រាជធានីភ្នំពេញ ៖ ក្រោយរដ្ឋាភិបាលអាណត្តិទី៦បង្កើតឡើងបានប្រមាណ២សប្តាហ៍ មកនេះ សកម្មភាពនៃការវិនិយោគពីវិនិយោគិនជាតិ និងអន្តរជាតិ បានកើនឡើងយ៉ាងខ្លាំងនៅកម្ពុជា ។ នេះបើតាមការអះអាងពីអ្នកជំនាញនានា ។
លោកស្រី តាំង ហួរ អគ្គនាយិកាក្រុមហ៊ុន AMATAK Property Service Co, Ltd បានឲ្យតាមទូរស័ព្ទនាព្រឹកថ្ងៃទី១៧ កញ្ញា ម្សិលមិញថា លោកស្រីបានជួបជាមួយអ្នកវិនិយោគជាតិ និងអន្តរជាតិជាច្រើនក្នុងមួយរយៈពេលចុងក្រោយនេះ ដោយពួកគេបានសម្តែងការកោតសរសើរសម្តេចតេជោ ហ៊ុន សែន ដែលបាននាំមកនូវសុខសន្តិភាព ពិសេសការបង្រួបបង្រួមគណបក្សនយោបាយចំនួន១៩ទៀត ឲ្យចូលរួមផ្តល់មតិយោបល់ផ្សេងៗ ដើម្បីជាចំណែកចូលរួមអភិវឌ្ឍន៍ប្រទេស ។
លោកស្រីបន្តថា ៖« ដោយសារសកម្មភាពនយោបាយមានលក្ខណៈល្អប្រសើរ និងមានភាពចាស់ទុំនេះ បានធ្វើឲ្យអ្នកវិនិយោគជាតិ និងអន្តរជាតិបានចាប់ផ្តើមមានសកម្មភាពវិនិយោគកាន់តែច្រើននៅកម្ពុជា »។ លោកស្រីថា ៖« ការរក្សាបានសន្តិភាព ស្ថិរភាពនយោបាយ ពិសេសសេដ្ឋកិច្ចល្អប្រសើរនេះហើយ ទើបតម្លៃដីបានឡើងថ្លៃស្ទើរគ្រប់ទីកន្លែង »។
យោងតាមរបាយការណ៍របស់ក្រសួងរបចំដែនដី នគរូបនីយកម្ម និងសំណង់ បានឲ្យដឹងថា រយៈពេល៨ខែឆ្នាំ២០១៨នេះ ទុនវិនិយោគក្នុងវិស័យសំណង់មានចំនួនទឹកប្រាក់ជិត៣ពាន់លានដុល្លារអាមេរិក ដោយមានគម្រោងសំណង់ជិត២០០០គម្រោងត្រូវបានចុះបញ្ជី ។
អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានឲ្យដឹងផងដែរថា ជាការពិតក្រោយការរៀបចំរដ្ឋាភិបាលថ្មីរួច អ្នកវិនិយោគក្នុងស្រុក និងអ្នកវិនិយោគអន្តរជាតិ បានចាប់ផ្តើមវិនិយោគឡើងវិញយ៉ាងឆាប់រហ័ស ។ ពួកគេសម្រេចចិត្តលឿន បើធៀបនឹងការបោះឆ្នោតអាណត្តិមុនៗ ដោយសារពួកគេមិនមានអ្វីគួរឲ្យបារម្ភនោះទេ ។
អ្នកនាងបន្តថា ៖« អ្នកទាំងនោះបានវិនិយោគលើផ្នែកចម្រុះរួមមាន សណ្ឋាគារ អាផាតម៉ិន ការិយាល័យ និងវិនិយោគលើដីធ្លីជាដើម ហើយថ្មីៗនេះមានព័ត៌មានថាអ្នកវិនិយោគមកពីអឺរ៉ុប និងអាមេរិក ក៏នឹងចូលមកស្វែងរកឱកាសវិនិយោគនៅកម្ពុជាផងដែរ ដែលនេះជាចំណុចវិជ្ជមាន ហើយយើងស្វាគមន៍ » ។
គួររំឭកថា កាលពីចុងខែសីហា មានក្រុមហ៊ុនធំៗនៅអឺរ៉ុបគ្រោងមកបោះទុនវិនិយោគលើវិស័យបដិសណ្ឋារកិច្ចនៅកម្ពុជា ដោយពួកគេអះអាងថា កម្ពុជាជាប្រទេសល្អប្រសើរសម្រាប់ការវិនិយោគ និងកំណើនទេសចរអន្តរជាតិកើនឡើងកាន់តែច្រើនឡើងៗ ។
លោក Mauro Gasparotti នាយកគ្រប់គ្រងនៃក្រុមហ៊ុន Savills Hotels បានថ្លែងក្នុងសន្និសីទសារព័ត៌មានមួយថា ៖« យើងបានឃើញភាពលូតលាស់យ៉ាងឆាប់រហ័សនៅក្នុងវិស័យបដិសណ្ឋារកិច្ចនៅកម្ពុជា ដែលនឹងជំរុញនូវការអភិវឌ្ឍផ្នែកសណ្ឋាគារនាថ្ងៃអនាគត ។ វាធ្វើឲ្យយើងរំជើបរំជួល ដោយសារវានាំមកនូវឱកាសថ្មីដ៏សំខាន់សម្រាប់អតិថិជន ជាអ្នកអភិវឌ្ឍន៍របស់យើងដែលមានលទ្ធភាពក្នុងការច្នៃប្រឌិត »។
ក្នុងឱកាសនោះដែរ លោក Christian Puchher នាយកប្រចាំទ្វីបអាស៊ីនៃសណ្ឋាគារHilton បានមានប្រសាសន៍ថា ជាមួយនឹងប្រាក់ចំណូលកើនឡើង និងភាពងាយស្រួលនៃការធ្វើដំណើរតាមយន្តហោះ ទេសចរនិងអ្នកជំនួញជាច្រើនត្រូវបានទាក់ទាញមកកាន់ប្រទេសកម្ពុជា ដែលជាគោលដៅនៃប្រាសាទ និងប្រវត្តិសាស្ត្រដ៏អស្ចារ្យរបស់ខ្លួន, ឆ្នេរខ្សាច់ដ៏ស្រស់ស្អាត និងតំបន់ទេសចរណ៍ធម្មជាតិជាច្រើនទៀត ហើយជាការពិតណាស់ភ្ញៀវទេសចរទាំងនេះរំពឹងថានឹងមានបន្ទប់សណ្ឋាគារល្អៗ លើសពីអ្នកធ្វើទេសចរណ៍ធម្មតា ។ លោកបន្តថា ៖« យើងគ្រោងនឹងចាប់ដៃគូជាមួយក្រុមហ៊ុនក្នុងស្រុក ដើម្បីវិនិយោគសណ្ឋាគារនាពេលឆាប់ៗនៅក្នុងប្រទេសដ៏អស្ចារ្យមួយនេះ »៕
ចែករំលែកព័តមាននេះ