ខេត្តកំពង់ចាម ៖ ផ្លូវដីក្រាលក្រួសក្រហម និងផ្លូវដីចាក់ថ្មក្នុងឃុំស្តៅ និងឃុំកងតាណឹង ស្រុកកងមាសប្រវែងជាង១៧គីឡូម៉ែត្រក្នុងនោះមានកន្លែងខ្លះហុយឡើងទ្រលោម បង្កផលវិបាកដល់ពលរដ្ឋរស់នៅសងខាងផ្លូវ និងអ្នកធ្វើដំណើរតាមកង់ម៉ូតូដែលព្រួយបារម្ភពីជំងឺផ្លូវដង្ហើម ថែមទាំងហុយចូលដល់ក្នុងផ្ទះទៀត ជួនពេលខ្លះមានរថយន្តធំដឹកអិដ្ឋបើកឆ្លងកាត់ឡើងញ័ររញ្ចួយផងដែរ…
ខេត្តកំពង់ចាម ៖ ផ្លូវដីក្រាលក្រួសក្រហម និងផ្លូវដីចាក់ថ្មក្នុងឃុំស្តៅ និងឃុំកងតាណឹង ស្រុកកងមាសប្រវែងជាង១៧គីឡូម៉ែត្រក្នុងនោះមានកន្លែងខ្លះហុយឡើងទ្រលោម បង្កផលវិបាកដល់ពលរដ្ឋរស់នៅសងខាងផ្លូវ និងអ្នកធ្វើដំណើរតាមកង់ម៉ូតូដែលព្រួយបារម្ភពីជំងឺផ្លូវដង្ហើម ថែមទាំងហុយចូលដល់ក្នុងផ្ទះទៀត ជួនពេលខ្លះមានរថយន្តធំដឹកអិដ្ឋបើកឆ្លងកាត់ឡើងញ័ររញ្ចួយផងដែរ ។
លោក សាន សំអុល អាយុ៣១ឆ្នាំ នៅភូមិទី៩ ឃុំកងតាណឹង ស្រុកកងមាស ប្រាប់ឲ្យដឹងថា ផ្លូវដីនៅខាងមុខផ្ទះរបស់គេរាល់ថ្ងៃនេះត្រូវបានក្រាលក្រួសក្រហមដោយមានរថយន្តតូចធំបើកឆ្លងកាត់ទៅវិញទៅសឹងតែ២៤ម៉ោងតែម្តង ។ មានពេលខ្លះរថយន្តធំដឹកទំនិញបើកកាត់មិនដឹងជាផ្ទុកទង្ងន់ប៉ុន្មានទេដោយបានញ័ររញ្ជួយផ្ទះ ហើយបានធ្វើឲ្យសមាជិកក្រុមគ្រួសារបស់គាត់ពិបាកនឹងដេកពួនថែមទៀត ។
លោក សាន សំអុល ប្រាប់បន្តថា ផ្លូវនេះបានធ្វើការជួសជុលបន្តបន្ទាប់ចំនួន២លើកមកហើយរួមទាំងលើកនេះទៀតជាមួយនោះសូមឲ្យមន្ទីរសាធារណៈការខេត្តរួមទាំងអាជ្ញាធរស្រុកមេត្តាជួយដាក់ស្លាកសញ្ញានៅតាមដងផ្លូវ ដើម្បីបញ្ចៀសការពារកុំឲ្យមានគ្រោះថ្នាក់ចរាចរណ៏កើតឡើងនៅតាមដងផ្លូវព្រោះរាល់ថ្ងៃនេះម៉ូតូ និងរថយន្ត បើកលឿនៗពិតជាគួរឲ្យព្រួយបារម្ភ ។ មិនតែប៉ុណ្ណោះផ្លូវបានហុយថែមទៀតពេលដែលកំពុងតែនាំគ្នាហូបបាយបើមានរថយន្តបើកឆ្លងកាត់មុខផ្ទះនឹងហុយចូលផ្ទះ ហើយសូមពន្លឿនការជួសជុលឲ្យបានឆាប់ផងដែរ ។
អាជីវករឈ្មោះ ហ៊ន់ ស្រីមុំ អាយុ៤៤ឆ្នាំ នៅភូមិទី៥ ឃុំកងតាណឹងប្រាប់ថា ចាប់តាំងពីពេលដែលគាត់បានកើតនៅភូមិនេះមកបានឃើញតែផ្លូវដីតូចហើយចង្អៀតថែមទៀតផង ។ មកដល់ក្នុងឆ្នាំ២០១៨នេះត្រូវបានអាជ្ញាធរបានគិតគូរពីការលំបាករបស់ពលរដ្ឋដោយបានយកគ្រឿងចក្រមកពង្រីកឆូសឆាយឲ្យបានធំទូលាយជាងមុនពិតជាស្រួលធ្វើដំណើរមែន ។
លោក សុខ ស្រ៊ុន ប្រធានមន្ទីរសាធារណការ និងដឹកជញ្ជូនខេត្តប្រាប់ឲ្យដឹងនៅរសៀលថ្ងៃទី១៧ កញ្ញា ថាកំណាត់ផ្លូវដីក្រាលក្រួសក្រហមក្នុងឃុំស្តៅ ស្រុកកងមាស ដែលមានផលវិបាកក្នុងការធ្វើដំណើរនោះត្រូវបានលោកអភិបាលខេត្តបានឲ្យជំនាញមន្ទីររបស់លោកដឹកយកគ្រឿងចក្រចុះទៅជួយជួសជុលមានប្រវែងជាង៥គីឡូម៉ែត្រចាក់កំទេចថ្ម និងក្នុងពេលខាងមុខនេះនឹងក្រាលកៅស៊ូដើម្បីឲ្យពលរដ្ឋងាយស្រួលធ្វើដំណើរឆ្លងកាត់ទៅវិញទៅមកដឹកកសិផលមកកាន់ទីផ្សារ ។
ចំណែកផ្លូវក្រាលក្រួសក្រហមជាង១០គីឡូម៉ែត្រទៀតត្រូវបានកងកម្លាំងវិស្វកម្មបានជួសជុលក្នុងឃុំស្តៅ និងឃុំកងតាណឹង ស្រុកកងមាសនេះ ដើម្បីបង្កលក្ខណៈងាយស្រួលដល់ពលរដ្ឋដែលក្នុងពេលខាងមុខនឹងប្រែក្លាយទៅផ្លូវកៅស៊ូលែងជាក្តីកង្វល់ទៀតហើយ ៕
ចែករំលែកព័តមាននេះ