រាជធានីភ្នំពេញ ៖ ក្រសួងអប់រំយុវជន និងកីឡា នឹងបើកសន្លឹកកិច្ចការមុខវិជ្ជាគណិតវិទ្យា របស់បេក្ខជនមួយចំនួនដែលប្តឹងតវ៉ាមិនសុខចិត្តចំពោះពិន្ទុដែលប្រកាសដោយក្រសួង។ លោក ហង់ ជួនណារ៉ុន រដ្ឋមន្ត្រីក្រសួងអប់រំ…
រាជធានីភ្នំពេញ ៖ ក្រសួងអប់រំយុវជន និងកីឡា នឹងបើកសន្លឹកកិច្ចការមុខវិជ្ជាគណិតវិទ្យា របស់បេក្ខជនមួយចំនួនដែលប្តឹងតវ៉ាមិនសុខចិត្តចំពោះពិន្ទុដែលប្រកាសដោយក្រសួង។ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឲ្យកោះសន្តិភាពដឹងតាមប្រព័ន្ធតេឡេក្រាម នៅថ្ងៃទី១០ កញ្ញា ២០១៨ យ៉ាងដូច្នេះថា “ក្រសួងនឹងពិនិត្យសន្លឹកកិច្ចការសិស្សដោយធ្វើកោសល្យ វិច្ច័យលើសន្លឹកកិច្ចគណិតវិទ្យារបស់បេក្ខជនតវ៉ាមួយចំនួន” ។ ការលើកឡើងរបស់លោករដ្ឋមន្ត្រី ក្រសួងអប់រំ នេះ បន្ទាប់មានបេក្ខជនដែលជាសិស្សមួយចំនួនបានស្នើឲ្យក្រសួងពិនិត្យសន្លឹកកិច្ចរបស់ខ្លួន ដោយមិនទទួលយកពិន្ទុដែលក្រសួងប្រកាសនោះទេ។ គឺលទ្ធផលពួកបានធ្លាក់មុខវិជ្ជាគណិតវិទ្យា ដែលជាការនឹកស្មានមិនដល់ និងមិនអាចទទួលបាននោះទេ។
បេក្ខជនមួយក្រុមនៅរសៀលថ្ងៃនេះ ក៏បានប្រមូលផ្តុំគ្នានៅមុខក្រសួងអប់រំដើម្បីស្នើសុំឲ្យក្រសួងបើកសន្លឹកកិច្ចខ្លួនធ្វើការផ្ទៀងផ្ទាត់ពិន្ទុផងដែរ ។ ក្រៅពីបេក្ខជន នៅលើបណ្តាញសង្គមហ្វេសប៊ុកវិញទាំងលោកគ្រូ អ្នកគ្រូ ដែលបង្ហាត់ បង្រៀន មុខវិទ្យាគណិតវិទ្យា បាននាំគ្នាសរសេរដោយកើតទុក្ខមិនសុខចិត្តចំពោះលទ្ធផល ពិន្ទុមុខវិជ្ជាគណិតផងដែរ។ ទាំងគ្រូ និងបេក្ខជនបានស្នើឲ្យក្រសួងពិនិត្យសន្លឹកកិច្ចការ មុខវិជ្ជាគណិតឡើងវិញផងដែរ។ សូមជម្រាបថា អ្នកប្រឡងជាប់សញ្ញាបត្រ មធ្យមសិក្សាទុតិយភូមិ (បាក់ឌុប) សម័យប្រឡង២០ ខែសីហា ឆ្នាំ២០១៨ នៅទូទាំងប្រទេស មានចំនួន ៧៥.០៥៩នាក់ ត្រូវជា៦៦.២១% ច្រើនជាងឆ្នាំ២០១៧ ដែលមានតែ៦៣.៨៤%។
យោងតាមសេចក្តីប្រកាសព័ត៌មាន របស់ក្រសួងអប់រំយុវជន និងកីឡា នៅថ្ងៃទី៩ ខែកញ្ញា ឆ្នាំ២០១៨ បានឲ្យដឹងថា អ្នកជាប់ជាង៧ម៉ឺននាក់ ស្មើនឹងជាង៦៦% ក្នុងចំណោមបេក្ខជន មកប្រឡងជាង១១ម៉ឺននាក់។ បេក្ខជនជាប់និទ្ទេស A ចំនួន២៩០នាក់ , Bចំនួន ១.៥៣២ នាក់, Cចំនួន ៤.៦៣១ នាក់, D ចំនួន ១៣.៩៩៩ នាក់, និង Eចំនួន ៥៤.៦០៧នាក់។ ក្នុងនោះរាជធានីភ្នំពេញ មានតួលេខខ្ពស់ជាងគេ ដោយនិទ្ទេសA មានចំនួន១៣៥នាក់ , សៀមរាប មាន២១នាក់, កណ្តាលមាន១៦នាក់, បាត់ដំបង១៥នាក់, តាកែវ ១៥នាក់, កំពង់ចាម ១៣នាក់, កំពត១១នាក់, ត្បូងឃ្មុំ៩នាក់, កំពង់ធំ៩នាក់, កំពង់ឆ្នាំង៩នាក់, បន្ទាយមានជ័យ៩នាក់, ព្រៃវែង៨នាក់, ក្រចេះ៦នាក់, ពោធិ៍សាត់៤នាក់, ស្វាយរៀង៣នាក់ ,កំពង់ស្ពឺ៣នាក់ ព្រះសីហនុ៣នាក់ និងខេត្តរតនគិរីមានតែម្នាក់។
ចំណែកខេត្ត ដែលពុំមានបេក្ខជន ជាប់និន្ទេសA រួមមាន ខេត្តកោះកុង , កែប , មណ្ឌលគិរី, ឧត្តរមានជ័យ, ព្រះវិហារ, ប៉ៃលិន និងខេត្តស្ទឹងត្រែង។ ជាមួយគ្នានេះដែរ បេក្ខជន១៧នាក់ ត្រូវកំណត់ឲ្យធ្លាក់ជាស្វ័យប្រវត្តិ ដោយប្រព្រឹត្តខុសឆ្គងផ្ទុយ នឹងបទបញ្ញត្តិ និងកម្រិតវិន័យ។ សូមបញ្ជាក់ថា ការប្រឡងបាក់ឌុប កាលពីថ្ងៃទី២១-២១ សីហា មានមណ្ឌលប្រឡង នៅគ្រប់រាជធានី-ខេត្ត សរុប១៩៦មណ្ឌល, បន្ទប់៤៦៥៥បន្ទប់ និងបេក្ខជនចុះឈ្មោះ ក្នុងបញ្ជីសរុប ១១៥.២៦៨នាក់ ដែលក្នុងនោះ ៩០.១២០នាក់ ជាបេក្ខជនចំណេះទូទៅ , ១៧.០៣១នាក់ ជាបេក្ខជនស្វ័យរិន ៤.៤២៥នាក់ ជាបេក្ខជនបំពេញវិជ្ជា និង៣.៦៩២នាក់ ជាបេក្ខជនស្វ័យរិន បំពេញវិជ្ជា។ បេក្ខជនអវត្តមានចំនួន ១.៩០៣នាក់៕
ចែករំលែកព័តមាននេះ