ខេត្តបន្ទាយមានជ័យ ៖ រដ្ឋបាលក្រុងប៉ោយប៉ែត សូមជម្រាបជូនព័ត៌មានដល់បងប្អូនប្រជាពលរដ្ឋរស់នៅសង្កាត់និមិត្តទាំងអស់ឲ្យបានជ្រាបថា នៅប៉ុន្មានថ្ងៃចុងក្រោយនេះ មានភ្លៀងធ្លាក់ជាបន្តបន្ទាប់ ធ្វើឲ្យកម្ពស់ទឹកនៅអាងអូខៃដន ហក់ឡើងខ្ពស់ខ្លាំងឈានដល់ប្រកាសអាសន្ន។
នៅថ្ងៃទី១៧ កញ្ញា ២០១៨ វេលាម៉ោង៥ល្ងាច តាមការពិនិត្យនៅចំណុចទំនប់ប៉ែកខាងត្បូងអាង ទឹកបានឡើងខ្ពស់ជិតលិចខ្នងទំនប់ អាចឲ្យទំនប់នេះបាក់ជាយថាហេតុ ធ្វើឲ្យលិចភូមិសុខសាន្តទាំងស្រុង រីឯភូមិមួយចំនួនទៀត ដូចជាភូមិរស្មីសេរីភាព ភូមិកូបធំ ភូមិរស្មីសាមគ្គី ភូមិអន្លង់ស្វាយ និងភូមិដុងអារញ្ញទទួលរងផលប៉ះពាល់ខ្លាំង។
ដោយឡែកក្រុមហ៊ុនអានកូ បានកាយទំនប់ប៉ែកខាងជើងដាក់លូ ដើម្បីបង្ហូរទឹកចេញពីអាង អាចធ្វើឲ្យភូមិមួយចំនួនរងការលិចដូចជាកូនដំរី និងភូមិសូរិយា រីឯភូមិដទៃទៀតនៅរ៉បដងផ្លូវជាតិលេខ៥ ក៏រងផលប៉ះពាល់ផងដែរ។ ដើម្បីសុវត្ថិភាព និងបង្ការការគ្រោះថ្នាក់ផ្សេងៗ រដ្ឋបាលក្រុង សូមអំពាវនាវឲ្យបងប្អូនប្រជាពលរដ្ឋទាំងអស់មានការប្រុងប្រយ័ត្នខ្ពស់ ទុកដាក់សម្ភារ របស់របរប្រើប្រាស់ និងសត្វចិញ្ចឹមគ្រប់ប្រភេទទុកនៅទីទួលសុវត្ថិភាព។ អាស្រ័យហេតុនេះ សូមបងប្អូនប្រជាពលរដ្ឋទាំងអស់ជ្រាបជាព័ត៌មាន៕
ចែករំលែកព័តមាននេះ