ខេត្តកណ្ដាល ៖ កម្មករ-កម្មការនីរោងចក្រកាត់ដេរ ស៊ី ខេ ជាង១ពាន់នាក់ បានផ្ទុះការតវ៉ាបិទផ្លូវជាតិលេខ៣ ទាំងព្រឹក
ព្រោះខឹងថៅកែ ដកប្រធានក្រុមកម្មករចេញ កម្មករបានទាមទារឲ្យថៅកែទទួលយកប្រធានក្រុមនោះ ចូលធ្វើការវិញ ព្រមទាំងទាមទារនូវលក្ខខណ្ឌការងារមួយចំនួនទៀត ឲ្យថៅកែដោះស្រាយផងដែរ ។
ហេតុការណ៍នោះបានកើតឡើងកាលពីវេលាម៉ោង៩ព្រឹក ថ្ងៃទី៨ ខែកក្កដា ឆ្នាំ២០២៦ នៅត្រង់ចំណុចមុខរោងចក្រកាត់ដេរ អាយ ខេ ស្ថិតនៅតាមផ្លូវជាតិលេខ៣ ចន្លោះគីឡូម៉ែត្រលេខ២៧-លេខ២៨ ជិតផ្សារព្រៃទទឹង ក្នុងភូមិអន្លង់រមៀតខាងលិច ឃុំអន្លង់មៀត ស្រុកកណ្តាលស្ទឹង ខេត្តកណ្តាល ។
កម្មករបាននិយាយថា ពួកគាត់បានបម្រើការងារនៅក្នុងរោងចក្រខាងលើរយៈពេល១០ឆ្នាមកហើយ ចំណែកប្រធានក្រុមកម្មករ គឺជាជនជាតិខ្មែរ រហូតមកដល់សព្វថ្ងៃ។ ដោយប្រធានក្រុមរូបនោះ គឺជាមនុស្សល្អ តែងតែមានការយោគយល់អធ្យាស្រ័យ ចំពោះកម្មករទាំងអស់ ប៉ុន្តែនៅពេលថ្មីមកនេះ ស្រាប់តែថៅកែរោងចក្រ បានដកប្រធានកម្មករនោះចេញ ។
កម្មករ បាននិយាយបន្តទៀតថា បន្ទាប់ពីកើតរឿងបែបនេះភ្លាម បានធ្វើឲ្យពួកគាត់កើតទុក្ខ មិនសុខចិត្ត និងធ្វើការតវ៉ា ដើម្បីទាមទារឲ្យថៅកែទទួលយកប្រធានក្រុមចូលធ្វើការងារវិញ។ ព្រមទាំងទាមទារ នូវលក្ខខណ្ឌការងារមួយចំនួនទៀតផងដែរ ប៉ុន្តែថៅកែ មិនព្រម ទទួលយកវិញទេ ហើយក៏មិនព្រមដោះស្រាវអ្វីទាំងអស់។ ដោយសារគ្មានដំណោះស្រាយបែបនេះ ទើបពួកគាត់នាំគ្នាចេញពីរោងចក្រយកដាកបារ៉ាស់ទៅដាក់ទទឹងផ្លូវជាតិលេខ៣ និងឈរបិទផ្លូវនោះ ដើម្បីពន្លឿនការដោះស្រាយឲ្យបានលឿន ។
សមត្ថកិច្ច បានប្រាប់ថា ការធ្វើបាតុកម្មបិទផ្លូវនោះ បានធ្វើឲ្យផ្លូវជាតិលេខ៣ មានការកកស្ទះចរាចរទាំងទិសដៅចូលរាជធានីភ្នំពេញ និងចេញពីរាជធានីភ្នំពេញ។ ដោយឡែកអាជ្ញាធរ និងសមត្ថកិច្ចស្រុកកណ្ដាលស្ទឹង រួមជាមួយមន្ត្រីជំនាញ នៃក្រសួងការងារ និងបណ្តុះបណ្តាលវិជ្ជាជីវៈ បានចុះធ្វើការសម្របសម្រួលជាមួយកម្មករភ្លាមៗដែរ ។
សមត្ថកិច្ច បានប្រាប់ឲ្យដឹងបន្តថា រហូតដល់ម៉ោង១០ព្រឹកថ្ងៃខែឆ្នាំដដែល ក្រុមកម្មករ ក៏បានយល់ព្រមបើកផ្លូវឡើងវិញ ហើយយានយន្តគ្រប់ប្រភេទក៏ធ្វើចរាចរបានជាធម្មតាឡើងវិញដែរ។ រីឯមន្ត្រីជំនាញ នៃក្រសួងការងារ និងបណ្តុះបណ្តាលវិជ្ជាជីវៈ បានជួបប្រជុំជាមួយតំណាងកម្មករនិយោជិត និងតំណាងក្រុមហ៊ុន នៅក្នុងរោងចក្រនោះ ដើម្បីដោះស្រាយស្រាយបញ្ហានេះហើយ ៕
ចែករំលែកព័តមាននេះ