សហរដ្ឋអាមេរិក-ប៉ាឡេស្ទីន ៖ សហរដ្ឋអាមេរិកប្រកាសនាថ្ងៃទី១០កញ្ញា ពីការបិទការិយាល័យតំណាងរបស់ប៉ាឡេស្ទីនប្រចាំក្រុងវ៉ាស៊ិនតោន ដោយចោទប្រកាន់បណ្ដាមេដឹកនាំប៉ាឡេស្ទីនថា បដិសេធមិននិយាយជាមួយរដ្ឋការលោកដូណាល់ត្រាំហើយពុំសន្យាធ្វើការចរចាសន្តិភាពជាមួយអីុស្រាអែលឡើងវិញ។
បណ្ដាអ្នកទទួលខុសត្រូវប៉ាឡេស្ទីន ដែលផ្អាករាល់ការប្រាស្រ័យទាក់ទងជាមួយរដ្ឋាភិបាលអាមេរិក ចាប់តាំងពីលោកដូណាល់ត្រាំប្រកាសទទួលស្គាល់ជាឯកតោភាគីកាលពីដំណាច់ឆ្នាំ២០១៧ ក្រុងហ្សេរុយសាឡឹមជារដ្ឋធានីអ៊ីស្រាអែលមក បានបរិហារភ្លាមៗចំពោះការប្រកាសនេះថា ជាការគំរាមកំហែងថ្មីៗរបស់អាមេរិក។
ក្នុងសេចក្ដីប្រកាសមួយលោកស្រីHEATHER NAUERTអ្នកនាំពាក្យក្រសួងការបរទេសអាមេរិកថ្លែងថា អង្គការរំដោះប៉ាឡេស្ទីនOLPពុំមានវិធានការណាមួយដែលអាចចាប់ផ្ដើមការចរចាដោយផ្ទាល់ជាមួយអ៊ីស្រាអែលឡើយ។ផ្ទុយទៅវិញបណ្ដាមេដឹកនាំOLPបានថ្កោលទោសផែនការសន្តិភាពរបស់អាមេរិក ដោយទាំងមិនខ្ចីពិនិត្យជាថ្មីរួចបដិសេធមិននិយាយជាមួយរដ្ឋាភិបាលអាមេរិក ពីការខិតខំប្រឹងប្រែងសន្តិភាពរបស់ខ្លួន។
អាស្រ័យហេតុនេះរដ្ឋការអាមេរិកសម្រេចថា ការិយាល័យរបស់OLPប្រចាំក្រុងវ៉ាស៊ិនតោននឹងត្រូវបិទសម្រាប់ពេលនេះ។ ដើម្បីគាបសង្កត់ពួកប៉ាឡេស្ទីនឲ្យយល់ព្រមចរចាវិញជាមួយអ៊ីស្រាអែល រដ្ឋការលោកដូណាល់ត្រាំនៅបានកាត់ផ្ដាច់ជំនួយនានាដល់ពួកប៉ាឡេស្ទីនទៀតផង៕
ចែករំលែកព័តមាននេះ