រាជធានីភ្នំពេញ ៖ បុរសជាជនជាតិកូរ៉េម្នាក់បើកបររថយន្តឡិចស៊ីសមួយគ្រឿងក្នុងល្បឿនលឿនមិនប្រយ័ត្នក៏ជ្រុលទៅបុករថយន្តមួយគ្រឿងទៀតដែលបត់ឆ្លងផ្លូវហើយ នៅមិនទាន់អស់ល្បឿនក៏ជ្រុលទៅបុកតូបជួសជុលម៉ូតូប្រក់សង្ក័សីមួយកន្លែង កាលពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី១១ ខែកញ្ញា ឆ្នាំ២០១៨ ត្រង់ចំណុចខ្លោងទ្វារចក្រចូលបុរីសែនសុខ តាមបណ្ដោយផ្លូវ៥៩៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញបុរសពីរនាក់ ដោយបុរសម្នាក់ជាអ្នកបើកបររថយន្តមួយគ្រឿងម៉ាក កាមរីហាយប្រ៊ីត ពណ៌ស ពាក់ស្លាកលេខ ភ្នំពេញ ២AE-១៦៨០ ធ្វើដំណើរតាមបណ្ដោយផ្លូវ៥៩៨ ក្នុងទិសដៅពីស្ពានអាកាស៧មករាឆ្ពោះទៅអតីតរង្វង់មូលកាំកូស៊ីធី លុះមកដល់ចំណុចកើតហេតុ រថយន្តខាងលើក៏បានបត់ឆ្វេងផ្លូវចូលបុរីសែនសុខ ពេលនោះស្រាប់តែមានរថយន្តមួយគ្រឿងទៀតម៉ាក ឡិចស៊ីស RX300 ពណ៌ស ពាក់ស្លាកលេខ ភ្នំពេញ ២S-០៤០២ បើកបរដោយបុរសជាជនជាតិកូរ៉េម្នាក់ មកពីក្រោយក្នុងល្បឿនយ៉ាងលឿនខ្វះការប្រុងប្រយ័ត្នក៏ជ្រុលទៅបុករថយន្តម៉ាកហាយប្រ៊ីតខាងលើចំទ្វារខាងមុខចំហៀងខាងឆ្វេងបណ្តាលឲ្យក្រពឹត ។
ប្រភពព័ត៌មានបានបន្តទៀតថា រថយន្តម៉ាកឡិចស៊ីស RX300 នៅមិនទាន់អស់ល្បឿនក៏រេចង្កូតទៅខាងឆ្វេងទៅបុកជញ្ជាំងសង្ក័សីរបស់តូបជួសជុលម៉ូតូដែលនៅក្បែរនោះបណ្តាលឱ្យរងការខូចខាតរបើកជញ្ជាំងអស់មួយផ្ទាំងទំហំ៣ម៉ែត្រគុណនឹង៤ម៉ែត្រ ចំណែករថយន្តម៉ាកឡិចស៊ីស RX300 បានរងងការខូចខាត់ក្រពឹតនិងបែកកាងផ្នែកខាងមុខ ក្នុងហេតុការណ៍នោះដែរ មិនបង្កអោយមនុស្សណាម្នាក់រងរបួសនោះទេ។
ក្រោយពេលកើតហេតុ ក៏ឃើញតំណាងភាគីខាងរថយន្តម៉ាកឡិចស៊ីស RX300 បានចេញមុខមកធ្វើការដោះស្រាយជាមួយភាគីម្ចាស់រថយន្តម៉ាកហាយប្រ៊ីត និងភាគីម្ចាស់តូបជួសជុលម៉ូតូ ដោយចេញសំណងចំនួន២០០០ដុល្លារឲ្យទៅខាងរថយន្តម៉ាកហាយប្រ៊ីត និងចេញសំណងចំនួន២៥០ដុល្លារឲ្យទៅខាងម្ចាស់តូបជួសជុលម៉ូតូដើម្បីបញ្ចប់រឿងនៅនឹងកន្លែងកើតហេតុ៕
ចែករំលែកព័តមាននេះ