អ្នករដើរកម្សាន្តក្នុងក្រុងបាត់ដំបង ត្រូវប្រុងប្រយ័ត្នយានយន្តរបស់ខ្លួន ត្រឹមមួយប៉ព្រិចភ្នែកលោកចោរស៊ីដាច់ម៉ូតូម្ដង០២គ្រឿង
- បាត់ដំបង
ខេត្តបាត់ដំបង ៖ ត្រឹមមួយប៉ព្រឹចភ្នែកប៉ុណ្ណោះ លោកចោរបានកាច់សោរ.កលួចយកម៉ូតូម្ដង០២គ្រឿក្នុងពេលតែមួយនៅម៉ោងប្រហែល៧ និង៣០នាទីយប់ថ្ងៃទី០៩ កក្កដា នៅពេលម្ចាស់ម៉ូតូទាំង០២គ្រឿងបានជិះទៅដើរលេងនៅមាត់ស្ទឹងសង្កែ និងបានទុកម៉ូតូជាមួយគេឯងនៅក្បែរមាត់ស្ទឹងត្រើយខាងលិច (ខាងជើងវិមានឯករាជ្យ) នៅម្ដុំខាងមុខមន្ទីរសុរិយោដីខេត្តចំកណ្ដាលបេះដូងក្រុងបាត់ដំបងតែម្ដង ។
ប្រភពព័ត៌មានបានឱ្យដឹងថា ម៉ូតូដែលត្រូវលោកចោរដៃឆើតលួចយកទៅទាំង០២គ្រឿងនោះមាន៖ ១-ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២៤ ពាក់ស្លាកលេខបាត់ដំបង 1AV-4891 អ្នកជិះម៉ូតូ ឬអ្នកជិះឈ្មោះ ខុស សុភចិត្រា ភេទស្រី អាយុ១៥ឆ្នាំ និង២-ម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០២៦ ពាក់ស្លាកលេខបាត់ដំបង 1AZ-7769 ម្ចាស់ម៉ូតូ ឬអ្នកជិះឈ្មោះ នី អានីតា ភេទស្រី អាយុ១៦ឆ្នាំ ជនរងគ្រោះរបស់នៅសង្កាត់អូរម៉ាល់ ក្រុងបាត់ដំបង ។
ប្រភពដដែលបានបញ្ជាក់ថា ជនរងគ្រោះទាំង០២នាក់នេះ បានបាត់ម៉ូតូព្រមៗគ្នា ដែលពួកនាងទុកក្បែរគ្នា ជាមួយនឹងម៉ូតូគេឯងជាច្រើនគ្រឿងទៀត នៅក្បែរមាត់ស្ទឹង ខាងមុខមន្ទីរសុរយោឌីខេត្ត ។
បើតាមការស្រង់សម្ដីពីសាច់ញាតិ ពួកនាងបានជិះម៉ូតូទៅទុកក្បែរគេឯង រួចនាំគ្នាដើរលេងកម្សាន្តមាត់ស្ទឹងជាមួយនឹងមនុស្សយ៉ាងច្រើនកុះករក្នុងថ្ងៃដំបូងនៃពិធី «ពីព័រណ៏ផ្លែឈើបាត់ដំបង» ។ ប៉ុន្តែបន្តិចក្រោយមក ពេលពួកនាងដើរត្រឡប់មកយកម៉ូតូវិញ ស្រាប់តែបាត់ម៉ូតូពីកន្លែងទុក ហើយនាំគ្នាស្វែងរកយ៉ាងណាក៏មិនឃើញទើបដឹងថា ម៉ូតូពួកនាងទាំង០២គ្រឿងដែលទុកក្បែរគ្នានោះ ត្រូវចោរលួចបាត់ទៅហើយ ។
ក្រោយពីជឿជាក់ថា ម៉ូតូត្រូវលោកចោរលួចយកទៅបាត់ ពួកនាងក៏បានទៅដាក់ពាក្យបណ្ដឹងនៅកន្លែងអធិការក្រុងបាត់ដំបង និងប្ដឹងនៅកន្លែងកងរាជអាវុធហត្ថផង ដើម្បីសុំឲ្យជួយអន្តរាគមន៏រកម៉ូតូនិងតាមចាប់ចោរ ។
សូមបញ្ជាក់ដែរថា នៅរ៉បមាត់ស្ទឹងសង្កែត្រើយខាងលិច ម្ដុំខាងជើងវិមានឯករាជ្យ (ខាងមុខមន្ទីរសុរិយោឌីខេត្ត) គេសង្កេតឃើញអ្នកដើរកម្សាន្ត ឬអ្នកដើរហាត់ប្រាណភាគច្រើន ជិះម៉ូតូយកទៅទុកតម្រៀបគ្នាជាជួរនៅរ៉បមាត់ស្ទឹងនោះ ។ ប៉ុន្តែនៅក្បែរៗនោះ ក៏មានសន្តិសុខការពារជាប្រចាំដែរ តែកម្លាំងសន្តិសុខប៉ុន្មាននាក់នោះ ពួកគេទទួលខុសត្រូវ និងការពារតែកន្លែងទីតាំងដែលពួកគេទទួលផ្ញើម៉ូតូរបស់ពួកគេ ដែលមានចម្ងាយពីគ្នាប្រហែលពី៣០ ទៅ៤០ម៉ែត្រប៉ុណ្ណោះ (កន្លែងផ្ញើ និងកន្លែងមិនផ្ញើ) ដូច្នេះ ក្រុមសន្តិសុខទាំងនោះមិនខ្វល់ខ្វាយនឹងយានយន្តអ្នកដទៃ ដែលទុកនៅកន្លែងផ្សេងឡើយ បើទោះជានៅរ៉បមាត់ស្ទឹងក្បែរគ្នាក្ដី ។
ដោយឡែក ពាក់ព័ន្ធនឹងសកម្មភាព «ចោរលួចម៉ូតូម្ដង០២គ្រឿង» ឯណេះវិញ បើតាមការលើកឡើងពីសមត្ថកិច្ចបានសន្និដ្ឋានជាបឋមថា ជនដៃដល់អាចមានបក្ខពួកលើសពី០២នាក់ ដែលបានធ្វើសកម្មភាពកាច់សោ «លួចយកម៉ូតូម្ដង០២គ្រឿង»នេះ ។ ពួកគេអាចមករង់ចាំមុខ ដើម្បីតាមដានរាល់សកម្មភាពម្ចាស់ម៉ូតូ ដែលជិះយកទៅទុកនៅទីនោះ ដោយខ្វះការប្រុងប្រយ័ត្ន ហើយពួកចោរក៏ឆក់ឱកាស ចាប់ផ្ដើមធ្វើសកម្មភាពភ្លាមៗលឿនដូចភ្លេកបន្ទោរ នៅពេលឃើញម្ចាស់វ៉ៃជន្ទល់ទុកម៉ូតូចាក់សោ.ក រួចដើរចេញធ្វើព្រងើយ។ នេះជាល្បិចលោកចោរដែលបានសារភាព ពេលដែលត្រូវសមត្ថកិច្ចក្របួច.កជាប់កន្លង
មក ។
ពួកចោរតែងលួចម៉ូតូដែលម្ចាស់ជិះទុកភ្លាម ដើរចេញភ្លែត ។ ប៉ុន្តែបើម៉ូតូណាដែលទុកចោលយូរ មិនដឹងម្ចាស់មួយណា លោកចោរហាក់ញញើតបន្តិច ព្រោះខ្លាចម្ចាស់ម៉ូតូក្របួចជាប់ តែបើម៉ូតូទុកនៅតាមចម្ការ ឬនៅតាមស្រែ លោកចោរស៊ីផុយ ។ នេះជាបទពិសោធន៍របស់សមត្ថកិច្ចដែលធ្លាប់សួរចម្លើយជនសង្ស័យលួចម៉ូតូ ។
យ៉ាងណាក្ដី មានតែការប្រុងប្រយ័ត្នដោយខ្លួនឯងទេ ទើបធានាបាននូវសុវត្ថិភាព ។ ដូច្នេះក្នុងឱកាសចូលរួមសប្បាយៗក្នុងពិធី« ពីព័រណ៌ផ្លែឈើបាត់ដំបង» នៅថ្ងៃទី០៩ និងទី១៩ កក្កដា នេះ សូមបងប្អូនប្រជាពលរដ្ឋដែលធ្វើដំណើរកម្សាន្ត មេត្តាប្រុងប្រយ័ត្ននូវយានយន្តក្ដី ឬទ្រព្យសម្បត្តិដាក់ជាប់ខ្លួនក្ដី ចៀសវាងសប្បាយក្លាយជាទុក្ខ ៕
ចែករំលែកព័តមាននេះ