រាជធានីភ្នំពេញ ៖ អ្នកលក់ និងអ្នកឲ្យចំណីព្រាបនៅមុខព្រះបរមរាជវាំងចាប់ពីថ្ងៃនេះតទៅប្រឈមនឹងការផាកពិន័យមិនលើកលែងទៀតឡើយ ក្រោយពីកម្លាំងប្រជាការពារខណ្ឌដូនពេញ បានហៅអ្នកលក់ចំណីព្រាបទាំងអស់មកធ្វើកិច្ចសន្យាឲ្យបញ្ឈប់លក់នៅមុខព្រះបរមរាជវាំង តែអនុញ្ញាតឲ្យលក់ចំណីព្រាបនៅខាងជើងវេទិកាបុណ្យអ៊ុំទូកក្បែររូបសំណាក់ព្រះអង្គចៅជាប់នឹងមាត់ទន្លេប៉ុណ្ណោះ ។ លោក សុខ…
រាជធានីភ្នំពេញ ៖ អ្នកលក់ និងអ្នកឲ្យចំណីព្រាបនៅមុខព្រះបរមរាជវាំងចាប់ពីថ្ងៃនេះតទៅប្រឈមនឹងការផាកពិន័យមិនលើកលែងទៀតឡើយ ក្រោយពីកម្លាំងប្រជាការពារខណ្ឌដូនពេញ បានហៅអ្នកលក់ចំណីព្រាបទាំងអស់មកធ្វើកិច្ចសន្យាឲ្យបញ្ឈប់លក់នៅមុខព្រះបរមរាជវាំង តែអនុញ្ញាតឲ្យលក់ចំណីព្រាបនៅខាងជើងវេទិកាបុណ្យអ៊ុំទូកក្បែររូបសំណាក់ព្រះអង្គចៅជាប់នឹងមាត់ទន្លេប៉ុណ្ណោះ ។
លោក សុខ ពេញវុធ អភិបាលខណ្ឌដូនពេញបានឲ្យដឹងថា ចាប់ពីពេលនេះទៅមិនអនុញ្ញាតឲ្យមានអ្នកលក់ចំណីព្រាប និងអ្នកឲ្យចំណីព្រាបលើសួនច្បារមុខព្រះបរមរាជវាំងទៀតឡើយ ព្រោះកន្លងមកវាធ្វើឱ្យប៉ះពាល់យ៉ាងខ្លាំងដល់បរិស្ថាន អនាម័យ ខណៈពេលសត្វព្រាបទាំងនោះជុះអាចម៍នៅមុខព្រះបរមរាជវាំង និងលើសួនច្បារ ។ ហើយសាលាខណ្ឌបានអនុញ្ញាតឲ្យបងប្អូនអ្នកលក់ចំណីព្រាប និងអ្នកឲ្យចំណីព្រាបនៅខាងជើងវេទិកាបុណ្យអ៊ុំទូកក្បែររូបសំណាក់ព្រះអង្គចៅមាត់ទន្លេ ដែលទីតាំងនេះវាងាយស្រួលដល់កម្លាំងប្រជាការពារក្នុងការបាញ់ទឹកលាងសំអាតអាចម៍ព្រាប និងដើររើសថង់កៅស៊ូដែលច្រកចំណីព្រាប ។
លោកអភិបាលខណ្ឌបញ្ជាក់ថា ក្រោយពីទទួលការណែនាំពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ ក៏ដូចជាក្រសួងព្រះបរមរាជវាំងរួចមក រដ្ឋបាលខណ្ឌដូនពេញ ធ្វើការប្រជុំផ្សព្វផ្សាយណែនាំ និងសំណូមពរបងប្អួនអាជីវករលក់ចំណីសត្វព្រាប លក់ផ្កាស្លាធម៌ លក់សត្វចាប ថតរូបនៅខាងក្រោយព្រះអង្គដង្កើ និងសួនព្រះបរមរាជវាំងមកដល់ថ្ងៃនេះ អាជ្ញាធរយើងណែនាំឲ្យបងប្អូនអាជីវករទៅលក់ដូរ និងបាចចំណីសត្វព្រាបនៅចំណុចការ៉ូឡាខាងមុខព្រះអង្គក្រចៅ ឬខាងជើងវេទិកាបុណ្យអុំទូកវិញ និងអ្នកលក់ផ្កានៅព្រះអង្គដង្កើ ព្រះអង្គក្រចៅ ឲ្យចូលលក់ក្នុងស្តង់ខាងត្បូងព្រះអង្គដង្កើ ដែលបានរៀបចំជូនបងប្អូន ។
រដ្ឋបាលខណ្ឌដូនពេញសង្កេតឃើញថា បងប្អូនអ្នកលក់ចំណីសត្វព្រាប លក់ផ្កាស្លាធម៌ លក់ចាប និងសេវាកម្មថតរូប បានអនុវត្តតាមការណែនាំរបស់អាជ្ញាធរល្អប្រសើរ ប៉ុន្តែទន្ទឹមនឹងនេះ ក៏មានបងប្អូនមួយចំនួនតូចមិនគោរពតាមការណែនាំទេ ធ្វើឲ្យប៉ះពាល់ដល់សណ្តាប់ធ្នាប់ ដោយដើរជាន់លើស្មៅ និងមានសំរាម ឬចំណីព្រាបនៅលើការ៉ូឡា ជាហេតុប៉ះពាល់ដល់អនាម័យបរិស្ថានផងដែរ ។
ដូច្នេះរដ្ឋបាលខណ្ឌដូនពេញ សូមធ្វើការណែនាំ និងអង្វរយ៉ាងទទូចដល់បងប្អូនអាជីវករ ប្រជាពលរដ្ឋគ្រប់មជ្ឈដ្ឋានដែលមកលេងកម្សាន្ត ឬគោរពបូជា សូមមេត្តាយោគយល់ អធ្យាស្រ័យ ចូលរួមសហការជាមួយអាជ្ញាធរមូលដ្ឋាន ក៏ដូចជាទីសាធារណៈនានាក្នុងរាជធានីភ្នំពេញទាំងមូល ដើម្បីរួមចំណែកលើកកម្ពស់សោភ័ណភាពក្នុងរាជធានីភ្នំពេញរបស់យើងប្រកបដោយភាពទាក់ទាញ ។
លោកសុខ ពេញវុធ ឲ្យដឹងទៀតថា ចាប់ពីពេលនេះទៅលេងមានការអនុគ្រោះដល់បងប្អូនអ្នកលក់ចំណីព្រាបនៅលើសួនច្បារមុខព្រះបរមរាជវាំងទៀតហើយ ។ បើសិនមិនគោរពតាមគោលការណ៍នេះទេ គឺប្រឈមនឹងផាកពិន័យ ក្នុងនោះអ្នកឲ្យចំណីព្រាប (មុខព្រះបរមរាជវាំង) និងអ្នកបោះចោលសំរាមត្រូវពិន័យចំនួន២ម៉ឺនរៀល, អ្នកលក់ចំណីព្រាបមុខព្រះបរមរាជវាំង និងលក់គ្រឿងហូបចុកហើយបោះចោលសម្រាបត្រូវពិន័យចំនួន៥ម៉ឺនរៀល, ហាងលក់ដូរតាមផ្ទះ និងភោជនីយដ្ឋានយកសំរាមដាក់ខុសម៉ោងកំណត់ត្រូវពិន័យ១៥ម៉ឺនរៀល, សិប្បកម្ម សហគ្រាសត្រូវពិន័យ២០ម៉ឺនរៀល បើសិនជាលើកទីមួយពិន័យហើយនៅតែមិនតាមគោលការនេះទេ ត្រូវបានពិន័យគុណតែម្តង ។
ចែករំលែកព័តមាននេះ