ភាគីចិន​បើកដៃ​ហើយ…ខណៈឥទ្ធិពល​​អាក្រក់​កាន់តែច្រើន​ ហូរចូលដី​សមុទ្រខ្មែរ


ខេត្ត​ព្រះ​សីហ​នុ ៖ ឥទ្ធិពល​មិនល្អ​កាន់តែ​ច្រើន ដែល​ធ្វើ​ឱ្យ​មានការ​ប៉ះពាល់​ដល់​មុខមាត់ប្រទេស​ចិន​ បង្ក​ដោយ​ក្រុម​ជនជាតិ​ចិន​ក្នុង​ប្រទេស​កម្ពុជា ពិសេស​នៅ​ខេត្ត​ព្រះ​សីហ​នុ បាន​ជំរុញ​ឱ្យ​មន្ត្រី​ផ្នែក​សន្តិសុខ​នៃ​ប្រទេស​ទាំង​២ ប្រញាប់​ប្រញាល់​ស្វែងរក​កិច្ចសហការ​គ្នា ដើម្បី​លុប​បំបាត់​បាតុភាព​នានា​ បង្ក​ដោយ​ក្រុម​ជនជាតិចិន ដែល​ហូរ​ចូល​មក​តំបន់​មាត់សមុទ្រ​ខ្មែរ​រាប់​ម៉ឺន​នាក់ ។

មន្ត្រី​កម្ពុជា​និង​​ចិន បាន​ឯកភាព​គ្នា​ក្នុង​ការ​ផ្លាស់​ប្ដូរ​ព័ត៌មាន​ទៅ​វិញ​ទៅ​មក រាល់​បទល្មើស​ដែល​បង្ក​ឡើង​ដោយ​​ជនជាតិ​ចិន​ នៅ​ក្នុង​ខេត្ត​ព្រះ​សីហ​នុ ។ ការ​ឯកភាព​នេះ ធ្វើ​ឡើង​ក្នុង​ជំនួប​រវាង​អាជ្ញាធរ​ខេត្ត និង​មន្ត្រី​នៃ​ក្រសួង​សន្តិសុខ​ចិន លោក ហូ​៊ ប៊ី​ន​ជិន​(Hu Binchen) ដែល​បាន​ទៅ​ធ្វើ​ទស្សនកិច្ច​នៅ​ខេត្ត​ព្រះ​សីហ​នុ​ ជា​លើក​ដំបូង​ កាលពី​ថ្ងៃ​ទី​៦ ខែកញ្ញា ​កន្លង​មកនេះ ។ ភាគី​ចិន​បាន​ប្រកាស​គាំទ្រ ឲ្យ​អាជ្ញាធរ​ខ្មែរ​បង្ក្រាប​ជនជាតិ​ចិន​ ដែល​បង្ក​បទល្មើស ។

កាលពី​ថ្ងៃ​ទី​៨ ខែកញ្ញា ស្នងការ​នគរបាល​ខេត្ត លោក​ឧត្តមសេនីយ៍ទោ ជួន ណា​រិ​ន្ទ បាន​ចាត់​ទុក​ការ​ផ្លាស់​ប្ដូរ​ព័ត៌មាន​ទាក់ទង​នឹង​បទល្មើស​នៅ​ខេត្ត​ព្រះ​សីហ​នុ​ថា ​ជា​រឿង​ល្អ ព្រោះ​ការងារ​នេះ នឹង​អនុញ្ញាត​ឲ្យ​អាជ្ញា​ធរ​​ទាំង​សងខាង​ ក្ដាប់​សភាពការណ៍​សន្តិសុខ ដើម្បី​ការពារ​អ្នក​វិនិយោគទុន​នៅ​ក្នុង​ខេត្ត ដែល​មិន​ចំពោះតែ​វិនិយោគិន​ចិន ឡើយ ពោល​គឺ​គ្រប់​អ្នក​វិនិយោគ​ទាំងអស់​នៅ​ក្នុង​ខេត្ត​ព្រះ​សីហ​នុ ។

លោកស្នងការ​បន្ត​ថា ភាគី​ចិន​នៅ​តែ​បន្ត​គាំទ្រ​លើ​ចំណាត់ការ​របស់​អាជ្ញាធរ​ខ្មែរ ក្នុង​ការ​បង្ក្រាប​ជនជាតិ​ចិន​ខិលខូច​មួយ​ចំនួន ហើយ​អាជ្ញាធរ​ចិន​ខ្លួនឯង​ ក៏​មិន​នៅ​ស្ងៀម​ចំពោះ​ទ​ង្វើ​របស់​ជនជាតិ​ចិន​ខិលខូច​មួយ​ចំនួន​នេះ​ដែរ ។ សម្រាប់​ភាគី​ចិន គឺ​គាំទ្រ​កម្ពុជា​ឲ្យ​អនុវត្ត​ការ​បង្ក្រាប​បទល្មើស ស្រប​ទៅ​តាម​ច្បាប់​ដែល​មាន​ស្រាប់​​របស់​កម្ពុជា ។ ការ​ហូរ​ចូល​ជនអន្តោប្រវេសន៍​មក​កាន់​ខេត្ត​ព្រះ​សីហ​នុ ត្រូវ​បាន​ពាក្យ​សាមញ្ញ​និយាយ​ថា ក្រុងព្រះសីហនុ​ជា​ម៉ា​កាវ​ទី​២ ព្រោះ​បច្ចុប្បន្ន​មាន​កាស៊ីណូ​៥០០​ទីតាំង​រួច​ទៅ​ហើយ និង​កំពុង​សាងសង់​បន្ថែម​ទៀត ។

មានការ​កត់​សម្គាល់ថា បទល្មើស​ដែល​បង្ក​ឡើង​ដោយ​ជនជាតិ​ចិន​នេះ លោកស្នងការ ជួន ណា​រិ​ន្ទ បន្ថែម​ថា មន្ត្រី​ក្រសួង​សន្តិសុខ​ចិន លោក ហូ​៊ ប៊ី​ន​ជិន បាន​លើក​សរសើរ​សមត្ថកិច្ច​ខេត្ត​ព្រះ​សីហ​នុ​ថា គ្រប់គ្រង​សភាព​ការណ៍​ ក្នុង​ខេត្ត​បាន​ល្អ ។ ការ​កោត​ស​សើរ​ពី​សំណាក់​មន្ត្រីនៃ​ក្រសួង​សន្តិសុខ​ចិន ធ្វើ​ឡើង​ចំ​ពេល​បញ្ហា​អសន្តិ​សុខ​នៅ​ក្នុង​ខេត្ត​ព្រះ​សីហ​នុ​ មួយ​រយៈពេល​ចុង​ក្រោយ​នេះ បាន​ទទួល​រង​នូវ​ការ​រិះគន់​ពី​សាធារណជន​យ៉ាង​ខ្លាំង ហើយ​ភាគច្រើន​នៃ​បញ្ហាទាំង​អស់នេះ សុទ្ធតែ​បង្ក​ឡើង​ដោយ​ជនជាតិ​ចិន ។

តួយ៉ាង​ដូច​ជា ករណី​ចែក​ខិត្តប័ណ្ណ​ធ្វើ​អាជីវកម្ម​ផ្លូវភេទ ករណី​ប្លន់ ជួញដូរ​គ្រឿងញៀន រួម​នឹង​បទល្មើស​ផ្សេង​ៗ​ទៀត ។ ទាក់ទិន​នឹង​ការ​ពង្រឹង​សន្តិសុខ​នេះ​ដែរ អគ្គស្នងការដ្ឋាន​នគរបាល​ជាតិ កាលពី​ចុងខែ​សីហា កន្លង​មក បាន​បញ្ជូន​ក្រុមការងារ​ទៅ​ពង្រឹង​សន្តិសុខ សណ្ដាប់ធ្នាប់នៅ​ខេត្ត​ព្រះ​សីហ​នុ ដែល​គេ​មើលឃើញ​ជា​ទូទៅ​ថា កំពុង​ក្លាយជា​ទីកន្លែង​ប្រមូលផ្ដុំ​ដោយ​ការ​វិនិយោគ​របស់​ជនជាតិ​ចិន ហើយ​បញ្ហា​អសន្តិសុខ​សង្គម​មួយ​ចំនួន ក៏​បាន​បង្ក​ឡើង​ដោយ​ជនជាតិ​ចិន​នេះ​ដែរ ។

ក្រុមការងារ​មាន​សមាសភាព​ចំនួន​១១​រូប ត្រូវ​បាន​បង្កើត​ឡើង​តាម​រយៈ​លិខិត​បង្គាប់ការ របស់​អគ្គ​ស្នង​ការ​នគរបាល​ជាតិ ចុះ​ថ្ងៃ​ទី​៣១ខែសីហា និង​ត្រូវ​បានដឹង​ជា​សាធារណៈ​នៅ​ថ្ងៃ​ទី​៥ ខែកញ្ញា ។ ក្រុម​ការងារ​នេះ​មាន​ភារកិច្ច​ពិនិត្យ​វាយតម្លៃ​សភាពការណ៍​សន្តិសុខ សណ្ដាប់ធ្នាប់ និង​សុវត្ថិភាព​សង្គម នៅ​ក្នុង​ខេត្ត​ព្រះ​សីហ​នុ ។

បើ​ទោះបីជា​លិខិត​បង្គាប់ការ​របស់​អគ្គស្នងការ​នគរបាល​ជាតិ បាន​បញ្ជាក់​ត្រឹម​ថា ក្រុមការងារ​នេះ​ត្រូវ​ពង្រឹង​សន្តិសុខ សណ្ដាប់ធ្នាប់ និងសុវត្ថិភាព​សង្គម​នៅ​ក្នុង​ខេត្ត​ព្រះ​សីហ​នុ​ក៏​ដោយ តែ​អ្វី​ជា​ការ​កត់សម្គាល់ គឺ​ក្រុមការងារ​នេះ បង្កើតឡើង​ចំ​ពេល​បញ្ហា​អសន្តិសុខ និង​សោភ័ណ​ភាពនៅ​ខេត្ត​ព្រះ​សីហ​នុ មួយ​រយៈពេល​ចុង​ក្រោយ​នេះ បាន​ទទួល​រង​នូវ​ការ​រិះគន់​ពី​សាធារណ​មតិ​យ៉ាង​ខ្លាំង ។

ទោះបីជា​បែប​ណា លោកស្នងការ ជួន ណា​រិ​ន្ទ បាន​អះអាង​ថា ករណី​បទល្មើស​ដែល​បង្ក​ឡើង​ដោយ​ជនជាតិ​ចិន​នេះ មិន​បាន​បង្ក​ជា​ការ​លំបាក​ដល់​សមត្ថកិច្ច​ក្នុង​ការ​គ្រប់គ្រង​នោះ​ទេ ព្រោះថា ប្រទេស​កម្ពុជា​មានច្បាប់ ហើយ​សមត្ថកិច្ច​បានរៀបចំ​ផែនការ​ត្រឹមត្រូវ គឺ​អាច​គ្រប់គ្រង​សភាពការណ៍​ទាំងនោះ​បាន ។

សូម​បញ្ជាក់​ថា ស្រប​ពេល​ដែល​អគ្គស្នងការ​នគរបាល​ជាតិ បញ្ជូន​ក្រុមការងារ​ទៅ​គ្រប់គ្រង​សភាពការណ៍​សន្តិសុខ​នៅ​ខេត្ត​ព្រះ​សីហ​នុ មន្ត្រី​នៃ​ក្រសួង​សន្តិសុខ​ចិន លោក ហូ​៊ ប៊ី​ន​ជិន ដែល​កំពុង​បំពេញ​ទស្សនកិច្ច​នៅ​កម្ពុជា ក៏​បាន​ឆ្លៀតឱកាស​ទៅ​ធ្វើ​ទស្សនកិច្ច​នៅ​ខេត្ត​ព្រះ​សីហ​នុ​ដោយ​ផ្ទាល់ ដើម្បី​ជួប​ថ្នាក់ដឹកនាំ​ខេត្ត និង​ពិភាក្សា​អំពី​ការ​ពង្រឹង​សន្តិសុខ សណ្តាប់ធ្នាប់​សាធារណៈ​នេះ​ផង​ដែរ ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ