រាជធានីភ្នំពេញ ៖ មន្ត្រីជាន់ខ្ពស់ក្រសួងប្រៃសណីយ៍ និងទូរគមនាគមន៍ បានឱ្យដឹងថា វិស័យបច្ចេកវិទ្យា គមនាគមន៍ និងព័ត៌មានវិទ្យានាពេលបច្ចុប្បន្ន បានកំពុងដើរតួយ៉ាងសំខាន់ក្នុងទំនាក់ទំនងនឹងជីវិត និងវិស័យផ្សេងៗទៀត ។
ថ្លែងក្នុងពិធីបិទវគ្គបណ្ដុះបណ្ដាលក្រុមស្ម័គ្រចិត្តបច្ចេកវិទ្យាគមនាគមន៍ និងព័ត៌មាន (ICT)កម្ពុជា ឆ្នាំ២០១៨ លោក ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានមាន
ប្រសាសន៍ថា សព្វថ្ងៃនេះបច្ចេកវិទ្យាគមនាគមន៍ និងព័ត៌មាន ហៅកាត់ថា ICT បានដើរតួសំខាន់ខ្លាំងណាស់ មិនត្រឹមតែចំពោះការទំនាក់ទំនងក្នុងជីវិតប្រចាំថ្ងៃប៉ុណ្ណោះទេ វិស័យនេះជាធាតុមួយដែលមិនអាចខ្វះបាននៅក្នុងគ្រប់វិស័យទាំងអស់ដូចជាវិស័យជំនួញ វិស័យទូរគមនាគមន៍ វិស័យអប់រំ វិស័យកសិកម្ម វិស័យសេដ្ឋកិច្ច ជាដើម ។
លោករដ្ឋមន្ត្រីបន្ដថា ៖« ដូច្នេះ មន្ត្រីរាជការ លោកគ្រូ-អ្នកគ្រូ សិស្សានុសិស្ស ត្រូវយកចិត្តទុកដាក់រៀនប្រើ ICT និងចេះប្រើបច្ចេកវិទ្យា ICT ដើម្បីលើកកម្ពស់ប្រសិទ្ធភាពការងារឱ្យបានកាន់តែប្រសើរ និងផលិតភាពការងារឱ្យបានច្រើន និងលឿនជាងមុន » ។
លោក ម៉ាឡូឡូស ចូចូ អគ្គនាយកធនាគារឯកទេសវីង បានឲ្យដឹងថា តម្រូវការប្រើប្រាស់សេវាកម្មបែបឌីជីថលនៅកម្ពុជា កំពុងតែមាននិន្នាការកើនឡើងគួរឲ្យកត់សម្គាល់ ដូចជាការទូទាត់តាមប្រពន្ធ័ QR Code ជាដើម ។
លោកមានប្រសាសន៍ថា ៖« ប្រទេសកម្ពុជាកំពុងខិតកាន់តែជិត និងក្លាយជាសង្គមមួយដែលមានប្រព័ន្ធអេកូនៃការទូទាត់ដោយមិនប្រើសាច់ប្រាក់ »។
លោកបន្តថា ការទូទាត់តាមទូរសព្ទ័ចល័តកំពុងក្លាយជាការពេញនិយមយ៉ាងខ្លាំងក្នុងចំណោមភ្ញៀវទេសចរចិនដែលជាទេសចរជាប់ចំណាត់ទី១នៅកម្ពុជា ។ ជាក់ស្ដែងបច្ចុប្បន្ននេះ ក្នុងចំណោមភ្ញៀវទេសចរទាំងអស់ មាន៩០%ហើយដែលជ្រើសរើសយកការទូទាត់តាមទូរស័ព្ទចល័ត ។
រដ្ឋលេខាធិការក្រសួងប្រៃសណីយ៍ និងទូរគមនាគមន៍ លោកបណ្ឌិត កាន ច័ន្ទមេត្តា បានឲ្យដឹងថា បច្ចុប្បន្ននេះ កំណើននៃការប្រើប្រាស់បច្ចេកវិទ្យានៅកម្ពុជាកាន់តែកើនឡើង ស្របពេលកម្ពុជាកំពុងឆ្ពោះទៅរកសេដ្ឋកិច្ចឌីជីថល ។
លោកថ្លែងថា ៖« តាមរយៈក្រសួងប្រៃសណីយ៍ និងទូរគមនាគមន៍ បាននិងកំពុងគិតគូរសហការ និងស្នើឲ្យវិស័យឯកជនពិនិត្យមើលលទ្ធភាពក្នុងការវិនិយោគលើបច្ចេកវិទ្យា និងបណ្ដុះបណ្ដាលធនធានមនុស្ស » ។
ការវិវត្តនៃវិស័យបច្ចេកវិទ្យានេះ នៅរយៈ ពេល៥ឆ្នាំខាងមុខ អ្វីដែលរាជរដ្ឋាភិបាលប្រមើលមើល និងមានទស្សនវិស័យក្នុងការអភិវឌ្ឍប្រទេសជាតិ សេដ្ឋកិច្ច និងសង្គម គឺចង់ប្រែក្លាយកម្ពុជាឆ្ពោះទៅរកប្រទេសសេដ្ឋកិច្ចឌីជីថល ។
យោងតាមការចេញផ្សាយដោយនិយ័តករ ទូរគមនាគមន៍កម្ពុជាបានឲ្យដឹងថា ពាក់កណ្តាលឆ្នាំ២០១៨នេះ ស្ថិតិនៃអ្នកប្រើប្រាស់អុីនធើរណេតក្នុងប្រទេសកម្ពុជា មានប្រមាណ១០,៩លាននាក់ ។ ដោយឡែកចំនួនអ្នកប្រើប្រាស់បណ្តាញព័ត៌មានសង្គម មានប្រហែល៦លាន២សែននាក់ ៕
ចែករំលែកព័តមាននេះ