ខេត្តកំពង់ស្ពឺ ៖ មន្ត្រីនគរបាលម្នាក់កំពុងបើកម៉ូតូស៊េរីទំនើប១គ្រឿងតែម្នាក់ឯងលើកំណាត់ផ្លូវជាតិស្រាប់តែរថយន្តដឹកដីបើកបរបញ្ច្រាសទិសជ្រុលចង្កូតបុកចំពីមុខបណ្តាលឲ្យរបួសធ្ងន់ ។ គ្រោះថ្នាក់ចរាចរណ៍រវាងរថយន្តនឹងម៉ូតូនេះបានកើតឡើងកាលពីវេលាម៉ោង១និង៣៥នាទីរសៀលថ្ងៃទី៤ ខែកញ្ញា ឆ្នាំ២០១៨ ស្ថិតក្នុងភូមិវល្លិ៍ស ឃុំវល្លិ៍ស ស្រុកសំរោងទង ខេត្តកំពង់ស្ពឺ ។
ជនរងគ្រោះជាមន្ត្រីនគរបាលឈ្មោះ ឈ្លូស វណ្ណារិទ្ធ អាយុ២៨ឆ្នាំ រស់នៅភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្ដាល ជិះម៉ូតូម៉ាកសេ១២៥ ស៊េរីឆ្នាំ២០១៨ ពណ៌ខ្មៅ ពាក់ផ្លាកលេខ ភ្នំពេញ ១HA-១០៩៨ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញជនរងគ្រោះជិះម៉ូតូម្នាក់ឯងតាមបណ្តោយផ្លូវជាតិលេខ៤ទិសដៅពីកើតទៅលិច ខណៈមកដល់ចន្លោះគីឡូម៉ែត្រលេខ៣៩-៤០ ស្រាប់តែមានរថយន្តដឹកដីមិនស្គាល់ម៉ាក១គ្រឿងបើកបញ្ច្រាសទិសពីលិចទៅកើតបានរ៉េចង្កូតជ្រុលបុកម៉ូតូជនរងគ្រោះចំពីមុខពេញទំហឹងបណ្តាលឲ្យរងរបួសធ្ងន់ ។ ក្រោយបង្កហេតុរថយន្តនៅមិនបានឈប់ដោះស្រាយតាមច្បាប់ទេបានបន្ថែមល្បឿនបើកគេចបាត់ស្រមោល ។
ប្រភពព័ត៌មានពីនគរបាលចរាចរណ៍បានឲ្យដឹងថា ក្រោយកើតហេតុសមត្ថកិច្ចបានចុះដល់កន្លែងកើតហេតុបញ្ជូនជនរងគ្រោះតាមរថយន្តទៅកាន់គ្លីនិកឯកជនដើម្បីធ្វើការសង្គ្រោះ ។ ចំណែកម៉ូតូរងគ្រោះសមត្ថកិច្ចយកទៅរក្សាទុករង់ចាំសាច់ញាតិមកទទួលយកទៅវិញ ៕
ចែករំលែកព័តមាននេះ