ខេត្តកំពង់ស្ពឺ ៖ បន្ទាប់ពីរឿងរ៉ាវដ៏កម្រមួយបានបែកធ្លាយ និងប៉ះពាល់ដល់កិត្តិយសផងនោះ ធ្វើឱ្យសមត្ថកិច្ចដុតដៃដុតជើង ធ្វើការស្រាវជ្រាវយ៉ាងយកចិត្តទុកដាក់បំផុត ដោយបានកោះហៅបុរសមួយចំនួនមកសាកសួរជុំវិញ ការឆក់ឱកាសប្រើទឹកលុយលួងលោមស្ត្រី ដែលមានសតិមិនប្រក្រតីរួមរ័កបណ្តាក់គ្នាដូចខ្យង ហើយត្រូវបែកធ្លាយ ខណៈនាងមានផ្ទៃពោះ៥ខែ ។
អស់រយៈពេល២ថ្ងៃនៃការស្រាវជ្រាវ ជាលទ្ធផលបានត្រឹមតែកសាងសំណុំរឿងបញ្ជូនទៅសាលាដំបូង តែភាគីបុរស១៧នាក់ ដែលពាក់ព័ន្ធមិនត្រូវបានឃាត់ខ្លួនទេ ព្រោះហួសនីតិវិធី ។ មន្ត្រីនគរបាលស្រុកបសេដ្ឋ បានប្រាប់នៅថ្ងៃទី៦ កញ្ញាថា ករណីដែលកើតឡើង នៅឃុំបសេដ្ឋ ស្រុកបសេដ្ឋ បានបិទការស្រាវជ្រាវហើយ ដោយភាគីខាងឪពុកស្ត្រីរងគ្រោះសម្រេចស្នើសុំថា មិនបន្តប្តឹងប្តល់អ្នកពាក់ព័ន្ឋដែលធ្វើឱ្យកូនស្រីគាត់មានផ្ទៃពោះទៀតទេ ។ ឪពុកស្ត្រីរងគ្រោះនឹងឡើងទៅជួបជាមួយតំណាងអយ្យការ ដើម្បីរំលត់បណ្តឹងអាជ្ញាករណីកូនស្រីគាត់ជាមួយបុរសជាច្រើននាក់នៅក្នុងភូមិ ។
មន្ត្រីដដែលមិនអាចបញ្ជាក់បានទេថា ការដែលបុរសជាឪពុកទៅជួបតំណាងអយ្យការបានទទួលផលបែបណាឡើយ ។ ក្នុងការដែលឪពុកសុខចិត្តឡើងទៅជួបតំណាងអយ្យការនេះ ដោយសារតែគាត់បានទទួលលុយសំណងរដ្ឋប្បវេណីសរុបប្រមាណជាង៨លានរៀល ពីក្រុមបុរសដែលជាប់សង្ស័យពាក់ព័ន្ធផ្លូវភេទជាមួយកូនស្រីគាត់រួចមក ។ តាមការពិត រឿងរ៉ាវអាស្រូវនេះបានកើតឡើងរួចទៅហើយ រីឯកូនស្រីគាត់មានផ្ទៃពោះកាន់តែធំ គាត់គ្រាន់តែចង់បានលុយខ្លះ ទុកយកមកចំណាយពេលឆ្លងទន្លេ និងចិញ្ចឹមរូបគេទៅថ្ងៃអនាគតតែប៉ុណ្ណោះ ។ នេះបើតាមឪពុកស្ត្រីរងគ្រោះនិយាយប្រាប់មន្ត្រីនគរបាលដែលចុះទៅទីនោះ ។
មន្ត្រីដដែលបន្តថា លុយសំណងជាង៨លានរៀល គឺក្រុមគ្រួសារស្ត្រីរងគ្រោះទទួលបានពីបុរសចំនួន១៧នាក់ ដែលបានបង់ទៅឱ្យឪពុកម្តាយនាង មុនពេលរឿងនេះ បែកធ្លាយមកខាងក្រៅ និងដឹងដល់សមត្ថកិច្ច ។មតិជាច្រើននៅក្នុងភូមិកើតហេតុបានលើកឡើងថា មូលហេតុដែលឪពុកស្ត្រីរងគ្រោះស្ទុះស្ទាទៅជួបតំណាងអយ្យការ ដោយសារតាមរយៈភូមិ ឃុំ នៅពេលកោះហៅភាគីពាក់ព័ន្ធមកដោះស្រាយ គឺបានឯកភាពគ្នាថាមិនប្តឹងប្តល់ទៀតឡើយ ទើបគេព្រមបង់លុយ។ហេតុនេះហើយទើបគាត់សុំដល់សមត្ថកិច្ចថា បញ្ចប់រឿងត្រឹមនេះ ដោយគាត់មិនបានដឹងថា នៅជាប់បណ្តឹងអាជ្ញានោះឡើយ ។
បើទោះជាភាគីពាក់ព័ន្ធបានសងសំណងរដ្ឋប្បវេណីទៅឱ្យក្រុមគ្រួសារស្ត្រីរងគ្រោះក្តី ក៏គេនៅមិនទាន់ដឹងថា តើតំណាងអយ្យការនឹងសម្រេចតម្កល់រឿងទុកឥតចាត់ការ ឬក៏ត្រូវកោះហៅក្រុមបុរសជាប់សង្ស័យទាំងនោះឱ្យចូលខ្លួនមកបំភ្លឺយ៉ាងណាឡើយ ។ ស្ត្រីរងគ្រោះត្រូវបានគេដឹងថា ជាមនុស្សមានសតិមិនប្រក្រតី ហើយត្រូវបានញាំញីដោយក្រុមបុរសដែលមានសតិត្រឹមត្រូវ នាំគ្នាធ្វើទង្វើមិនគប្បីដាក់នាងរហូតមានផ្ទៃពោះ ដោយមិនអាចបញ្ជាក់បាននោះទេថា តើបុរសណាមួយជាឪពុកទារកក្នុងផ្ទៃរបស់នាងឱ្យប្រាកដនោះ ។
មជ្ឈដ្ឋានមហាជនដែលដឹងរឿងខាងលើ បាននាំគ្នាបន្ទោសទៅក្រុមបុរសជាប់សង្ស័យថា ខ្លួនជាមនុស្សដែលមានសតិសម្បជញ្ញៈត្រឹមត្រូវ គួរណាស់តែមានការគិតគូរឱ្យបានវែងឆ្ងាយ ហើយមិនត្រូវទៅប្រព្រឹត្តអំពើអសីលធម៌ដាក់នាងដែលជាមនុស្សមានសតិវិបល្លាសនោះទេ ដែលទង្វើបែបនេះគួរតែកុំលើកលែង ។
សូមរំឭកថា ៖ ចប់…បុរស៣ភូមិរួមរ័កជាមួយនាង?
ចែករំលែកព័តមាននេះ