រាជធានីភ្នំពេញ ៖ យុវជន២នាក់ស្លាប់បាត់បង់ជីវិតភ្លាមៗនៅនឹងកន្លែងកើតហេតុ ខណៈជិះម៉ូតូដេញវាយគ្នាជ្រុលចង្កូតទៅបុកជាមួយរថយន្តមួយគ្រឿងមានដឹកដូង ក្នុងទិសដៅបញ្ច្រាសគ្នាយ៉ាងពេញទំហឹង កាលពីវេលាម៉ោង៣និង២០នាទីទៀបភ្លឺថ្ងៃទី១៦ ខែកញ្ញា ឆ្នាំ២០១៨ នៅចំណុចមុខសួនវឌ្ឍនៈនៅតាមបណ្ដោយផ្លូវជាតិលេខ៣ ស្ថិតក្នុងភូមិទួលស្លែ សង្កាត់ក្រាំងពង្រ ខណ្ឌដង្កោ ។
ជនរងគ្រោះទាំង២នាក់ដែលស្លាប់ខាងលើ ម្នាក់ឈ្មោះ ហេង វិថី ភេទប្រុស អាយុ១៦ឆ្នាំ ជាសិស្ស រស់នៅភូមិជ្រៃ ឃុំជង្រុក ស្រុកគងពិសី ខេត្តកំពុងស្ពឺ និងជាម្ចាស់ម៉ូតូ និងម្នាក់ទៀតឈ្មោះខាត់ ធារ៉ា ភេទប្រុស អាយុ១៨ឆ្នាំ មុខរបបនៅផ្ទះ ភូមិផ្សារគុមឬស្សី ឃុំតាំងដូង ស្រុកបាទី ខេត្តតាកែវ។
តាមប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញរថយន្តមួយគ្រឿងម៉ាក KAI ពណ៌ខៀវ ពាក់ស្លាកលេខ កំពត ១A-១៨០៣ មានដឹកដូង ធ្វើដំណើរតាមបណ្ដោយផ្លូវជាតិលេខ៣ ឡើងពីខេត្តកំពតមកភ្នំពេញ ក្នុងទិសដៅលិចកើត លុះមកដល់ចំណុចកើតហេតុ ក៏ស្រាប់តែមានម៉ូតូ៦ទៅ៧គ្រឿងមាន ប្រុស មានស្រីជិះប្រហែលជាង១០នាក់ បើកបរតាមបណ្តោយផ្លូវជាតិលេខ៣ ក្នុងទិសដៅពីកើតទៅលិចដោយដៃខ្លះកាន់ខ្សែក្រវាត់ និងដុំថ្មជិះម៉ូតូដេញវាយគ្នាពេញផ្លូវ ។
ប្រភពដដែលបានបន្តថា ពេលនោះមានយុវជន២នាក់ជិះម៉ូតូមួយគ្រឿងម៉ាកស៊ុយហ្សុ៊យគីឡេត ពណ៌ស ពាក់ស្លាកលេខ កណ្ដាល ១U-២៦១៩ បើកបរក្នុងល្បឿនយ៉ាងលឿន ហើយក៏រេចង្កូតចូលទៅខាងចំណែកផ្លូវរថយន្ត បុករថយន្តយ៉ាងពេញទំហឹង បណ្ដាលឲ្យយុវជន២នាក់បោកក្បាលជាមួយរថយន្តនិងថ្នល់ស្លាប់ភ្លាមៗក្នុងថ្លុកឈាមទាំង២នាក់យ៉ាងអាណោចអាធ័ម រីឯម៉ូតូបានខ្ទេចផ្នែកខាងមុខទាំងស្រុង ។ ភ្លាមៗម្ចាស់រថយន្តក៏បានបន្តដំណើរទៅដល់គោលដៅ២៤ម៉ោងរបស់សមត្ថកិច្ច ដែលនៅក្បែរកន្លែងកើតហេតុប្រហែលមួយគីឡូម៉ែត្រក៏ឈប់រថយន្តដើម្បីឱ្យសមត្ថកិច្ចឃាត់ខ្លួនយកទៅប៉ុស្ដិ៍តែម្ដង ។
ក្រោយកើតហេតុ មានសាច់ញាតិសពជនរងគ្រោះជាច្រើននាក់បានមកដល់កន្លែងកើតហេតុទាំងអាម្មណ៍តក់ស្លុត ទួញយំបោកខ្លួនសោកស្ដាយជនរងគ្រោះដែលស្លាប់ ។ បន្ទាប់មកសមត្ថកិច្ចជំនាញចរាចរណ៍បានធ្វើការវាស់វែងយកម៉ូតូ និងរថយន្ត ព្រមទាំងអ្នកបើកបររថយន្តប្រគល់ឲ្យការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ចាត់ការតាមនីតិវិធី ។
ចំណែកសពជនរងគ្រោះទាំង២នាក់ សមត្ថកិច្ចក៏បានធ្វើកំណត់ហេតុប្រគល់ឲ្យក្រុមគ្រួសារយកទៅធ្វើបុណ្យនៅឯស្រុកកំណើតតាមប្រពៃណី៕
ចែករំលែកព័តមាននេះ