិកប្រចាំកម្ពុជា ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានឲ្យដឹងតាមទូរស័ព្ទនារសៀលថ្ងៃទី១៧ កញ្ញា ថា លោកមិនទាន់ដឹងថាមានថ្នាក់ដឹកនាំក្រុមហ៊ុនអាមេរិកប៉ុន្មាននាក់ពិតប្រាកដដែលនឹងមកទស្សនកិច្ចនៅកម្ពុជាទេ ប៉ុន្តែពួកគេនឹងរៀបចំកម្មវិធីនៅសណ្ឋាគារRosewood នាថ្ងៃទី២៦ កញ្ញា ខាងមុខនេះ។ លោកបន្តថា ក្រុមហ៊ុនទាំងនេះភាគច្រើនជាក្រុមហ៊ុនវិនិយោគលើវិស័យកសិកម្មទាក់ទងនឹងគ្រឿងយន្តកសិកម្មជាដើម ។ លោកបន្តថា ៖« ដំណើរទស្សនកិច្ចរបស់ពួកគេនឹងមកជួបផ្នែកឯកជននៅកម្ពុជាដើម្បីស្វែងរកឱកាស និងដៃគូពាណិជ្ជកម្មនៅទីនេះ »។
លោកបន្តថា ៖« ក្រុមហ៊ុនទាំងនេះសុទ្ធតែមានមូលដ្ឋានវិនិយោគនៅប្រទេសថៃ វៀតណាម និងសិង្ហបុរីរួចហើយ ហេតុនេះយើងមានសង្ឃឹមច្រើនថាពួកគេនឹងមកវិនិយោគនៅកម្ពុជា »។ តាមព័ត៌មានក្រៅផ្លូវការពីស្ថានទូតអាមេរិកបានឲ្យដឹងថា ប្រតិភូវិនិយោគិនអាមេរិកនេះ ដំបូងឡើយគ្រោងទស្សនកិច្ចនៅកសិដ្ឋានដ៏ធំរបស់លោកឧកញ៉ា ម៉ុង ឫទ្ធី ប៉ុន្តែគម្រោងនេះទំនងជាលុបចោលវិញ ដោយសារពេលវេលាមានកំណត់។ ហេតុនេះប្រតិភូនឹងទស្សនកិច្ចនៅសហគ្រាសផលិតនំស្រួយលី លីជំនួសវិញ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting បានថ្លែងថា នៅកម្ពុជាមិនមានគម្រោងវិនិយោគរបស់អាមេរិកច្រើនទេ ដោយសារសហរដ្ឋអាមេរិកស្វែងរកការវិនិយោគផ្នែកបច្ចេកវិទ្យាច្រើន ខណៈកម្ពុជាមិនទាន់មានសក្តានុពលលើផ្នែកនេះនៅឡើយ ទាំងធនធានមនុស្ស និងការអភិវឌ្ឍផ្នែកបច្ចេកវិទ្យានៅមានកម្រិត ។
លោកបន្តថា ៖« កត្តាទីផ្សារក៏ជាផ្នែកមួយផងដែរ ព្រោះទីផ្សាររបស់យើងតូច មិនឆ្លើយតបនឹងគម្រោងអភិវឌ្ឍន៍ធំៗនៅឡើយទេ » ។លោកថា ៖« ប្រសិនជាសហរដ្ឋអាមេរិកចង់ចូលមកវិនិយោគផ្នែកកសិកម្ម ទាក់ទងនឹងសុវត្ថិភាពអាហារ ឬផលិតអាហារសរីរាង្គជារឿងប្រសើរ ប៉ុន្តែត្រូវមានការគាំទ្រ និងរៀបចំពីរាជរដ្ឋាភិបាលជាមុន » ៕
ចែករំលែកព័តមាននេះ