ខេត្តត្បូងឃ្មុំ៖ ចាប់ពីត្រង់ចំណុចផ្សារសែនតស៊ូ ក្នុងឃុំព្រះធាតុ ស្រុកអូររាំងឪ ដល់ព្រំប្រទល់ស្រុកស៊ីធរកណ្តាល ខេត្តព្រៃវែង មានចំងាយ១៧គីឡូម៉ែត្រ ត្រូវបានក្រសួងអភិវឌ្ឍន៏ជនបទបានចុះស្ថាបនាផ្លូវនេះដោយពង្រីកធំទូលាយជាងមុន និងចាក់កៅស៊ូថែមទៀត ដែលរហូតមកដល់ពេលនេះសំរេចបានប្រមាណ៥០ភាគរយហើយ ។
អ្នកស្រីឈ្មោះ ពៅ យឿង អាយុ៦៥ឆ្នាំ នៅភូមិពង្រ ឃុំពង្រ ស្រុកកោះសូទិន ខេត្តកំពង់ចាមប្រាប់ឲ្យដឹងថា ផ្លូវថ្នល់កាត់តាមមុខផ្ទះរបស់គាត់នេះ កាលពីមុនមកមានសភាពហុយ និងពិបាកដល់ការធ្វើដំណើរផងដែរ ។
សព្វថ្ងៃគាត់បានឃើញគ្រឿងចក្រជាច្រើនគ្រឿង បានចុះមកស្ថាបនាផ្លូវដោយបានកិនបង្ហាប់ដី និងចាក់ថ្ម ព្រមទាំងពង្រីកធំថែមទៀត ដែលបង្កលក្ខណៈងាយស្រួលក្នុងការធ្វើដំណើរកាត់តាមផ្លូវសែនតស៊ូ ចូលមកជីហែកោះសូទិន ហើយក្នុងរដូវបិណ្ឌភ្ជុំខាងមុខនេះពលរដ្ឋងាយស្រួលយកចង្ហាន់ទៅវត្ត ។ ពេលដែលបានផ្លូវល្អហើយ សូមឲ្យពលរដ្ឋដែលបើកបរម៉ូតូ និងរថយន្តសូមបន្ថយល្បឿន កុំបើកបរក្នុងល្បឿនលឿនពេក ចៀសវាងកុំឲ្យមានគ្រោះថ្នាក់ចរាចរណ៍កើតឡើងចំពោះខ្លួនឯង និងអ្នកដទៃជាយថាហេតុ ។
ចំណែកអ្នកស្រីឈ្មោះ ឡេង យឿន អាយុ៦៤ឆ្នាំ នៅភូមិទួលឃ្លាំង ឃុំព្រះធាតុ ស្រុកអូររាំងឪ ខេត្តត្បូងឃ្មុំ ប្រាប់ថា ផ្លូវនេះមានការលំបាកធ្វើដំណើរជាង១០ឆ្នាំមកហើយ នៅពេលភ្លៀងម្តងៗបែកភក់ ហើយរអិលថែមទៀតផង ផ្លូវដីនេះត្រូវបានគេជួសជុលជាបន្តបន្ទាប់២ទៅ៣ដងមកហើយដែរ ។
រាល់ថ្ងៃត្រូវបានគេស្ថាបនាថ្មី ដោយបានពង្រីកធំត្រៀមចាក់កៅស៊ូក្នុងពេលខាងមុខ ។ ប្រសិនបើអាជ្ញាធរគ្រប់លំដាប់ថ្នាក់ជួយដាក់អំពូលភ្លើងនៅពេលរាត្រីទៀតកាន់តែប្រសើរ ។
លោកអាន ស៊ីណា ប្រធានមន្ទីរអភិវឌ្ឍន៏ជនបទខេត្តត្បូងឃ្មុំបានឲ្យដឹងនៅល្ងាចថ្ងៃទី១៦កញ្ញា២០១៨ថា ផ្លូវនេះជាគម្រោងរបស់ក្រសួងអភិវឌ្ឈន៏ជនបទ ដោយបានតភ្ជាប់ពីផ្លូវសែនតស៊ូដល់ព្រំប្រទល់ស្រុកស៊ីធរកណ្តាល ខេត្តព្រៃវែង មានចំងាយ១៧គីឡូម៉ែត្រ ដោយចាក់កៅស៊ូថែមទៀតផងសម្រាប់ឲ្យពលរដ្ឋងាយស្រួលធ្វើដំណើរនិងដឹកកសិផលផ្សេងមកកាន់ទីផ្សារ ៕
ចែករំលែកព័តមាននេះ