រាជធានីភ្នំពេញ ៖ អាជ្ញាធរជាតិព្រះវិហារ មានផែនការជួសជុលជណ្ដើរបុរាណខាងជើង នៃប្រាសាទព្រះវិហារ នៅដើមខែតុលាខាងមុខនេះ ដើម្បីការពារ និងអភិរក្សប្រាសាទកុំឲ្យទ្រុឌទ្រោម បន្តទៀត។ លោក…
រាជធានីភ្នំពេញ ៖ អាជ្ញាធរជាតិព្រះវិហារ មានផែនការជួសជុលជណ្ដើរបុរាណខាងជើង នៃប្រាសាទព្រះវិហារ នៅដើមខែតុលាខាងមុខនេះ ដើម្បីការពារ និងអភិរក្សប្រាសាទកុំឲ្យទ្រុឌទ្រោម បន្តទៀត។ លោក គង់ ពុទ្ធិការ អគ្គនាយកអាជ្ញាធរជាតិព្រះវិហារ បានឲ្យដឹងថា នៅផ្នែកជណ្ដើរបុរាណ ខាងជើងមានលក្ខណៈបាក់ស្រុតខ្លាំង ដោយសារទទួលរងការហូរច្រោះទឹក កាត់ពីលើរាប់ពាន់ឆ្នាំ មកហើយនោះ។ លោកបញ្ជាក់ថា ចំពោះការងារស្ដារជណ្ដើរនេះ ខាងអាជ្ញាធរជាតិបានស្នើទៅ រដ្ឋាភិបាលសហរដ្ឋអាមេរិក នៅដើមឆ្នាំ២០១៨ ហើយទទួលបានការឯកភាពពីរដ្ឋាភិបាល សហរដ្ឋអាមេរិក និងបានមូលនិធិជំហានដំបូង ក្នុងការជួសជុលនេះ។
អាជ្ញាធរបានទទួលបានមូលនិធិ ពីសហរដ្ឋអាមេរិក គឺយើងអាចចាប់ផ្ដើមពីខែតុលានេះទៅហើយ យើងធ្វើការជួសជុលមុនសម្រាប់ជណ្ដើរ បុរាណខាងជើង ហើយសម្រាប់ការជួសជុលគោលបូរៈទាំង៥នេះ គឺយើងរង់ចាំតែលទ្ធផលពីក្រុមការងារ បច្ចេកររបស់ប្រទេសដែលជាដៃគូររបស់យើង ហើយយើងសង្ឃឹមថា អាចនឹងបានលទ្ធផលនៅក្នុង ឆ្នាំ២០១៨នេះ។ លោក គង់ ពុទ្ធិការ បានបញ្ជាក់ថា ការជួសជុលប្រាសាទព្រះវិហារ គឺអាជ្ញាធរជាតិ គោរពទៅតាមបទដ្ឋានស្តង់ដាររបស់គណៈកម្មការបេតិកភណ្ឌពិភពលោក គឺត្រូវរក្សាបាននៅសភាពដើម ពីបុរាណនៃតួប្រាសាទការជួសជុសនៅត្រង់កន្លែងដែលគ្រោះថ្នាក់ និងកន្លែងដែលមានបញ្ហាប៉ុណ្ណោះ ដើម្បីកុំឲ្យប្រាសាទកាន់តែបាក់បែកដួលរលំបន្តទៀត។
ជាមួយគ្នានេះដែរ កម្ពុជានឹងបន្តសហការ ជាមួយបណ្តាប្រទេសជាដៃគូរមួយចំនួនទៀត ក្នុងគម្រោងជួសជុលប្រាសាទព្រះវិហារនៅ គោលបុរៈទាំង៥នៃប្រាសាទព្រះវិហារ ក្នុងនោះរួមមាន គោលបុរៈទី១.២.និងទី៣ គឺជួសជុលដោយ អ្នកជំនាញការចិន គោលបុរៈទី៤ គឺប្រទេសរុស្ស៊ី និងគោលបុរៈទី៥ គឺភាគីប្រទេសឥណ្ឌា។ សូមបញ្ជាក់ថា សំណង់ប្រាសាទព្រះវិហារត្រូវបានចាប់ផ្តើមកសាងឡើងដំបូងនៅដើមសតវត្សទី៩ ក្នុងរជ្ជកាលព្រះបាទជ័យវរ្ម័នទី២(៨០២-៨៥០) ហើយបានចូលជាសម្បត្តិបេតិកភណ្ឌពិភពលោក នៅថ្ងៃទី៧ ខែកក្ដដា ឆ្នាំ២០០៨៕
ចែករំលែកព័តមាននេះ