ខេត្តកំពង់ស្ពឺ ៖ រឿងរ៉ាវជិវិតរបស់ស្ត្រីម្នាក់ បានធ្វើឱ្យគ្រប់គ្នាហួសចិត្ត បន្ទាប់ពីដឹងថា នាងមានផ្ទៃពោះ តែរកមុខឪពុកកូនក្នុងផ្ទៃមិនឃើញ ហើយម្តាយមីងបានជជីកសួរដេញដោល រហូតធ្លាយការពិតថា នាងបានត្រូវបុរសសឹងតែ១ភូមិបបួលរួមរ័កជាថ្នូរនឹងការឱ្យលុយបន្តិចបន្តួច ដើម្បីដោះស្រាយចំណង់របស់ពួកគេ។
រឿងរ៉ាវនេះបានបែកធ្លាយ កាលពីរសៀលថ្ងៃទី៣ ខែកញ្ញា នៅឃុំបសេដ្ឋ ស្រុកបរសេដ្ឋ ។
ក្រោយពីបែកធ្លាយរឿងនេះមក លោកស្រីងិន សុគន្ធា ស្នងការរងនគរបាលខេត្តទទួលបន្ទុកប្រឆាំងការជួញដូរមនុស្សនិងការពារអនីតិជន បានដឹកនាំកម្លាំងសមត្ថកិច្ចចុះដល់ឃុំខាងលើ ដើម្បីធ្វើការស្រាវជ្រាវរកមូលហេតុពិត ក៏ដូចជារកយុត្តិធម៌ដល់ស្ត្រីរងគ្រោះផងដែរ ។
នៅចំពោះមុខសមត្ថកិច្ច ស្ត្រីរូបនេះដែលមានអាយុប្រហែលជិត៣០ឆ្នាំ បានរៀបរាប់ថា នាងត្រូវបានបុរសជាច្រើននាក់រួមរ័កជាមួយនាង ភាគច្រើននៅតាមភ្លឺស្រែ តាមគុម្ពោតព្រៃជាដើម ហើយនាងស្គាល់មុខច្បាស់គ្រប់គ្នា ។ នាងថា រឿងបែបនេះ គឺកើតឡើងច្រើនឆ្នាំមកហើយ។ ក្រោយការរួមរ័ក នាងទទួលបានលុយពីប្រុសៗទាំងនោះ ខ្លះឱ្យ១.០០០រៀល ខ្លះ៥.០០០រៀល ខ្លះទៀត១០.០០០រៀលក៏មាន ។
បើតាមស្ត្រីជាបងនិយាយថា កាលពីអំឡុងឆ្នាំ២០០៦ ប្អូនស្រីរបស់់់់់់់់់់់់់់គាត់នេះ ដែលទើបមានអាយុប្រមាណ១៦ឆ្នាំ បានទៅសុីឈ្នួលចាំចម្ការឱ្យគេ ។ ពេលទៅនៅទីនោះ បានត្រូវសាច់ញាតិឯងចាប់រំលោភ ហើយវាយប្រុងសម្លាប់បំបិទមាត់ទៀត រួចក៏គេចខ្លួនទៅស្រុកថៃបាត់ទៅ ។
ក្រោយពីជួបហេតុការណ៍អាក្រក់បែបនេះ ក្រុមគ្រួសារបានបញ្ជូននាងទៅសង្គ្រោះ និងព្យាបាលរហូតជាសះស្បើយពីអាការរបួស ស្រាប់តែនាងមានសតិមិនប្រក្រតី (សរសៃប្រសាទ) ចាប់តាំងពីពេលនោះរហូតមក ។ គ្មានអ្នកណាមួយ ក្នុងក្រុមគ្រួសារដឹងថា ក្រោយពីនាងមានជំងឺសរសៃប្រសាទហើយ បែរជាមកជួបរឿងអកុសលបែបនេះទេ ។
មន្ត្រីនគរបាលស្រុកបសេដ្ឋបានប្រាប់ថា ករណីនេះ ទើបបែកការណ៍ បន្ទាប់ពីម្តាយមីងសង្កេតឃើញពោះរបស់នាងធំខុសពីធម្មតា ក៏ជជីកសួរនាំទើបនាងនិយាយប្រាប់ពីក្រុមប្រុសៗក្នុងភូមិ និងក្រៅភូមិបានប្រព្រឹត្តមកលើនាង ។ បន្ទាប់ពីសួរនាំហើយ ទើបក្រុមគ្រួសារនាំនាងទៅពិនិត្យនិងដឹងថា នាងមានផ្ទៃពោះ៥ទៅ៦ខែទៅហើយ ។
លោកវរសេនីយ៍ត្រី យ៉ាង សុខលី អធិការនគរបាលស្រុកបសេដ្ឋ បានប្រាប់នៅរសៀលថ្ងៃទី៤ កញ្ញា ថា ករណីនេះ ត្រូវបានក្រុមគ្រួសារនារីខាងលើ រួមជាមួយអាជ្ញាធរភូមិធ្វើការសម្របសម្រួលគ្នាក្រៅប្រព័ន្ធច្បាប់ ដោយមិនបានដាក់ពាក្យបណ្តឹង មកខាងសមត្ថកិច្ចនគរបាលឱ្យជួយរកយុត្តិធម៌ទេ ។
ទោះបីជាបែបណា ពេលនេះ លោកស្រីស្នងការរង រួមទាំងមន្ត្រីជំនាញស្រុក បាននិងកំពុងធ្វើការស្រាវជ្រាវនិងស៊ើបអង្កេតយ៉ាងយកចិត្តទុកដាក់បំផុត ។ លោកអធិការបន្តថា ពេលនេះ មន្ត្រីជំនាញបានធ្វើការសាកសួរមនុស្សប្រុសដែលនាងប្រាប់ថា បានរួមរ័កជាមួយនាងបាន៤នាក់ហើយ និងកំពុងស្រាវជ្រាវកោះហៅមកសាកសួរបន្តទៀត ឯចំពោះលទ្ធផលយ៉ាងណាៗ នោះរង់ចាំបញ្ជាពីថ្នាក់លើ ។
ដោយឡែក លោក ចាន់ ថុល មេឃុំបសេដ្ឋបានប្រាប់អ្នកយកព័ត៌មាន នារសៀលថ្ងៃទី៤ ខែកញ្ញាថា លោកបានឲ្យមន្ត្រីទៅសម្របសម្រួលស្ងាត់ៗនៅនឹងភូមិមែន ហើយលោកទទួលស្គាល់ថា មានមនុស្សប្រុសចំនួន៣ភូមិ ដែលត្រូវស្ត្រីខាងលើចោទប្រកាន់ ។ លោកមេឃុំបញ្ជាក់ថា បុរសទាំងអស់ដែលត្រូវចោទ គឺមិនច្រើនរហូតដល់៣០នាក់ទេ ។ លោកមេឃុំហ៊ានអះអាងថែមទៀតថា ស្ត្រីរូបនេះ មានសតិមិនប្រក្រតី(សរសៃប្រសាទ) ។
មុនពេលរឿងនេះ បែកធ្លាយ មានមនុស្សមិនតិចជាង១០នាក់ទេ បានយកលុយទៅបង់ឲ្យម្តាយស្ត្រីខាងលើក្នុងម្នាក់ៗចាប់ពី៤០ម៉ឺន ទៅ១លានរៀល ។ ករណីនេះដែរ ក៏មានមនុស្សមួយចំនួនបានប្រកែកដោះសាថា មិនបានប្រព្រឹត្ត ទេ តែបែរជាព្រមបង់លុយ ព្រោះហេតុផលខ្មាសគេតែម្តង ។
មន្ត្រីនគរបាលមូលដ្ឋានមួយរូប បានលើកឡើងថា បើខ្លួនមិនបានប្រព្រឹត្តដូចការចោទប្រកាន់ទេ ហេតុអ្វីចាំបាច់បង់លុយឱ្យស្ត្រីខាងលើ ម៉េចមិនរាយការណ៍មកសមត្ថកិច្ចឱ្យជួយរកយុត្តិធម៌? ករណីដូចនេះ ជាធម្មតាចោរមិនដែលប្រាប់គេថា ខ្លួនជាចោរទេ ទាល់តែសមត្ថកិច្ចចាប់ជាប់ ទើបព្រមឆ្លើយសារភាព ។
សូមបញ្ជាក់ថា មនុស្សប្រុសចំនួន៣ភូមិ មានក្មេងមានចាស់ជិត៣០នាក់ ត្រូវបានស្ត្រីម្នាក់នេះ ប្តឹងទារសំណង ដោយចោទពីបទរំលោភសេពសន្ថវៈ ។ ក្រុមមនុស្សអគតិ ដែលឆក់ឱកាសនាង មានសតិមិនល្អ តែងតែបោកបញ្ឆោតធ្វើបាបនាងចាប់តាំងពីអំឡុងឆ្នាំ២០០៦មកម្ល៉េះ គឺបន្ទាប់ពីត្រូវបានចាប់រំលោភដោយសាច់ញាតិ ហើយប៉ងវាយសម្លាប់បំបិទមាត់ តែមិនស្លាប់ និងទីបំផុតបានក្លាយជាស្ត្រីមានសតិមិនប្រក្រតី ហើយតាំងពីពេលនោះមកក៏រងនូវការចាប់រំលោភរហូតដល់បច្ចុប្បន្ន ធ្វើឱ្យនាងមានផ្ទៃពោះ ។
មិនដឹងថា តើឈាមនៅក្នុងផ្ទៃនាងជាឈាមរបស់បុរសណានោះទេ ព្រោះតាមការរៀបរាប់របស់ស្ត្រីរងគ្រោះ គឺមនុស្សប្រុសច្រើននាក់ណាស់ ដែលបានរួមរ័កជាមួយនាង ៕
ចែករំលែកព័តមាននេះ