លោកសួង សុភ័ណ្ឌដាក់ពាក្យប្តឹងទារ៥០០លានរៀលពីលោកសូន សេរីរដ្ឋាបីបទបរិហារកេរ្តិ៍
- ភ្នំពេញ
រាជធានីភ្នំពេញ ៖ លោក សួង សុភ័ណ្ឌ ប្រធានគណបក្សអំណាចខ្មែរនៅព្រឹកថ្ងៃទី១៤ ខែកញ្ញា ឆ្នាំ២០១៨នេះ បានដាក់ពាក្យប្តឹងលោក សួន…
រាជធានីភ្នំពេញ ៖ លោក សួង សុភ័ណ្ឌ ប្រធានគណបក្សអំណាចខ្មែរនៅព្រឹកថ្ងៃទី១៤ ខែកញ្ញា ឆ្នាំ២០១៨នេះ បានដាក់ពាក្យប្តឹងលោក សួន សេរីរដ្ឋា អតីតប្រធានគណបក្សអំណាចខ្មែរពីបទបរិហារកេរ្តិ៍ជាសាធារណៈដោយសារ តែអតីតប្រធានគណបក្សបានចោទរូបលោកថា បានក្លែងលិខិតលាលែងតាមរយៈការធ្វើសន្និសីទសារព័ត៌មានផ្សាយតាមសារព័ត៌មាននានា និងការដាក់លិខិតទៅកាន់ក្រសួងមហាផ្ទៃ ។
លោក សួង សុភ័ណ្ឌ បានលើកឡើងថា សូមលោកប្រធានតុលាការជ្រាបថា លោក សួន សេរីរដ្ឋាបានលាលែងពីប្រធានគណបក្សអំណាចខ្មែរជាផ្លូវការមួយវិញទៀត លោកត្រូវបានតុលាការផ្តន្ទាទោសចេញសាលដីកាជាទណ្ឌិត ហើយតាមផ្លូវច្បាប់សូម្បីតែសិទ្ធិជាប្រជាពលរដ្ឋក៏ត្រូវបានដកហូតមិនត្រឹមតែតួនាទីតាមច្បាប់គណបក្សនយោបាយ និងច្បាប់វិសោធនកម្មច្បាប់នេះគណបក្សនេះដាច់ខាតត្រូវបានរំលាយបាត់ទៅហើយ ។ លោកថា«ខ្ញុំសូមសំណូមពរសុំផ្តន្ទាទោសជនល្មើសតាមច្បាប់ និងសូមទាមទារសំណងរដ្ឋប្បវេណី៥០០លានរៀល» ។
គួរបញ្ជាក់ថា លោក សួន សេរីរដ្ឋា អតីតប្រធានគណបក្សអំណាចខ្មែរនៅព្រឹកថ្ងៃទី១៣ ខែកញ្ញា ឆ្នាំ២០១៨នេះ បានថ្លែងពេលសន្និសីទកាសែត លោកបានលើកឡើងថា តុលាការបានផ្តន្ទាទោសលោកដាក់ពន្ធនាគារ៥ឆ្នាំ ហើយត្រូវបានព្រះមហាក្សត្រលើកលែងទោសដល់រូបលោក ។ លោកថា«អ្វីដែលលោកចាប់អារម្មណ៍ គឺគណបក្សអំណាចខ្មែរដែលខ្ញុំបានបង្កើត និងដឹកនាំរយៈពេល១ឆ្នាំ និងខ្ញុំបានផ្តល់សិទ្ធិជាប្រធានស្តីទីដល់លោក សួង សុភ័ណ្ឌ ដឹកនាំគណបក្សនេះ» ។ លោកបានចោទលោកប្រធានស្តីទីដោយលើកឡើងថា រយៈពេល១ឆ្នាំនេះមិនបានធ្វើសកម្មអ្វីទាំងអស់ សូម្បីលើកស្លាកគណបក្សនៅតាមខេត្តក្រុង ។សកម្មភាពអប់រំពលរដ្ឋពីសិទ្ធិនយោបាយដែលគណបក្សធ្លាប់ធ្វើក៏អត់មានដែរ ។ រយៈពេលជាង១ឆ្នាំនេះលោកសួង សុភ័ណ្ឌ បានយកគណបក្សអំណាចខ្មែរជាគណបក្សសកម្មផ្នែកនយោបាយនេះនៅពេលរូបលោកជាប់ពន្ធនាគារ ។ លោក សួន សេរីរដ្ឋា បានអះអាងថា គណបក្សរបស់លោកបានបង្កើតឡើង ក្រោយពេលបោះឆ្នោត២០១៣ ។
លោកបានលើកឡើងថា«លិខិតក្លែងក្លាយនេះត្រូវបានដាក់ផ្សាយតាមបណ្តាញសង្គមជាសាធារណៈ ។ ខ្ញុំមិនដែលលាលែងពីប្រធានបក្សទេ ខ្ញុំបានចុះហត្ថលេខាតែងតាំងលោក សួង សុភ័ណ្ឌ ជាប្រធានស្តីទីមិនដែលសុំលាលែងទេ ។ នេះជាបទឧក្រិដ្ឋមួយ ហើយបានស្នើដល់ក្រសួងមហាផ្ទៃពិនិត្យលើឯកសារដែលោកសួង សុភ័ណ្ឌ ដាក់ចូលក្រសួងមហាផ្ទៃកន្លងមក ។ លោកថា នៅពេលលោកជាប់ពន្ធនាគារគ្មានសិទ្ធិក្នុងការតវ៉ាផ្លូវច្បាប់តែពេលនេះលោកបានសេរីភាព និងអាចតវ៉ាផ្លូវច្បាប់បាន ។ លោកបានបញ្ជាក់ថាសូមសម្តេចក្រឡាហោម ស ខេង ធ្វើកោសល្យវិច្ច័យលើកលិខិតលាលែងដែលលោក សួង សុភ័ណ្ឌ បានដាក់ជូនក្រសួងមហាផ្ទៃដែលរូបលោកមិនបានចុះហត្ថលេខាសោះ ។ សូមឲ្យពិនិត្យលើប្រវត្តិរូបមនុស្សមួយចំនួនដែលគ្មានឈ្មោះសោះ ហើយនេះជាការឆបោករដ្ឋាភិបាល និងក្រសួងមហាផ្ទៃផង ។ ចំពោះបុគ្គលនៃគណបក្សនេះ ព្រោះកាលណាធ្វើបែបនេះវាប៉ះពាល់ដល់ប្រទេសកម្ពុជាទាំងមូលនៅពេលដែលគណបក្សនយោបាយមួយមិនទាន់ទទួលបានអាសនៈផងបែរជាប្រព្រឹត្តបែបនេះ ។
លោកបានលើកឡើងថា អនុប្រធានមួយចំនួនត្រូវបានដាក់ជំនួសអ្នកដែលកំពុងស្ថិតនៅក្នុងតួនាទីដែលពួកគាត់មិនបានសុំលាលែងផង ។ មានការដោះដូរសញ្ញាគណបក្សដោយគ្មានការយល់ព្រមពីប្រធាន អនុប្រធានបក្ស ហើយសកម្មភាពនេះរំលោភលើសមាជិក ចំណុចចុងក្រោយលោកនឹងបញ្ជូនសំណុំរឿងនេះទៅតុលាការចាត់ការលោក សួង សុភ័ណ្ឌ តែម្តង បន្ទាប់ពីស្នើឲ្យក្រសួងមហាផ្ទៃពិនិត្យមើលករណីនេះជាមុន ។
លោកសួង សុភ័ណ្ឌប្រធានស្តីទីគណបក្សអំណាចខ្មែរបានពន្យល់លោក សួង សេរីរដ្ឋា បានសុំលាលែងពីគណបក្សអំណាចខ្មែរមែន ។ លោកបានលើកឡើងថា នៅពេលលោក សួង សេរីរដ្ឋា ត្រូវបានចាប់ខ្លួនតាមផ្លួវច្បាប់គណបក្សត្រូវរំលាយតាមច្បាប់គណបក្សនយោបាយ និងច្បាប់វិសោធនកម្មគណបក្ស ៕
ចែករំលែកព័តមាននេះ